Moet ons dan maar ANC stem?

Pres. Cyril Ramaphosa tydens die verkiesingsveldtog in Kaapstad. Foto: Henk Kruger/ANA

Baie mense dink dit sal goed wees om vir Cyril Ramaphosa se ANC te stem en hom sodoende meer mag te gee. Feit is Cyril is nie die ANC nie, dit sal steeds die Nasionale Uitvoerende Komitee en die korrupte kaders wees wat regeer.

In hierdie opsig is Zimbabwe ‘n goeie analogie. Emmerson Mganagwa het by Robert Mugabe as president oorgeneem, maar is ‘n groter duiwel as sy voorganger. Die leier het verander, maar die land word steeds deur Zanu-PF in die afgrond in regeer.

Kyk maar wie is nog hoog op die regerende party se kiesingslys. Mense soos

Nomvula Makonyane (omkoopgeld van Bosasa), Malusi Gigaba (onder eed gelieg en die land miljarde gekos met sy visumregulasies) is nommer 23 op die lys en die deurtrapte Bathabile Dlamini (meineed gepleeg oor haar rol in die Sassa-krisis) is op nommer 14.

Maar natuurlik is nog nie een van hulle deur ‘n hof skuldig bevind nie, wat in die ANC se oë beteken hulle is bevoeg. Intussen stel Ramaphosa die een kommissie en direktoraat ná die ander aan wie se bevindinge weer net sal neerkom op appèl ná appèl en eindelose vertragings, soos in die geval van Jacob Zuma.

Die volledige lys van korrupte kaders onder die boonste 200 is baie langer en Jacob Zuma se invloed blyk duidelik wanneer mislukte ministers soos Mosebenzi Zwane (waterwese) en Supra Mhumapelo (premier van die mislukte Noordwes-provinsie) weer hoog op die lys is. Daarteenoor het ondersteuners van Ramaphosa nie die lys gehaal nie, onder andere, ministers soos Michael Masutha (justisie) en Ebrahim Patel (ekonomiese ontwikkeling).

Nasionale gesondheid

Ons sien daagliks hoe ondeurdagte beleide en besluite aangekondig word, soos toe Tito Mboweni in sy begrotingsrede gesê het R717 miljard – nie miljoen nie – gaan vir die nasionale gesondheidsversekering (NGV) uitgerol word. Met watter geld?

Sal dit nie beter wees om eers die 85% staatshospitale en klinieke reg te ruk wat nie aan die basiese standaarde voldoen voordat nog gebou word nie? Nkosazana Dlamini-Zuma kla hoeka dat die grootste deel van die begroting tans bestee word aan skadevergoeding wat die gevolg is van nalatigheid in staatshospitale. Sy is die minister in die presidensie belas met monitering.

In Kimberley is ‘n hospitaal vir ‘n aanvanklike begroting van R300 miljoen gebou. Die prys het tot R2 miljard geëskaleer en op die openingsdag (1 Maart) was daar geen personeel en toerusting in die leë dop nie.

‘n Mens kan een hele artikel wy aan die probleme in Grahamstad, wat onlangs tot Makhanda herdoop is – een van die dinge waarmee die ANC wel uitblink. Behalwe wanbestuur, slaggatpaaie en versmorende rommel het die dorp ook ‘n allemintige waterkrisis wat die gevolg is van swak munisipale bestuur. Daar is R170 miljoen begroot vir verbeteringe aan die Kleynhans-dam, maar geen sent is aangewend nie. Wat sou die nuwe naam hulle kos?

Wat Suid-Afrika nodig het, is haas onverkrygbaar in Afrika: Goeie leierskap. Die een gloeiende voorbeeld is dr. John Magufuli van Tanzanië, wat die verkiesing in 2015 met 58% van die stemme gewen het. Hy het sterk opgetree teen mense wat laat opdaag vir vergaderings, gesorg dat hospitale beddens kry, reise en buitensporighede ingekort en op die onafhanklikheidsdag toegesien dat almal werk en die rommel optel. Dis dalk die moeite werd om weer te gaan lees hoe dinge gedoen moet word.

Suid-Afrika se probleme strek veel verder as Eskom en Kie. Die land het net minder as 58 miljoen mense en die bevolking styg met 900 000 per jaar. Een sesde van die bevolking is immigrante en 110 000 bekwame wit mense het die land al verlaat (bekwaamheid en die nodige kapitaal is die voorwaarde vir emigrasie).

Volgens die Financial Mail word 200 000 werkgeleenthede jaarliks geskep, maar dis maar die helfte van wat nodig is om die ekonomie te stimuleer, armoede te verminder en op ongelykhede in te haal. Volgens Business Tech is Ramaphosa die twaalfde bes betaalde wêreldleier. Sy netto salaris is R3,9 miljoen per jaar, wat meer as R1 miljoen meer is as wat Theresa May van Brittanje huis toe neem.

Terloops, onse Cyril is ook die man wat in 2015 onderneem het om Eskom reg te ruk.

Vir wie stem jy dan?

Om terug te keer na die begin: Vir wie stem ‘n mens as dit nie vir die ANC is in die hoop dat dit in Ramaphosa se broek sit om die party goed te laat regeer nie? Hy het darem al ‘n klompie veranderinge gemaak.

Volgens die jongste Ipsos-peiling gaan die ANC landwyd 61% van die stemme lok, wat meer is as in die vorige verkiesing se 56%. Die DA kan 18% stemme lok en die EFF 10%,

Om nie te stem nie is ‘n lamsakkige vermorsing van jou burgerregte. Stem ‘n mens dan vir die DA in die hoop dat hy in koalisies die remme vir vergrype kan aandraai? Dieselfde party wat Tshwane en Johannesburg saam met die uiters radikale EFF bestuur? Wat ietsie vir almal wil wees en min voel vir wit mense en nog minder voel vir Afrikaans?

Of vir die VF+, wat hoop om sy nasionale setels tot 8 te verdubbel en darem nie skaam is om vir Afrikaanse mense oor kleurgrense te veg nie?

Ons het nog vyf weke om te besluit.

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ʼn vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Kommentaar word ná 48 uur op ʼn artikel op Maroela Media gesluit. Kom kuier gerus verder op ʼn meer onlangse artikel.

51 Kommentare

jongste oudste gewildste
LK

Dit gaan nie oor wie of wat nie. Ons moet stem vir iemand wat ons land gaan omdraai en dinge beter maak. Ons almal stem vir een of ander klein party wat nie eers ‘n setel in die parlament gaan kry nie. Ons moet besluit gaan ons verdeeld bly of gaan ons stem vir dit wat ons almal bevoordeel. My eerlike opinie, ek gee nie om wie die land regeer nie, al waaroor dit gaan is vir elkeen van ons ‘n plekkie in die son en oorlewing. Ons almal trek swaar nie net wit of swart of bruin nie. Baie… Lees meer »

willem Botha

VF + sal my stem kry vir die eerste keer nadat ek my DA hemp verbrand het.

Ria de Kock

Ek stem nooit ooit vir ANC en klaar met DA ook. VF+ kry ons stem hierdie keer.

Leon

Ons almal stem DA, met 8 setels sal die VF+ net mooi niks kan bereik nie, en ons weet dit almal. Dit gaan nie help nie as ons, ons afsonder van die res van SA se mense.

Jan

Ek stem saam, stem ook DA