Beweerde verkiesingsbedrog in VSA – nog is het einde niet …

(Foto: AP Photo/Andrew Harnik)

Ten spyte van verskeie neerlae in die howe, gaan die Trump-veldtog voort om hul bewerings van verkiesingsbedrog in die wetgewers van verskeie deelstate waar die uitslag betwis word, deur middel van voorleggings te staaf. In Pennsilvanië, Arizona, Nevada, Michigan en Georgia het reeds sulke voorleggings (hearings) van ooggetuies van die beweerde verkiesingsbedrog plaasgevind. Dit geskied onder die leiding van president Donald Trump se prokureur Rudy Giuliani.

Die getuies was almal op een of ander manier by die verkiesing betrokke (as waarnemers, stemtellers, stembeamptes, tegniese personeel van die telmasjiene, vragmotorbestuurders wat stembusse rondry, ensovoorts) en het eerstehandse getuienis gelewer van bedrog of ten minste verdagte gebeure en ongerymdhede rondom die verkiesing op 3 November. Die ongerymdhede, wat feitlik net oor die briefstemme gegaan het, het almal in groot stede wat deur die Demokratiese Party beheer word en in die verskeie swaaistate (swing states) geleë is, plaasgevind. Boonop het die stede, soos Detroit, Philadelphia, Minneapolis, Pittsburgh en Atlanta, dikwels ’n geskiedenis van korrupsie en plaaslike verkiesingsbedrog.

Pres. Donald Trump. Foto: REUTERS/Carlos Barria

Almal van die getuies het beëdigde verklarings gemaak en gevalle van verkiesingsbedrog of ongerymdhede uitgewys: Waarnemers van die Republikeine is gekeer om die telproses te kon sien en is selfs die stemlokale verbied of uitgejaag; briefstemme se datums is by die poskantoor teruggedateer om hulle nog binne die afsnypunt te kry; stembriewe vir Biden is verskeie kere in die telmasjien ingelees; daar is met stembusse gepeuter of hulle is nie behoorlik geseël nie; kiesers is deur stembeamptes voorgesê om vir Biden te stem en het ook andersins partydig opgetree; bedorwe stembriewe is nog steeds getel; handtekeninge is nie nagegaan nie en geen identifikasiedokumente van kiesers is gevra nie; talle kiesers het meer as een keer gestem, persoonlik én per brief; mense wat oorlede is of reeds na ander state verhuis het, het gestem; stembriewe wat kamstig per pos ontvang is, was duidelik menigvuldig gefotostateer; met die telmasjiene is verskeie kere gepeuter om die uitslag te verander. Daar het selfs ’n video opgedaag wat wys hoe telbeamptes, nadat die waarnemers en die media gevra is om die stemlokaal te verlaat weens ’n onderbreking van die telproses, in die geheim bokse met twyfelagtige oorsprong onder ’n tafel uitgehaal en getel het, blykbaar genoeg om vir Biden in die swaaistaat Georgia net-net die oorwinning te gee.

Joe Biden (Photo by JIM WATSON / AFP)

Omdat in verreweg die meeste van die sogenaamde swaaistate Biden met net ’n baie klein voorsprong van ’n persentasiepunt of selfs minder gewen het, is daar vraagtekens. Daar is ook ander statistiese merkwaardighede: in die omstrede demokratiese vestings was die stempersentasie besonder hoog, soms selfs 100% en hoër. Verder het Trump feitlik orals in die omstrede state voorgeloop tydens die telproses en skielik op feitlik dieselfde tyd het Biden in die genoemde stede ’n magdom stemme bygekry. In elke verkiesing gebeur foute, maar dan beïnvloed dit beide kante en vind nie net in ’n handjievol demokraties beheerde stede in die allerbelangrike swaaistate plaas nie, en feitlik orals onder dieselfde verdagte omstandighede.

Dit is opvallend dat bitter min nuusbronne die skokkende bewerings wat in die verhore van Rudy Giuliani deur die getuies gemaak is, gedek het. In die VSA is dit eintlik net Breitbart en in ’n mate Fox News wat dit dek, oorsee vind dit in geen hoofstroommedia enige dekking nie – net Trump se neerlae in die howe word genoem en al die bewerings van vervalsing as versinsel van ’n slegte verloorder afgemaak. Talle howe het inderdaad al van die sake uitgegooi, maar dit het meestal oor tegniese punte gegaan, soos oor watter hof verantwoordelik is. Dit is ook nie suiwer ’n regsaak nie – daar word met die verhore ook gepoog om die wetgewers van die deelstate so ver te kry om die verkiesing in hul staat ongeldig te verklaar of ten minste alle bedorwe stembriewe uit te gooi. Dis nog nie duidelik wat die uiteinde is nie, maar heel moontlik gaan die saak in die hooggeregshof (Supreme Court) draai.

Foto: REUTERS/Rebecca Cook

Hoe is dit denkbaar dat in die staat met die oudste en mees stabile demokratiese tradisie in die wêreld verkiesingsbedrog op groot skaal sou kon plaasvind en dit nie nuuswaardig is nie? Die antwoord lê daarin dat die vyande van Trump, wat volop is in die elite en in die media, hom as so ’n groot bedreiging vir hul progressiewe agenda sien, dat letterlik enige middel reg is om hom te keer. In talle lande, byvoorbeeld Duitsland, word hy in geen onduidelike terme deur histeriese meningsvormers as ’n soort tweede Hitler gesien. Die doel om hierdie “gésel van die planeet” te keer, heilig dus alle middele, uit dié oogpunt gesien. Die media in die Weste het reeds lankal hul eertydse ideaal van gebalanseerdheid en neutraliteit opgegee en beskou nou die regte (linkse) houding en aktivisme as die hoogste vorm van goeie joernalisme.

Nog ’n rede mag wees dat agter die skerms, moontlik selfs in die howe, saamgestem word dat ’n oorwinning vir Trump tot grootskaalse onluste sal lei en dit dus beter vir almal se veiligheid is om Biden eerder te laat wen en beide oë teenoor verkiesingsbedrog toe te druk. Reeds in die nag ná stemdag, toe dit gelyk het asof Trump gaan wen, het hordes aggressiewe Black Lives Matter-aktiviste in Washington saamgedrom, gereed om onlus te stook. Trump se ondersteuners sal op hul tande kners as hulle verloor, maar nie die land aan die brand steek en amok maak nie. Indien daardie soort Derde Wêreld-politiek, waar die mees aggressiewe en mees gewetenlose party wen, ook reeds die VSA besmet het, is daar egter geen hoop meer vir die Weste nie.