Is jy ook effens moeg vir korrupsie?

Argieffoto

Deur Paul Maritz

In sy eenvoudigste vorm is korrupsie die misbruik van posisie vir onregmatige voordeel. As ek dus my posisie as minister sou gebruik om my seun te bevoordeel sonder dat hy dit verdien het, dan het ek korrupsie gepleeg. As ek geld sou kry om ʼn kontrak aan ʼn maatskappy toe te staan wat nie noodwendig die beste was, of die korrekte prosedure gevolg het nie, dan is ek besig om korrupsie te pleeg. Korrupsie is verkeerd, want dit is oneerlik, en dit is misbruik van ʼn openbare posisie vir persoonlike gewin.

Hoe maklik is die paragraaf hierbo nie om te verstaan nie? Dit is eenvoudig, dit is voor die hand liggend, en ek is seker dat enige negejarige kind dit sal verstaan. Waarom, as dit so eenvoudig is, is dit so moeilik vir ons ampsdraers om na te kom?

Twee weke terug is die nuussiklus tot oorlopens toe vol gewees met Nhlanhla Nene, minister van finansies, se ontmoetings met die Gupta-familie, en sy seun se lening by die Openbare Beleggingsmaatskappy. Verlede week is die nuus tjokkenblok vol met die R16 miljoen-betaling wat Brian Shivambu, broer van LP, Floyd Shivambu, by die sinkende VBS-bank ontvang het – blykbaar vir “konsultasie” die kulkunswoord van ons tyd. Hierdie week is dit weer die Suid-Afrikaanse Inkomstediens (SAID), en belastingbetalersgeld wat vir persoonlike regskoste gebruik is.

Mens sou ʼn weddenskap kon aangaan dat daar volgende week nog ʼn skandaal gaan wees, en mens sou sekerlik reg wees. Ons land het duidelik ʼn massiewe korrupsieprobleem. Dit word deur hulle in topposisies as normaal beskou, as die ding wat mens doen wanneer jy ʼn magsposisie beklee. En die leiers van die staatsinstelling dien natuurlik as mentors en voorbeeldstellers vir hulle in laer posisies – so korrupsie bly net vir ʼn kort rukkie die uitsondering, dit word baie vinnig die reël. In Suid-Afrika is dit duidelik lankal die reël.

Die Suid-Afrikaanse belastingbetaler betaal maandeliks getrou – eintlik gedwonge – sy of haar geldjies oor aan die regering. Hierdie geld sien ons bitter min van, met groot kruisings wat daagliks sonder verkeersligte moet funksioneer, staatligte wat ʼn lukrake byvoordeel geword het, en staatskole wat in baie gevalle nie naastenby funksioneer nie. Die verskoning vir alles hier bo genoem is in meeste gevalle “ ʼn tekort aan befondsing”. Dié “tekort” word duidelik aangehelp deur ons regering se liefde vir hande-onder-die-tafel-besigheid – iets wat duidelik nie binnekort gaan stop nie.

Nog ʼn week, nog ʼn skandaal, nog ʼn onthulling dat iemand in ʼn magsposisie nie gedink het aan die mense in Suid-Afrika nie, maar aan sy of haar eie sak. Dit kan nie so aangaan nie, dit kan nie. Een van twee dinge sal gebeur:

  1. Óf die openbare sektor gaan inmekaar tuimel, onmagtig om die las van groeiende korrupsie te dra, om basiese dienste te lewer vanweë ʼn tekort aan fondse en hulpbronne, en om die maagkanker wat hom van binne af verorber uit te sny, totdat die hele sisteem inplof.
  2. Óf elke persoon in ʼn openbare amp sal ʼn lang kykie in die spieël moet neem, en besef dat die doel van staatsamptenare slegs beteken om die burgers van daardie staat te dien.

Korrupsie is diefstal, maar in plaas daarvan dat iets sigbaar en tasbaar gesteel word, word ʼn land se toekoms onder die voete van sy burgers uit gesteel.

  • Hierdie nuuskommentaar word deur Pretoria FM verskaf. Luister daagliks na Klankkoerant op Pretoria FM vir die jongste nuuskommentaar.

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ʼn vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Kommentaar word ná 48 uur op ʼn artikel op Maroela Media gesluit. Kom kuier gerus verder op ʼn meer onlangse artikel.

25 Kommentare

jongste oudste gewildste
Penellope Jones

Effens erg baie!

RG

Puik berig. Die wortel van die kwaad in SA. Roei dit uit. Kom IMF neem oor asseblief.

John

Ongelukkig is CR & Kie skynbaar nie skaam oor die stelery nie. Hoeveel mijard is verhaal van plaaslike sakkerollers en vriende? Nog niks, maar vandag word trots aangekondig dat groot bedrae deur buitelandse instansies ‘beloof’ is vir plaaslike projekte. As mens ‘n bodemlose emmer in aksie wil sien, is dit die’ een.

honourable member

Korrupsie het norm geword in hierdie land en hierdie mense sien niks verkeerd daarmee nie.

B-man

Ek hou van die woordspeling met “staatligte”.