Beveilig jouself en jou gemeenskap só

Deur Ian Cameron

Ian Cameron.

Ek het die afgelope 72 uur talle oproepe gekry van mense wat wil weet wat hulle kan doen om hulself en die mense om hulle se veiligheid te verseker. Die staat het geensins die vermoë om burgers en hul eiendom te beveilig nie.

Toe die inperking in 2020 begin het, was die ANC vinnig om meer as 70 000 soldate te ontplooi, maar nou, terwyl dele van die land brand, word net 2 500 soldate ontplooi. Die SAPD het nie genoeg ammunisie, mense en ander hulpbronne om wet en orde te herstel nie; ek noem nie eers die vermoë om voorkomend op te tree nie.

Wat kan jy doen?

1. Maak seker jy beskik oor alle nodige noodnommers, veral oor die van jou plaaslike gemeenskapstrukture soos plaas- of buurtwagte. Dit is ook belangrik dat jy seker maak jy is in gereelde kontak met jou bure; gee om vir mekaar en ondersteun mekaar waar moontlik.
2. Dit is belangrik om onnodige reis te vermy. Natuurlik sal ʼn mens eers basiese take moet afhandel. Mense wat in gebiede woon waar konflik kort-kort opvlam, hoofsaaklik in Gauteng en KwaZulu-Natal, moet veral hieraan gehoor gee.
3. Indien jy moet reis, maak seker jy ry nie op paaie waar rommel of ander soorte hindernisse lê nie. Kyk uit vir geboue of enige ander goed wat brand en vermy eerder daardie area.
4. Raak betrokke by jou gemeenskap se veiligheidstrukture soos jou plaaslike buurtwag, plaaswag of selfs ʼn gemeenskapspolisiëringsforum.
5. Maak seker jy vorm deel van die gemeenskap se kommunikasiekanale, hetsy dit deur WhatsApp of ander kanale is. Maak seker jy neem kennis van wat daar gesê word en dat jy nie enigiets wat nie bevestig is versprei nie. Die laaste ding wat ons nou nodig het, is fopnuus wat die noodlot verder terg.
6. Indien binne jou vermoë, word deel van die patrolliegroep en hetsy hulle staties of mobiel verkeer, neem aan patrollies deel.
7. Maak seker dat indien jy aan patrollies gaan deelneem, jy dit nie alleen doen nie. Jy moet altyd minstens een persoon by jou hê; twee is altyd beter as een.
8. Indien jy ʼn vuurwapen vir selfverdediging het, dra dit by jou en maak seker jy voldoen aan die wetlike vereistes.
9. Indien jy op enige manier van hulp aan die polisie of ander nooddienste kan wees, bied asseblief jou hulp aan. Onthou, hulp kan so eenvoudig soos ʼn glas water of ʼn koppie koffie wees. Daar is duisende goeie mense wat met min of geen ondersteuning nie vanuit die staat hulle werk as staatsamptenare op grondvlak tot die beste van hulle vermoë probeer doen.
10. Onthou, as jy jouself kan beskerm, kan jy jou gesin beskerm, as jy jou gesin kan beskerm kan jy jou bure beskerm, as bure mekaar beskerm, kan ʼn gemeenskap beskerm word.

Hou moed, ons het geen ander alternatief nie, ons bou voort!

• Ian Cameron is ʼn onafhanklike kenner van gemeenskapsveiligheid en geweldsmisdaad in Suid-Afrika. Hy is ook die stigter van firearms.co.za en dien op die raad van #SafeCitizen.