Linkse en regse ekstremiste: Ooreenkomste spreek boekdele

dr-leopold-scholtz-kruispaaie

Dr. Leopold Scholtz. Foto: Reint Dykema.

Verskeie gebeurtenisse in die wêreld het in die afgelope dae opnuut die leemtes in die paradigma van die tradisionele skeiding tussen links en regs blootgelê.

In Charlottesville in Amerika was linkse en regse ekstremiste die aanjaers van ’n gewelddadige botsing wat op die dood van ’n onskuldige vrou uitgeloop het. Dit het gegaan oor die plaaslike owerheid se planne om die standbeeld van genl. Robert E. Lee, bevelvoerder van die suidelike Konfederale magte teen die noordelike Unioniste tydens die Amerikaanse Burgeroorlog (1862-’65), te verwyder.

Iemand wat dinge van buite af bekyk, het die luukse om neutraal te staan teenoor die verwydering van die standbeeld.

Enersyds was Lee persoonlik ’n eerbare generaal wat sy beste gelewer het vir wat hy as sy vaderland beskou het, die Konfederale State van Amerika. Andersyds het daardie selfde Konfederale State geveg vir die behoud van slawerny wat, hoe jy dit ook al wil bekyk, ’n moreel verwerplike stelsel was.

Nogtans, sou jy kon sê, dis geskiedenis. Oor Cecil B. Rhodes hier in Suid-Afrika kan ’n mens – tereg – ook baie negatiewe dinge sê, maar, net soos met Lee, dis deel van die geskiedenis. Wil ’n mens dan nou al die dinge in die geskiedenis wat jy met vandag se kennis en insigte as negatief beskou uit die annale van die geskiedenis verwyder (of hoogstens deur propagandistiese oë beskou)?

Onder die betogers aan albei kante in Charlottesville was daar mense wat sterk gevoel het, maar wat geen misdadige neigings gehad het nie. Maar daar was ook klipharde ekstremiste.

Onder die beswaarmakers, so sien jy op ’n video van die geleentheid, was daar onbeskaamde neo-Nazi’s wat openlik rassistiese en antisemitiese slagspreuke geskreeu het, wat die Hitler-saluut gegee en uitgeroep het “Heil Hitler!” en “Heil Trump!”

Onder hul teenstanders was daar mense wat ’n opregte afsku gehad het van die – soos hulle dit sien – goedpraat van slawerny, rassisme en die Nazisme. Maar daar was ook klipharde linkse ekstremiste wat – kom ons stel dit só – geensins afkerig was van gewelddadige metodes nie.

Dis waar dat die regses die munisipaliteit se amptelike goedkeuring vir die betoging gehad het; hul teenstanders nie. Maar, op die keper beskou, met die linkse en regse ekstremiste uitstekend in die aanwesiges se geledere verteenwoordig, was dit ’n bakleiery wat ’n plek gesoek het om te gebeur.

In Berlyn het dinge vreedsamer verloop. In dié stad het ’n groep neo-Nazi’s betoog vir die eerherstel van Rudolf Hess, wat in ’n stadium ná Adolf Hitler tweede in bevel van die Nazi-party was.

Hess het in Mei 1941 in ’n Messerschmitt 110 geklim en na Engeland gevlieg, klaarblyklik sonder Hitler se medewete, wat glo buite homself van woede was toe hy daarvan hoor. Vermoedelik was Hess nie lekker in die kop nie. Hy is gevange gehou totdat hy in die laat tagtigerjare in die Spandau-gevangenis in Berlyn oorlede is in omstandighede wat nog nie heeltemal opgeklaar is nie.

Dat die betoging vreedsaam verloop het, was te danke aan die matigende rol van die polisie, wat die teenbetogers – ewe ekstreem – ver van die neo-Nazi’s gehou het.

Die Berlynse polisie het geslaag waar dié van Charlottesville misluk het.

Charlottesville se gebeure herinner baie aan die grootskaalse straatgevegte tussen Nazi’s en kommuniste in die vroeë jare dertig in Berlyn en ander Duitse stede. En dit bevestig iets wat mense dikwels nie raaksien nie.

Tussen linkse en regse ekstremiste is daar – meestal – duidelike ideologiese verskille. Regse ekstremiste beklemtoon veral etniese identiteit en die belang van afkoms (met ander woorde, rás), terwyl linkse ekstremiste veral klem lê op klás.

Maar as jy kyk na hul ekonomiese oortuigings, vertoon dit nogal ooreenkomste. Albei groepe is gekant teen die groot kapitalisme en bepleit rigtings wat in mindere of meerdere mate sosialisties is. Albei haat die liberale veelpartydemokrasie, soos hy in die Weste bedryf word, met ’n ongelooflike passie.

Belangriker nog: Hul metodes is dikwels feitlik identies. Hulle meen nét hulle het die volle waarheid in pag, dat die ander dus totaal verwerplik is, en dat die ander gevolglik geen reg het om hul mening te huldig of in die praktyk toe te pas nie.

Baie mense sien die spektrum tussen links en regs as ’n reguit lyn, waar die twee uiterstes baie ver uit mekaar lê. In die praktyk moet ’n mens eerder dink aan die vorm van ’n hoefyster, waar die twee uiterstes taamlik naby aan mekaar uitkom.

Dalk die beste praktiese bewys hiervan was Josef Stalin en Adolf Hitler. Hitler het sý konsentrasiekampe van Stalin afgekyk, en in hul persoonlike gesprekke het hulle dikwels met die hoogste bewondering van mekaar gepraat.

Daar was in die destydse Duitsland ook ’n voortdurende verloop van mense oor en weer tussen die kommuniste en die Nazi’s. Hulle het iets in die ander kamp van hulself raakgesien.

Jy sien dit ook in Suid-Afrika. ’n Groot deel van die ANC, wie se idees oor die demokrasie hoofsaaklik deur die Afrika-kultuur en die kommunisme gevoed is, is inderwaarheid net so teen die huidige Grondwet en demokratiese stelsel gekant as regse (wit) ekstremiste. By hulle kry jy ook dikwels ’n histeriese gegil teen die liberalisme en die demokrasie.

Dit alles beteken dat die tradisionele teenstelling tussen linkse en regse ekstremiste eintlik vals is. Hulle stem in meer opsigte ooreen as wat hulle verskil.

Die korrekte teenstelling is dus nie tussen linkse en regse ekstremiste nie, maar tussen ekstremiste (van alle groepe) enersyds, en gematigdes (van verskillende oortuigings) andersyds. Natuurlik is daar talle verskille binne dié groepe intern. Maar soos hulle hul in die praktyk manifesteer, is dít die egte teenstelling.

Wat is die demokrasie? Dis eenvoudig ’n stelsel om verskille in oortuiging vreedsaam te bestuur, en om die mag só te versprei dat geen enkele persoon of instansie te veel mag rondom homself kan konsentreer nie.

Die probleem hier by ons in Suid-Afrika is dat die oorheersende deel van die regerende party nog nooit werklik gematig of demokraties was nie.

Gelukkig het die demokrasie, veel meer as elke ander stelsel, ’n selfregstellende vermoë in hom. Uiteindelik draai die wiel.

Wat ’n mens tans sien in die ANC, en die snelheid waarmee hy op ’n skynbare skeuring afstuur, is deel van daardie vermoë van die demokrasie om die ewewig te herstel.

Maklik sal dit nie by ons gaan nie; trouens, ’n mens sien swarigheid voor in die wapad. Maar die demokrasie gee ons ten minste ’n kans.

Hierdie plasing is deur ’n onafhanklike persoon of onderneming saamgestel. Die menings en standpunte wat in hierdie skrywe uitgespreek word, is nie noodwendig die beleid of standpunt van Maroela Media se redakteurs, direksie of aandeelhouers nie. –Red

Meer oor die skrywer: Leopold Scholtz

Leopold Scholtz is 'n onafhanklike politieke kommentator en historikus. Hy is al sedert 1972 as joernalis en historikus werksaam.

Deel van: Meningsvormers

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ’n vrywillige bydrae. Onthou – ons nuus bly gratis.

Maak 'n bydrae

Nou pra' jý

35 Kommentare

Kannaland ·

Links en regs is juis teenoorgestelde pole en het amper niks in sinvolle vergelyking in gemeen nie. Hul sienings is onversoenbaar. Trump en Malema is hemelsbreed uit mekaar. In die middel is opinielose draadsitters.

Kom Ons Boks ·

Onder Trump: Ekonomie floreer, hou alle kante aanspreeklik vir geweld, glo in oop vryemarkstelsel, respekteer die howe, het ‘n kuif…
Onder Malema: Ekonomie sal val, regverdig geweld van slegs een kant, glo in nationalisering alleenlik, howe word gesien as struikelblok wat geminag mag word, het ‘n rooi beret…
Mis ek iets???

Gerhard ·

“Kom Ons Boks” ek stel voor jy lees die artikel hier bo en hopelik kan jy sien wat jy gemis het ;-). Daar is heelwat ooreenkoms in hoe hy te werk gaan om die massa aan te hits met hoe Malema dit doen. Hy is verseker nie vir ‘n oop vryemarkstelsel nie. Anders sou hy mos vrye handel met ander lande voorgestaan het? Hy is wel minder ekstremisties in gevalle waar hulle ooreenstem, maar jy moet blind wees om nie ooreenkomste te sien nie.

Chris Schutte ·

Gerhard jy mis d punt . Trump is juis vir vryehandel. Maar nie as dit tot sy land se nadeel is nie . Sweep hy werklik d mense meer op as d linkse media ?

Gerhard ·

Chris Schutte. Daar is nie so iets soos vir vrye handel wees tensy dit soos jy se tot nadeel van jou land is nie. Of jy glo dit is goed of jy glo dit is sleg. Jy glo of in die beginsel of is daarteen.

“Boerseun”, ou seun die ekstremiste is altyd eerste daar en maak altyd die meeste geraas. Hulle doen ook meer skade aan hulle eie saak as wat as wat hulle oponente ooit kan doen.

Reinhardt ·

Kannaland, ek is in die middel, maar ek is vir seker nie opinieloos nie en/of n draadsitter nie. Ek leun wel na die regterkant toe wanneer dit baie meeste sake kom. Ek gee om vir almal in ons land, maar ek gee effe meer om vir my eie volk/kultuur. Dit beteken nie ek haat ander rasse nie, dit beteken ook nie dat ek n verraaier is omdat ek ook wil he my mede swart/bruin burgers moet gelukkig wees nie. Ek wil net he almal se regte moet respekteer word. Ek is voorstaander van onafhanklikheid, maar nie vir n spesifieke ras nie, en ook nie totale onafhanklikheid nie. Ons moet n federale sisteem he soos Switserland, n direkte demokrasie waar sekere kulture in sekere gebiede hul eie reels maak, mar ons moet tog saamwerk, ons woon nie in silo’s nie.

Kom Ons Boks ·

Ek wonder of Gerhard weet wat die verskil is tussen “Freetrade” en “Freebies”? Die Amerikaanse ekonomie weet wel en daarom die rekord groei in hul vernaamste beurse. Dit is waarom kleinhandel en verbruikers vertroue deur die dak geskiet het. Om te insinueer dat vryehandel nie regverdige handel insluit nie is dom astrant en kwaadwillig. Was dit nie Obama wat persoonlik AGOA met RSA wou kanselleer omdat ons regering telkemale nie sy kant wou bring nie? Trump doen dieselfde maar die skille val toe vir sy voorganger? Daar is baie mensies wat lekker sidder en beef daaroor maar die feit bly staan dat die Amerikaanse ekonomie gepraat het onder Trump…

Gerhard ·

“Kom Ons Boks” , die betekenis van regverdige handel beteken een ding vir een persoon en ‘n ander vir ‘n ander persoon. Byvoorbeeld as mense by Wallmart produkte gaan koop dan gee hulle nie om as dit in die VSA gemaak word nie, hulle koop net die goedkoopste produk. Die maatskapy wat dit vervaardig gee ook nie om nie solank die net baie produkte verkoop. Dan is daar die mense wat kla omdat hulle nie werk kry nie wat nie omgee dat produkte baie duurder plaaslik vervaardig sal word nie. Die vraag is maar net regverdig vir wie? Donald Trump is nou maar sewe maande president. Kom ons gee hom lof aan die einde van sy termyn as president wanneer hy dit verdien. Ek wil ook net laastens noem dat ek dink dit is moeilik om Barack Obama se ekonomiese beleid te troef nie. Al het die nuwe president niks gedoen nie sou dit beter gaan ;-)

Kom Ons Boks ·

Met daai logika moet daar dan gewag word op term-voltooing voordat mens Trump kan vergelyk met Malema? Almal op MM moet seker dan ook asem ophou voordat die ekonomie geanaliseer mag word? Impak van skade deur ekstremiste sal eers bekyk word na sy presedensie? Nee ou maat, die toekoms sal wel sy opwagting maak maar daar is geen tyd soos die hede om na sy presedensie te kyk en artikels soos hierbo slaafs te volg nie.
Dan, vryehandel is soos huiskoop waar twee partye onderhandel (regverdige aspek) oor prys totdat koper en verkoper gelukkig is met die resultaat (mutualistiese proses). Of die mark sleg is of nie, aan die einde van die dag forseer niemand kopers/verkopers se hand om ‘n gegewe prys te aanvaar nie alhoewel die finale kontrak bindend is. Enige persoon mag ‘n offer maak op die eiendom/me en die verkoper is geregtig om die beste offer te aanvaar (gesonde kompetisie). Amerika het sy ekonomie tot 2016 self ingeperk deur ondeurdenkte handel ter wille van goeie verhoudinge, burokrasie, oorloe en foefies soos groen-energie. Huidige inkortende belasting kodes het ook gesorg dat meer as 2triljoen dollar se verdienste in die laaste 8 jaar deur Amerikaanse maatskappye in die buiteland gehou word eerder as om dit te investeer in Amerika self. Dit gaan nie daaroor om tussen ‘n PRC of USA vervaardigde MAGA rooikeps in Wallmart te kies nie, maar om die geldjie te he om dit in die eerste plek te kan koop.

dirk L ·

hou dus die spul uitmekaar se werelde. baie mense soek geborgenheid by hul eie soort – wat hul vertrou of ten minste ken. ek gun mense hul eie spasie

Rupert Ashford ·

Leopold. ..kug-kug…so anders as die HSM van die VSA stem jy saam met Pres Trump oor die Charlottesville storie?;-)

Kom Ons Boks ·

Ek dink hierdie is ‘n voortreflike stuk deur skrywer. Dit kom ook neer op dit wat Trump gese het dat albei kante ewe veel blaam dra vir verwikkelinge in Charlottesville. Ek hou veral van die hoefyster analogie.

Pietman ·

Ja kyk, die regses het ‘n wettige optog gehad, sonder die linkses sou dit vreedsaam verloop het. Maar die linkses ( die fasciste wat hul is ) agtervolg konstant regse byeenkomste met die doel om dit te ontwrig en om mense leed aan te doen. Vryheid van spraak en respek vir diversiteit ( waar wit geskiendenis ook herken word) is nou ‘n regse kenmerk. Geweld en onderdrukking van spraak en onderdrukking van diversiteit is nou links. Hitler was eintlik links. Hy het die joodse kultuur gehaat soos wat die linkses wit mans haat, hy het oposisie met geweld onderdruk soos wat die linkses konstant doen ( BLM, ANTIFA, ISIS), Hy was teen vrye inligting ( boeke gebrand) soos die linkses wat n denkpolisie is op alle vlakke ( universiteite, soekenjins, openbare uitsprake). Die Nazi’s het ook vele banke genasionaliseer. Die linkses is kommunisties /sosialisties en glo dus ook aan groter staatsbeheer. Nee links en regs is twee verskillende pole en verskil soos dag en nag.

Boerseun ·

Een wettig ander onwettig maar altwee moet nou kastig ewe veel blaam dra? sommige kan dit net nie sien nie. Altyd n verskoning vir andere se kriminele optrede for the sake of multiculturism

Ou Ystervark ·

Leopold, ‘n uiters insiggewende artikel. Baie dankie daarvoor.

Dirk Breytenbach ·

Geagte Leopold, wie is volgens jou regse ekstremiste in SA? Ek sukkel om daardie gedeelte van jou kommentaar te verstaan.

Reinhardt ·

Enigiemand wat glo dat wit mense meerderwaardig is bo swart/bruin mense.

Kom Ons Boks ·

Reinhardt – verkeerd, dit is regse anargistiese groepe wat hul ideale wil verwesenlik deur enige metode denkbaar- insluitend veral geweld en fisiese verset ten regering. Dieselfde geld vir linkse ekstremiste natuurlik. ‘n Meerder- of minderwaardigheidskompleks maak nie van jou ‘n ekstremis nie. Die AWB is wel ‘n voorbeeld van so groep maar is so stil deesdae dat ek amper wil se dat so groep huidiglik nie bestaan in SA nie.

Therese van Schalkwyk ·

Dirk Breytenbach

Ek wonder ook wie die “regse (wit) ekstremiste” in Suid-Afrika is, want is werklik nie bewus van diesulkes se bestaan nie?

Knikkebollen ·

Om te verklaar dat een van die dinge ANTIFA en Neo-Nazis in gemeen het, die uiterste teenstand teen die huidige demokrasie is, is baie ver van die kol. ANTIFA is die noodwendige uitkoms van die som van Liberale Demokrasie. Dis die moderne vorm van die bloeddorstige Franse Rewolusie, waar die Rewolusionere teen almal en later teen hulle self gedraai het op die wreedaardigste maniere. Vryheid, Gelykheid, Broederskap het die nuwe godsdiens geword waar die Liberale Demokrate fanaties raak oor hulle ‘god’ en GEEN teenstand of meningsverskil duld nie.

dr Sakkie van der Merwe ·

Alles klaar gese weet ons dat demokrasie in Afrika net een kant toe werk. Jare gelede is gese ons sal nie soos Afrika verval nie, waar staan ons vandag? Die Afrika massas sal net bly instroom en moorde verkragtings net meer word. Oplossing? Kom ons poog om ‘n deel van ons volk “eenkant” te vestig onder eie regering. ‘n Droom? As mens nie meer kan droom nie is jou lewe en toekoms baie vaal en negatief.

Sorry Man ·

Wat ek baie snaaks vid is hoe ANTIFA, BLM en Resist hulself regverdig deur te skree “maar hulle is Nazis”. Het ons vergeet hoe ANTIFA se lede al vir maande by elke byeenkoms opdaag met wapens, vlae brand ens. Wat van daai geleerde ou wat in die naam van ANTIFA ‘n ander kerel met ‘n slot oor die kop geslaan het oor hy besluit het die ander is ‘n Nazi? Hierdie is malligheid en Trump was reg om alby kante aan te praat.

Gaan lees bietjie wie Hillary se mentor was, sy naam was Robert Byrd, hy was ‘n Klansman, ‘n leier van die KKK en daar is oor die 30 geboue, strate, skole ens. na hom vernoem, die Dems wil nie he die idiote wat ANTIFA opmaak moet agterkom wat vir wat is nie.

“Before his death, in 2010, Byrd was the longest-serving senator in the country’s history. Throughout his career he made many attempts to amend for drawing in 150 members to the Klan, and for attaining the position of “Exalted Cyclops.”

““Today our country has lost a true American original, my friend and mentor Robert C. Byrd.” ~Hillary Clinton

Nou word standbeelde van Washington, Columbus en ander beskadig, nes Trump gewaarsku het.

Rudy Maritz ·

Dr Sakkie, selfs met daardie droom van selfbeskikking gaan dit daardie betrokke groep polariseer. Byvoorbeeld, waar gaan ons bly? Moet ek my uitsig op Tafelberg opgee omdat ons anderkant die Boerworsgordyn moet bly? En andersom. Aan die teenkant, gaan ons dan einding met 99 provinsies inpleks van die 9, sodat ons elk in die 11 “amptelike” groeperings kan verdeel? Selfbeskikking is ‘n natuurlike proses, nie ‘n politieke proses nie. Die politieke prosesses moet egter so opgestel word dat daardie natuurlike proses (soort soek soort) kan plaasvind. Dit is blind om te glo ons is almal eenders. Ons is almal gelyk in die oë van die wet, (of so hoop ons), maar ons is geensins eenders nie. Selfs onder my eie volksgenote is daar die met wie ek nie wil assosieer nie. Wat ons in SA nodig het, is om die verlede te begrawe, en daardie selfde grawe te gebruik om met iets heeltmal anders voor ‘n dag te kom. Links en regs sal daar altyd wees. Maar die massas (draadsitters soos hulle genoem word) moet die land regeer met eendrag. Ek glo jy kan self daardie sin voltooi.

Reinhardt ·

Stem saam Rudy. Dit is beslis n natuurlike proses. En dit is immers wat vryheid is. Die vryheid om te kan kies saam met wie en wat jy wil woon en assosieer. Afrikaanssprekendes sal saambondel met tyd, dis reeds eintlik so te danke aan apartheid. Maar die verskil nou is die bruin afrikaanse gemeenskap gaan al hoe meer begin integreer met die wit Afrikaanse gemeenskappe en meer en meer gaan ons besef dat daar is geen verskil nie. Ons soek eintlik maar net mense wat ons taal praat en waardes deel.

Ek is n voorstaander van n federale sisteem, meer spesifiek die kanton sisteem van Switserland. Switserland is eintlik 26 klein landjies, elk met sy eie amptelike taak (meestal Duits, maar daar is wat Frans en Italiaans ook is), sy eie grondwet ens. Dit is wat ons moet doen. Ons kan dan byvoorbeeld die noordelike voorstede, die Paarl, Wellington en Stellenbosch (en waarskynlik al die klein gehuggies in die omgewing) saamsnoer om een kanton te vorm. Daar woon meestal Afrikaanssprekendes met eenderse waardes.

Henry ·

Ek aanvaar dat die Boereworsgordyn waarna verwys word, iewers noordwaarts van die Hexrivierberge is.

Wanneer iemand en veral Afrikaanssprekendes die beskrywing gebruik, vertel dit soveel meer van die betrokkene, dat kommentaar nie werklik nodig is nie, behalwe soms. :-)

Van vrye assosiasie gepraat, my pelle en ek raak opnuut verheug oor die feit dat ons nooit, ooit, deel van papsakland sal, of wil wees nie.

Vermeende ·

Demokrasie is n self vernietigende stalsel, demokrasie kan net in n homogene staat werk.
Demokrasie werk so, die grootste deel van n bevolking is baie laag geletterd, hulp behoewend en ruiklik beinvloedbaar.
Die kleinste deel van n bevolking is gemaklik af tot ryk, goed geskoold en is ook die dryfveer van n ekonomie.
Geen land kan vooruitgaan en bou wanneer die meerdeheid se stem meer in gewigtel in besluiteming oor belastings, wette en net eiese kan stel op die minderheid nie, hievan is SA n baie goeie voorbeeld.

Kom Ons Boks ·

Miskien moet slegs belasting-betalers stemgeregtig wees. Probleem opgelos.

Gideon ·

Uitstekende artikel, die hoefyster vergelyking is ‘n pragtige vergelyking. Wat pla oor die middel deel, en waaroor die linkses en regses eens is, is die kapitalistiese groep, wat geen morele waardes het nie, alles en almal misbruik vir eie gewin, hulle seile soos die wind span, in ‘n groot mate die media beheer en natuurlik goed gekamoefleer is.

Het jy iets op die hart? Maroela Media se kommentaarfunksie is ongelukkig gesluit oor die Paasnaweek. Kom kuier gerus later weer!

Nuuswenke kan deur hierdie vorm gestuur word.