FAK HB en MJ Thom Joernalistiekprys vir Egmont Sippel

HB en MJ Thom Joernalistiekprys 2011
Commendatio vir Egmont Sippel

Bron: www.carsinaction.net

Egmont Sippel is ‘n uitsonderlike figuur in die joernalistieke wêreld en dan veral in die motorjoernalistiek. Die wonderlike is dat Egmont Sippel nie ‘n sommerso motorjoernalis is nie. Na voltooiing van twee jaar studie in die ingenieurswese, slaan hy oor na ‘n BA-graad met filosofie en staatsfilosofie en behaal die graad met uitsonderlike prestasies. Daarna behaal hy die BA-honneursgraad in joernalistiek met eweneens die beste resultate. Sy akademiese studie het hom uitstekend geskool vir die joernalistieke wêreld, wat ook ‘n loopbaan as sportskrywer (gholf, tennis en rugby) ingesluit het.

Sy veelsydigheid strek tot artikels oor musiek, rolprentsterre, bedelaars, popsterre en die “ideale vrou”. Maar hy het in die besonder sy staal gewys in die motorjoernalistiek. Sedert 1995 is hy motorskrywer vir Rapport, maar lewer op vryskutbasis bydraes vir onder andere De Kat, Taalgenoot, Car Magazine, Wheels24, Moneyweb, Drive Magazine, Cars in Action, ens. Wat uitstaan, is die joernalistieke taal en styl in die motorbedryf.

Die Taalkommissie van die SA Akademie vir Wetenskap en Kuns kan kers opsteek by Egmont Sippel wanneer dit kom by die vind van tegniese terme en terminologie in Afrikaans, want Afrikaans is sy sterkste punt. Daar word van hom gesê dat hy soos ‘n filosoof en taalvirtuoos na motors kyk en hulle as sodanig beskryf. Hy is in sy skryfwerk kundig, deurdag, leesbaar, poëties met sy beskrywings van die motor-wêreld wat dikwels talle ander aspekte van die menslike wêreld insluit. In die motorwêreld is Egmont Sippel talle kere bekroon. Hy is agtereenvolgens in 2002, 2004, 2007 en 2008 as Motorjoernalis van die Jaar benoem en die lofprysings is nog vele. Dis duidelik dat Egmont Sippel ook buite die omraming van die motorwêreld taalgewys groot aansien in die Afrikaanse wêreld geniet.

Daarom is dit vir die FAK ‘n voorreg om die HB en MJ Thom-Joernalistiekprys aan hom toe te ken. Wat sê ‘n Afrikaanse letterkundige en digter van een van sy rubrieke in Rapport?

“Ek het pas jou motorrubriek in vandag se Rapport gelees. Jis, maar jy kan skryf. Kragtoer op kragtoer is elke paragraaf. Sommer jaloers”.

Hierdie plasing is deur ’n onafhanklike persoon of onderneming saamgestel. Die menings en standpunte wat in hierdie skrywe uitgespreek word, is nie noodwendig die beleid of standpunt van Maroela Media se redakteurs, direksie of aandeelhouers nie. –Red

Deel van: Meningsvormers

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ’n vrywillige bydrae. Onthou – ons nuus bly gratis.

Maak 'n bydrae

Het jy iets op die hart? Maroela Media se kommentaarfunksie is ongelukkig gesluit oor die Paasnaweek. Kom kuier gerus later weer!

Nuuswenke kan deur hierdie vorm gestuur word.