Hoe ver gaan Trump verloor?

donald-trump-vs-hillary-clinton

Foto: Youtube.com

Vroeg Maandagoggend Suid-Afrikaanse tyd het wat sommige politieke ontleders as die vuilste politieke debat in die geskiedenis van Amerikaanse presidentsverkiesings beskryf, tussen Donald Trump en Hillary Clinton plaasgevind. Met die vuil wasgoedwater van albei kandidate wat reeds in die strate van elke Amerikaanse dorp en stad afloop en dreig om elke Amerikaanse huis binne te dring en te verswelg, kon ’n mens seker nie verwag het dat ’n ordentlike debat oor beleidsake sou plaasvind nie.

Die gebeure van die afgelope week het die perfekte klimaat vir ’n moddergeveg tussen twee ongeskikte, maar erger nog, onbekwame kandidate geskep. Die realiteit is egter dat Demokrate verenig staan agter Hillary Clinton en dat die Republikeinse Party en sy vernaamste lede soos verkose senatore en goewerneurs byna almal die afgelope paar dae hul rug op Trump gedraai het. Trump se beter as verwagte vertoning in die debat is te min te laat en sal ’n baie beperkte bydrae tot sy herstelpoging lewer.

Die uitslag van die verkiesing kan nie meer ’n verrassing wees nie. Hillary Clinton is die volgende president van die VSA, terwyl ’n meerderheid van Amerikaners gril as hulle aan die idee van ʼn tweede pres. Clinton dink. Erger egter is die idee van Trump as president, wat op ’n video uit 2005 wat verlede Vrydag skielik deur twee groot nuusbronne in die VSA bekend gestel is, seksuele teistering goedpraat.

Terwyl Trump se onaanvaarbare opmerkings uit 2005 sy veldtog finaal gekelder het, het ’n hele boel nuwe Clinton-bagasie ook vorendag gekom. Wikileaks het die teks van die 92 toesprake wat Clinton tussen 2013 en 2015 teen ’n koste van byna 22 miljoen dollar by groot maatskappye op Wall Street gelewer het, bekend gemaak. In hierdie toesprake maak sy verdoemende opmerkings oor haar voorkeur vir oop grense, die feit dat sy oor verskeie kwessies aparte persoonlike en openbare standpunte, wat van mekaar verskil, het en dat sy ten gunste van vryhandelsooreenkomste, wat groot multinasionale maatskappye bevoordeel, is.

Voeg hierdie onthulling by Clinton se bestaande probleme soos haar onwettige gebruik van ’n private e-posbediener en haar swak hantering van die veiligheidsituasie by die Amerikaanse ambassade in Libië ’n paar jaar gelede as minister van buitelandse sake en dan behoort sy eintlik in diep moeilikheid te wees.

Clinton is egter die gemaklike voorloper in die stryd om die presidentskap. Sy het die eerste sowel as die tweede debatte gewen, sy het sakke vol geld en die Demokrate het agter haar verenig en die media steun haar byna ten volle. Wat Clinton egter die meeste help, is dat baie Republikeine spyt is oor hul keuse om Trump as kandidaat aan te wys, dat verskeie hooggeplaaste partylede hul steun reeds onttrek het en die heel belangrikste, die feit dat Trump eintlik ’n vrot kandidaat is. Sy kennis van belangrike politieke kwessies is uiters beperk, sy vermoë om by sy standpunt te hou is bykans heeltemal afwesig en sy humeur, swak taalgebruik, onsamehangende argumente en hope bagasie uit die verlede wat om een of ander rede meestal met onwelvoeglike opmerkings oor vroue te make het, skep die perfekte geleentheid vir ’n swak kandidaat soos Hillary Clinton om die verkiesing te wen.

Die enigste manier hoe Republikeine nog op 8 November kan wen is indien Trump sou onttrek. Sy adjunk-kandidaat, Mike Pence, is ’n eerbare, bekwame politikus en behoort eintlik vir Clinton maklik ore te kan aansit. Dat Trump sal onttrek is egter onwaarskynlik: Hy hou net te veel van homself om te erken dat die skrif aan die muur is. Al vraag wat dus nog beantwoord moet word, is: Hoe ver gaan Trump verloor? Want dit gaan veel eerder Trump wees wat gaan verloor as Clinton wees wat gaan wen. My voorspelling is: Clinton 49%, Trump 41%, Johnson 6%, Stein 2% en ander kandidate 2%.

Hierdie plasing is deur ʼn onafhanklike persoon of onderneming saamgestel. Die menings en standpunte wat in hierdie skrywe uitgespreek word, is nie noodwendig die beleid of standpunt van Maroela Media se redakteurs, direksie of aandeelhouers nie. –Red

Jaco Kleynhans

Meer oor die skrywer: Jaco Kleynhans

Jaco Kleynhans is hoof van internasionale skakeling vir die Solidariteit Beweging.

Deel van: Meningsvormers

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ʼn vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Kommentaar word ná 48 uur op ʼn artikel op Maroela Media gesluit. Kom kuier gerus verder op ʼn meer onlangse artikel.

68 Kommentare

jongste oudste gewildste
Spioen

Wow… Jy kan nie op polls staatmaak nie. Kyk wat het gebeur met brexit. Wag maar vir die 8ste November dan praat jy! Hillary gaan die grootste gemors maak wat ons nog ooit gesien het!

Kobus

My opinie is dat Trump gaan wen. Wen Hillary het ons WWIII, wen Trump sink die zionistiese bankiers se skip. Met Putin, Trump en China teen hul is die NWO droom geskiedenis en sal die EU ‘n vinnige en welkome dood sterf.

chris

DIE HELE OU SPUL IS BAIE KOMMIN!!

Malva

Indien Amerika venynige Hillary kies sal hulle die prys betaal.

Melo

Ek hoop opreg dat trump gaan wen.