Is jy ’n rusbank-boelie?

rusbank-boelie

Foto: Pixabay/Pexels.com

Deur Juliana Coetzer

As psigoterapeut werk ek ten minste vier dae per week met mense wat ernstig getraumatiseer is deur een of ander insident . My kliënte wissel van persone wat verlies ervaar deur ʼn egskeiding, ʼn geliefde aan die dood moes afstaan, met die effek van ʼn ernstige siekte gekonfronteer word – tot ʼn meisie wie se hond voor haar oë doodgery is en ʼn bejaarde vrou wie se man op ʼn plaas vermoor is.

Mense kom spreek my oor afbrekende verhoudings, buite-egtelike verhoudings en uitgediende verhoudings.

Slagoffers van kapings, gewapende rooftogte en aanrandings sit daagliks in die stoel oorkant my.
Met mense wat hul huise en die inhoud in brande verloor, is ek bekend. Die verlies van besittings wat jou veilig laat voel en jou sekuriteit was, vat maande, selfs jare, om te oorkom. Met dié mense loop ek ʼn lang pad.

Buitendien, trauma agtervolg trauma en nuwe trauma maak ou trauma oop. Dikwels meld die kliënt as slagoffer van ʼn gewapende roof aan wat ná twee sessies verander in die slagoffer van seksuele molestering as kind. Weereens ʼn baie lang proses tot herstel.

Mishandeling: verbaal, emosioneel, seksueel, fisiek en finansieel, toets my geduld tot die uiterste. Dit is die tye wat ek op my hande moet sit, stadig in en uit asem en elke woord sorgvuldig oorweeg wat uit my mond kom. Ek wil slagoffers uit huise verwyder, ek wil voorskryf en oortreders afskryf en slegsê.

“Wat doen dit aan jou?” vra mense my gereeld. “Hoe raak jy nie betrokke by die ‘gevalle’ nie? Hoe hou jy jou emosies onder beheer?”

Ek weet self nie altyd nie. Miskien jare se ervaring, of dalk omdat die fokus so sterk is op luister en ook tussen die lyne luister, dat daar nie altyd aandag aan “voel” gegee kan word nie. En ʼn mens kom op ʼn punt waar jy glo jy het al alles gehoor. Jou toleransie teen skok bou met die jare so sterk op dat jy meer en meer kan hanteer en verteer. Maar ons weet almal dit is nie volhoubaar nie.

Op ʼn dag kan jy nie na één storie meer luister nie. Van fokus is daar geen sprake nie. Jou brein is ʼn lugleegte. Die toleransie het afgebreek. Dit gebeur met almal en is nie uniek aan dié beroep nie.

Dit gebeur óf wanneer die tenk propvol water is en nie een druppel meer ingeneem kan word nie, óf wanneer jy met iets gekonfronteer word wat soos ʼn vuishou die wind uit jou maag slaan. Jou laat dubbelvou. Iets wat vir jou nuut, donker en gevaarlik is.

Dit het met my gebeur. Iemand het my oor die afgrond gedwing:

Die rusbank-boelie.

Ek het hulle leer ken as die gesigloses in die samelewing wat vanuit die veiligheid van hul rusbank in die huis, ander kritiseer en veroordeel volgens reëls wat hulle self opgestel het of aan vashaak om hulle veilig te hou. Die reëls wat vir hulle dink. Namens hulle dink. Wat besluit hoe mense moet wees. Die mens wat die woede of veragting wat hy vir ʼn sekere groep mense het, op sosiale media verbaliseer deur te impliseer dat hulle verdien wat hulle toekom. En dan agter die woorde “so sê die Here” skuil en verse aanhaal, asof dit die regmerk is wat siek idees toelaatbaar maak.

Mense met gebrek aan empatie, meelewing en deernis. Dalk is “gebrek” nie die regte woord nie – ʼn algehele afwesigheid daarvan is eerder waar. “Bly weg van mense wat nie empatie het nie,” sê ons in hierdie beroep. Hulle is gevaarlik. Reëls is daar baie, maar hulle kan nie voel wat hulle aan ander doen nie.

Elke mens het ʼn storie te vertel. Aan elke storie is daar emosies gekoppel. Emosies help ons om ons in iemand anders se situasie in te dink. Te voel wat hy beleef. Dit is hoe deernis of “compassion” ontwikkel. Wat dit vra, is dat ons oor iemand anders se omstandighede nadink en ons in hulle posisie indink, en nie omdat ons lui is die maklike reëlboek nadertrek waaraan mense gemeet word of hulle skuldig of onskuldig is nie. En in die kategorie van “goed of sleg” geplaas word nie. Dit vra ʼn lewe waarin ons op ons eie ervarings fokus en verantwoordelikheid neem vir die mens wie ons is.

Iemand wat ontwikkel en ʼn aanwins vir die samelewing is. Sy weersin in mense raaksien en dit hanteer. Dit nie ten toon stel deur sy pen in gif te doop en die media te gebruik om sy stem te wees nie.

Hoe die arme joernaliste dit verduur wat elke dag die haatspraak moet lees, gaan my verstand te bowe.

Tydens ʼn inbelprogram by ʼn radiostasie, ná die vloede in Johannesburg, sê ʼn vrou sy weet nie hoekom almal so ontsteld is oor mense wat stroom-af gesleur is en nie opgespoor kan word nie, daar is dan gebid vir reën.

ʼn Vrou word deur haar skoonseun vermoor en ʼn leser van die koerant se reaksie is: “Sy het seker ingemeng in hul huwelik.”

ʼn Dorp brand af. Iemand skryf: “ʼn Paar jaar gelede was daar in die dorp ʼn gay saamtrek en gay troues is voltrek. So straf God ʼn dorp waar sonde gepleeg is.”

ʼn Pragtige student, in die fleur van haar lewe, word vermoor. Haar pa se pyn is so oorweldigend dat hy nie kan praat nie. (Trauma in die ergste graad. Die stomheid ʼn simptoom van die intensiteit.)

ʼn Verwoede storm tref sosiale media. ʼn Bruin vriend, wat ernstig aangerand is, was saam met haar in die motor. “Meng jou met die semels, dan vreet die varke jou,” is gesê. “Dit is die gevolg van ouers wat Afrikaanse kinders na Engelse skole stuur.” En: “Hoekom het die ouers die verhouding toegelaat?” Natuurlik moet die Bybel ook nadergetrek word: “Vermenging is sonde teen die Heilige Gees.”

Iemand wat net so ontsteld is soos ek oor die openbare gesprekvoering, vra: “Weet mense nie hell is not about the heat of the fire but the absence of love?”

Jare gelede ontmoet ek in my privaat hoedanigheid ʼn man wat nie sy ware kleure van opperste rassisme kan wegsteek nie. Dit is al waaroor hy praat. Sondae sit hy voor in die kerk.

Ek ontmoet sy vrou ʼn paar jaar daarna. Sy is besig om van hom te skei, vertel sy. Sy kon nooit verstaan dat die huishulpe net ʼn tydjie daar werk nie. Tot iemand eendag die moed het om vir haar te sê hy dwing hulle om hom seksueel te bevredig. Dit noem Freud “reaksie-formasie”. Die beeld wat ʼn fanatikus voorhou, is meestal die masker waaragter hy sy eie skaamte wegsteek.

The bigger the front, the bigger the back. Laat ’n mens dink, nè?

Hierdie meningstuk is deur ʼn onafhanklike persoon opgestel. Die menings en standpunte wat in hierdie skrywe uitgespreek word, is nie noodwendig die beleid of standpunt van Maroela Media se redakteurs, direksie of aandeelhouers nie. -Red

Deel van: Meningsvormers

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ʼn vrywillige bydrae. Onthou – ons nuus bly gratis.

Maak 'n bydrae

25 Kommentare

Dawie ·

Juliana, jy slaan die spyker so op die kop. Insiggewende artikel. Ongelukkig sal die van wie gepraat word in jou meningstuk hulself nie herken nie en jou afmaak as onkundig. Die berig wat gister geplaas is oor die arme vrou wat in haar huis aangeval is, is ‘n sprekende voorbeeld.

E.K. ·

Baie baie mooi gestel. VERAL die laaste sin van eerste paragraaf onder Die rusbank boelie gedeelte.

Heleen ·

Hierdie artikel sê presies hoe ek voel. Daar is soveel mense wat dit geniet om negatiewe kommentaar te lewer. Hulle mis gewoonlik die punt heeltemal in hulle vrome, skeinheilige beterweterigheid. Hulle het geen begrip of empatie met die wat van hulle verskil nie.

Henry ·

Ek stem saam dat siele wat oor alles en nog wat ‘n ongemotiveerde, negatiewe teem kwytraak, as rusbank boelies beskryf moet word.

Gelukkig was daai soort weersprekende enkelinge, voor 1994 mooi en flink kort gevat wanneer hulle nie wou byt aan die sprokie dat ons die uitverkore volk in Suid Afrika is nie. Die ooms in ons kerke het hierdie “feit” ook gereeld bevestig. Mos…

Die waarheid kon slegs deur “ons” koerante en radio verkondig word. Die siele wat die teendeel verkondig het, was ‘n spul kommuniste en liberaliste wat in ontkenning deur die lewe strompel en in die buitenste duisternis gewerp moet word. Is slegs “ons” joernaliste, redakteurs en omroepers wat oor ‘n lisensie beskik om die waarheid te verkondig. Weg met alle teensprekers en hul leunstoel kornuite!!!

Ons destydse minister van radio, pos en allerlei dienste, het vir donkie jare ons ook beskerm teen die negatiewe invloede van die verderflike televisie medium. Ongelukkig moes hy ook uiteindelik teen die verderflike invloede swig en is ons uiteindelik toegelaat om Haas Das en Knersus van naderby te leer ken.

Ag ja.
En so kan daar sovele voorbeelde opgehaal word oor die destydse stryd wat teen die spul verderflike leunstoel boelies se dekadente invloede gevoer is – om ons te beskerm, mos. Nou is ons bloot gestel aan allerlei weersprekende opinies van verraderlike leunstoel boelies wat steeds weier om te GLO dat alle perde-wat-ookalle, inderdaad vye is.

:-)

John ·

Die Bybel praat van ‘n toename van liefhebbers van die eie ek in die eindtyd. Saggeaarde mense ly onder diesulkes en soek fout by hulself, maar is veral ook uitgelewer en kan as gevolg van verskillende omstandighede nie bloot net vlug nie. Die dood is ‘n vreemde konsep vir die moderne mens en oorloe ‘n onbekende. Die ergste van sulke gebeure soos in terreur is nou ons voorland en skokkend verby. (Pille vir angs is dikwels baie verslawend en kan nie ‘n lewenskruk word nie.) Die eie ek word deur wrede mense beskerm deurdat ‘geheueverlies’ intree met ‘n ongelooflike leuenspel teenoor hom-/haarself. Veral onskuldige kinders se lewens word verwoes deur hierdie tweegesig-duiwels omdat hulle nie wil glo dat diegene wat hulle dan so liefhet so sleg kan wees nie.

Frans ·

Juliana jy slaan die spyker op die kop. Die goue draad wat deur die Bybel loop is liefde. Sonder liefde is die mensdom maar wreed. Jesus het ons kom wys wat ware opregte liefde beteken. Ons moet soos ń neut klou aan Jesus deur gebed om ń ware en opregte verhouding met Hom te hê, sodat ons gered kan word. Sy tweede koms is naby, dan gaan hierdie siek wêreld tot ń einde kom. Sterkte met jou werk.

Thabo ·

Mense, ons is siek, baie siek. Uiters insiggewende artikel en soos dit in Ingels gesê word,” long overdue”

Maak n TVreeks en wys die wereld ·

Dr Juliana, jy sien van die slegste dinge wat met mense kan gebeur, erger as ander terapeute in alle ander lande. Maak asseblief n reeks uit jou ervaringe wat op die wereld se TV kanale gewys kan word sodat die wereld besef wat hier aangaan. Bittermin oorsese mense weet of gee om, maar met jou emosionele benadering gaan jy dalk ons land nog kan red want dan gaan die oorsese mense uiteindelik verstaan en help.

Pieter ·

Uitstekende artikel. My uitgangspunt is altyd: Ander se negatiewe ingesteldheid skep geleenthede vir my.

Lynette Lombard ·

Ek luister so ‘n rukkie terug na ‘n onderhoud van Oprah met ‘n wêreldbekende monnik (ek het sy naam vergeet) en die man sê die waarste ding wat ek nog gehoor het : “the most important thing ever is COMPASSION.” Hy sê verder dat as almal regoor die wêreld kon aanleer om empatie te hê, die wêreld ‘n totaal ander plek sou wees. ‘n Plek sonder rassehaat, oorloë, homofobie, narcisisme, ens….

Lena ·

Wat ‘n pragtige skrywe, daar is so ‘n gesegde ‘Live and let Live’. Geld en mag het baie mense se lewens oorgeneem en daarom het OMGEE vir mekaar by die agterdeur uit verdwyn.As mense net sal besef, dat dit alles maar op die ou end nie belangrikste is en was nie.

wiekie ·

Dankie vir hierdie pragtige stuk werk Juliana. Sterkte vorentoe. Mooi loop?

Mina ·

Juliana, is dít wat jy hier doen, nie maar dieselfde as ‘n bank-boelie nie? Jy gebruik mense wat iets op die hitte van die oomblik gesê het (op sosiale media) as ‘n voorbeeld om jou punt te staaf? Sou ‘n beter manier nie gewees het om direk met die persoon te gaan gesels oor sy opinie en te probeer verstaan waarvandaan hy kom nie? Nou gebruik jy sy/haar opinie om te gebruik in jou woordvloed van emosies om jou punt oor te dra.

Jy het egter die sielkundige graad en dus geregtig om dit te doen. So jou opinie moet meer weeg en jou daad minder tel, of wat?

JJ ·

Mina,

” In die hitte van die oomblik? Mense moet leer dat hulle eers moet dink en besin voordat hulle “hul” oorhaastige aannames aan almal wat luister opdwing. Slimmes en dommes wil tog te graag hul opinies laat hoor, reg of verkeerd. Vra maar vir die Penny Sparrows ens of hulle nog so graag hul stemmetjies laat opklink. Gee jou opinie, dis jou reg, maar moet nie net iets se omdat jy kan nie en om te oordeel is nie jou werk of plig nie en die meeste mense is keelvol vir giftige en negatiewe kommentaar.

Henry ·

Watter een van die twee – “slimmes en domes” – is jy JJ?

Henry ·

Jammer vir die vingerfout.
Moet dommes lees.Ekself is aan die dommeriger kant…
Nietemin. Wil graag weet watter een is jy JJ?
Slimmeriger ene?

Elna Bekker ·

Ek wens ek kan by jou uitkom om saam kop te skud oor “in die Naam van die Here…” Is dit wat mense doen dan nie presies die ydelike gebruik van Sy naam nie? Is ons bevoeg in ons eiewaan om ooit ‘n oordeel te vel? Is dit nie dalk hoekom die einste Bybel ons maan om aan niemand iets veskuldig te wees behalwe LIEFDE nie. – dalk verstaan ons nie mooi wat bedoel word nie!
Mag jy heeltyd ‘n fontein hê wat jou voed sodat jy jou hande rustig voor jou kan vou. Ek het jou skrywe baie geniet!

Jacques ·

Die goue draad deur Juliana se artikel is die van empatie en compassion as komponente van genesing. Die artikel laat my weer besef dat jou denke bydra tot die skep van ‘n gemeenskap en die ander om ons met wie die “ek” in verhouding mee staan. Dalk ook ‘n bybelse beginsel: Om mekaar lief te he en te help genees, eerder as oordeel en seermaak? Baie goed deur gedink en geskryf Juliana!

Stem Saam ·

Tim du Plessis het ‘n paar jaar gelede van die ‘malletjies’ geskryf wat ‘n stem gegee word op forums soos hierdie. Hopelik is ek nie een van hulle nie. Die meeste nuuswebwerwe het alle leserskommentaar gestop weens die ‘malletjies’ se lasterlike en skadelike gifspoeg teen slagoffers en nuuswaardige items. Ek dink dat Maroela veel strenger in hulle moderering behoort te wees.

Karin Grobler ·

So word mense wat reeds getraumatiseer is verder getraumatiseer. En die skok wat dit op die sisteem is, is net so intens, indien nie erger as die oorspronklike trauma. Oordeel is ‘n vreeslike ding…..

Ouvrou ·

Ek stem saam met die skrywer. My kind word gediagnoseer as bipolar en ek word deur boelie vertel van ‘n pastoor wat die duiwel uit die kind sal dryf.

O wee, die gesang is uit! Kommentaar word ná 48 uur op ʼn artikel op Maroela Media gesluit. Kom kuier gerus verder op ʼn meer onlangse artikel.