’n Geslote brief aan die wit linkses

skryf

Foto: Pixabay.com

Eugene Brink skryf ‘n ‘geslote brief’ na aanleiding van die uitlatings wat gister by die Universiteit van die Witwatersrand se sentrum vir diversiteit-studies gemaak is tydens ‘n dinkskrum getiteld “Herdink die Afrikaner-identiteite; ‘n interaktiewe dialoog“:

Aangesien dit nou so fatsoenlik geraak het om “ope briewe” oor of aan mense te skryf, gaan ek nou ook my eerste een probeer. Hierdie een gaan egter nie slegs aan een persoon gerig word en so wyd moontlik versprei word soos ’n ope brief nie, maar aan ’n hele groep met wie ek meer intiem wil gesels. Daarom noem ek dit eerder ’n geslote brief, want dis ’n soort siekbed-gesprek tussen mense wat vertroud is met mekaar. Geen seepkis word dus benodig nie.

Dit is gerig aan die linkse wit groepering van goed opgevoede, swakker opgevoede en dan ook totaal onopgevoede Afrikaanse mense (soos soveel ander name, haat hulle mos die term Afrikaner, so uit respek sal ek dit dan nie gebruik om na hulle te verwys nie) wat hulle dit aanmatig om namens alle witmense en Afrikaners in Suid-Afrika te praat of ongekwalifiseerde, ongesofistikeerde en haatdraende stellings oor witmense en hul rol in die land te maak.

Julle skuil oral in obskure én prominente rolle by universiteitsdepartemente en probeer julle eie bestaan daar regverdig deur haatspraak jeens witmense en spesifiek Afrikaners in openbare forums te pleeg. Sommige van julle is kunstenaars en werk ook in die media en by uiters irrelevante dinkskrums en eien julle daarmee die reg toe om die monopolie op kennis te hê. Julle hoop om eendag onthou te word en genade bewys te word wanneer die EFF en ander skurk-organisasies die universiteite en die land in vlamme wil laat opgaan en wit gesigte met swart gesigte vervang word.

Julle sit in ivoortorings en kyk as’t ware neer op almal in die land – wit én swart – en preek dan vanuit ’n hoogte na die “gepeupel” wat nog nie die “ware lig” gesien het nie. Ek weet nie of julle werklik altruïstiese bedoelings met julle dade het nie, maar dit kom tot uiting op ’n manier wat niemand baat nie. Dit het beslis nie die gewenste uitwerking om hierdie land met sy tallose probleme op te bou en te rehabiliteer nie.

Julle is die filosowe van hierdie wêreld, of so dink julle. Julle leef in totaal abstrakte wêrelde waar daar geen waarheid behalwe julle eie is nie. Feite maak ook kwansuis nie saak nie, want hoekom sal feite dan nou ’n lekker storie (sofisme?) bederf? Julle bepleit enersyds die uitwissing of ten minste die verdrywing van alle wit mense in Suid-Afrika, maar julle het self slegs wit vriende en het nog nooit een stuk liefdadigheid of weldaad op jul eie of deur middel van ’n organisasie soos ’n kerk of welsynsorganisasie gedoen nie. Nee, dis benede julle. Julle “opium” is polities korrekte gemeenplase of haatspraak teenoor wittes. Dit gaan natuurlik mos die land red of die wêreld ’n beter plek maak, of hoe? En dis dan boonop die smalste weg, want die wittes gaan jou nie in jou kantoor vaskeer en jou met die dood dreig as die volgende betoging uitbreek nie. Hulle is mos vergewende Christene wat glo in orde en vrede. Hoe gerieflik!

Vir julle maak dit nie saak dat duisende swartmense in Suid-Afrika vir Afrikaanse sakelui met besighede van tussen 1 en 50 werknemers werk nie. Nee wat, julle is te besig om in julle regeringskantore (ja, universiteite is regeringsdepartemente) te sit en die grootste deel van die dag koerant te lees, baie min werk te doen en aan julle volgende stuk anti-wit hoon te dink. Julle mors en teer tog te lekker op witmense se belastinggeld (ja, die geld vir universiteite moet van iewers af kom) waar julle as “tenured bureaucrats” tog so bang is julle eie witheid ontstel nie die rektore en dekane nie. En jammer, abstrakte en totaal bespotlike teorieë en drogredenasies gaan nie swartmense se armoede en uitdagings oplos of hul woede wegneem nie. Slegs deur nog te bou en te skep gaan dit gebeur, nie deur afbreek en haat nie.

As julle beveel dat alle witmense kulturele selfmoord moet pleeg en die land verlaat omdat daar nie plek vir ons in Afrika of Suid-Afrika is nie, kan ek voorstel dat julle self julle eie raad eerste volg? Dit moet sleg wees om so skuldig oor jou eie bestaan te voel dat jy jou eie uitwissing of verwydering sal voorstaan. Die vraag: Wat maak julle nog hier? Julle is tog immers wit en praat Afrikaans. Kan julle die eerstes wees om julle goed te vat en te trek dat die res van ons in die land kan aangaan om aan iets beters te bou? Ek weet ek sal bly wees dat my belastinggeld nie verder op julle “werk” gemors word nie.

Julle monde skuim omtrent wanneer julle uitasem ontken dat AfriForum nie namens julle praat of optree nie. Dis julle keuse en niemand het al ooit gesê AfriForum tree namens alle wit Afrikaanssprekendes op nie. Maar julle kan dit nie vinnig genoeg ontken nie en beskryf dit as “’n gevaarlike en gewelddadige organisasie” – en dit sonder enige bewyse. Die feit is, AfriForum tree wel op namens ’n groot groep van hulle en hulle hulp word doelbewus aangevra terwyl ander mense weer onwetend (en onbetalend) die vrugte daarvan pluk. Die chaos sou nou nog steeds by die Universiteit van Pretoria geheers het as Solidariteit en AfriForum nie op ’n hoë vlak met die ANC beraadslaag en die chaos ontlont het nie. Nie dat dit vir julle as “kenners” van menseregte en dergelike konsepte sal saak maak nie, maar vryheid van assosiasie is ’n grondwetlike en internasionaal erkende reg. Die feit is, Solidariteit en AfriForum het baie steun om te doen wat ons doen en niemand kan sê dat ons enigiemand op enige manier te na kom nie.

Julle kognitiewe dissonansie verstom my en dit is een van die skreiendste swakplekke in jul monderings. Sommige van julle vertel uit een mond hoe lief julle vir julle taal en kultuur is en bepleit dan terselfdertyd die afskaffing daarvan buite die huis. Hoe maak dit op enige planeet sin en hoekom nog die skyn wek dat julle vir Afrikaans en sy mense omgee? Dis soos om te sê: “Ek is mal oor koek en soek so baie daarvan, maar moet dit nog tog om hemelsnaam net nie verkoop of bak nie!” Dink julle regtig die huidige vlaag van geweld en die uitwissing van die Afrikaanse taal en kultuur gaan Afrikaans bevorder? Dink julle dit gaan net oor Afrikaans en dat die volgende eise deur die boewe nie julle eie poste in die gedrang sal bring nie? Kou bietjie aan hierdie vrae, maar ek dink nie ek gaan ’n eerlike of bevredigende antwoord kry nie.

Ek wil afsluit daarmee dat ek bekommerd is oor julle invloed by universiteite en in die openbare domein. Julle sikofantiese gedrag en tekort aan enige vorm van kritiese denke is die sleutelfaktor om universiteite sentra van onuitnemendheid te maak en die land in ’n middelmatigheid en selfs rassekrisis te dompel. Waar universiteite, koerante en openbare debatte kritiese denke moet aanspoor en ruimte vir afvallige menings moet skep, is julle besig om die teenoorgestelde te bewerkstellig. Eerder as om julle geliefde “diversiteit” in die hand te werk, werk julle hard om die wêreld in ’n monolitiese, grys en steriele eenheid te smee waar daar geen debat, meningsverskil of alternatiewe stemme gehoor kan word nie.

Moet my asseblief net nie daarby insluit nie, want julle is geensins my gevolmagtigde nie en ek het baie meer selfrespek as dit. En moet my asseblief nie weer bel of kontak – soos etlike van julle al telkens gedoen het – as julle vir wit studente, vriende of familielede werk by die Solidariteit Beweging weens regstellende aksie en swart ekonomiese bemagtiging soek nie. En as julle julself vir “geen klasgeld” beywer en op meer sosialisme aandring, begin dan om heel eerste julle eie inkomste op te offer. Ek was eerlikwaar my hande in onskuld aan julle aandadigheid.

Ek kan nog baie skryf, maar kom ons los dit daar. Glo dit of nie, ek het eintlik regte werk om te doen. Werk wat nou ’n positiewe en tasbare verskil aan mense se lewens maak en iets wat die Here (ja, Hy bestaan) my geroep het om hier en in hierdie tydvak te doen.

Hierdie plasing is deur ʼn onafhanklike persoon of onderneming saamgestel. Die menings en standpunte wat in hierdie skrywe uitgespreek word, is nie noodwendig die beleid of standpunt van Maroela Media se redakteurs, direksie of aandeelhouers nie. –Red

Eugene Brink

Meer oor die skrywer: Eugene Brink

Dr. Eugene Brink is ’n strateeg en politieke ontleder.

Deel van: Meningsvormers

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ʼn vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Kommentaar word ná 48 uur op ʼn artikel op Maroela Media gesluit. Kom kuier gerus verder op ʼn meer onlangse artikel.

52 Kommentare

jongste oudste gewildste
Antoinette

Baie dankie! Dit is so raak gesê, maar of dit deur hulle gelees gaan word is ‘n ander saak. Dis mos ‘n skande om in Afrikaans te lees.

Sarel Strydom

Baie raak beskrywing van ‘n die groep wat blykbaar nou nog deel in die “jammer ek is ‘n Afrikaanssprekende Suid-Afrikaner”.

fransie

Dankie !!

Trolle

Dankie alles waar wat jy se dink die probleem is die lingses is lafhartige mense wat te bang is vir probleme nou gaan hulle maar saam met die stroom minwetend aan die einde van die stroom is n helse waterval waanvan hulle op die ou einde nie van sal kan ontsnap nie.
Hulle is gewoonlik ook mense wat nie omgee vir hulle kinders se toekoms nie dink net aan hoeveel geld hulle nog kan maak.Kinders kan maar eendag self sien en kom klaar.

Judean Jansen van Vuuren

Dankie tog daar is mense wat nog om gee vir ons. Ek is ‘n trotse lid van Solidariteit. My vraag is net; Die Universiteite waarop almal soos aanspraak maak is gebou en instand gebring deur die blankes en baie Afrikaans sprekende mense in SA en hiermee ontken ek nie deel wat swartmense bygedra het met die bou daarvan maar dit was die blanke Suid Afrikaners se breinbaba. As julle nie in Afrikaanse wil leer nie, bou julle eie Universiteit en baklei om in julle taal onderrig te word, dis jou reg, maar hou op om ons reg te ontken.!!Waar sou… Lees meer »