Om mure te bou: Boos of uit selfbehoud?

vsa-mexiko-grensmuur

Mense by die see langs die grensdraad wat Mexiko van die VSA in Tijuana skei. Foto: Wikimedia.org

Die media en ook talle politici is tans in rep en roer oor die beoogde bou van ʼn grensmuur tussen die VSA en Mexiko, een van pres. Donald Trump se verkiesingsbeloftes. Die burgemeester van Berlyn in Duitsland, Michael Muller, het só ver gegaan om te sinspeel dat hier weer ʼn bose verlede, wat simbolies deur die afbreek van die Berlynse Muur eintlik agtergelaat is, in die vorm van ʼn muur wat mense skei, herleef.

Die Berlynse Muur is in 1961 deur die kommunistiese regering van Oos-Duitsland, oftewel die “Duitse Demokratiese Republiek”, reg deur deur Berlyn gebou en het ʼn groot stad in twee ideologiese helftes verdeel, vriende en familie van mekaar geskei en natuurlike wisselwerking en beweging onderbreek. Die argument vir die bou van die muur deur die kommunistiese regering was om hulle te beskerm teen ʼn aanval uit die Weste, maar inderwaarheid is die muur gebou om hulle eie mense in te hok en te keer dat hulle na die Weste met sy vryheid en beter lewensomstandighede trek. Toe die muur in 1989 geval het, was almal behalwe stoere kommuniste daaroor bly. Die simboliek van die Berlynse muur is baie sterk, en daarom word dit ook hier deur teenstanders van die Mexikaanse grensmuur gebruik om Trump as iemand daar te stel wat mense wat saamhoort, wil skei en wat ons wil terugdwing na ʼn slegte verlede wat eintlik oorkom is.

Die vergelyking is egter skeef. Daar is mure wat mense wat bymekaar hoort, op grond van ideologie van mekaar skei, soos, behalwe die Berlynse Muur van weleer, die muur oftewel grens tussen Noord-en Suid-Korea. Net soos met die Berlynse Muur word hier ook mense nie uitgehou nie, maar in ʼn tronk gehou. Verreweg die meeste grensmure in die geskiedenis het egter die doel gehad om mense te beskerm teen aanvallers van buite, nie om mense in te hok of om vreedsame betrekkinge soos handel en reis te verhoed nie. Bekende voorbeelde is die Chinese Muur, wat die barbaarse Mongole (ten minste vir ʼn lang tyd) weerhou het om die gevorderde Chinese beskawing te vernietig. Ook die Romeinse grens, die limes, het relatiewe vrede en voorspoed en ontwikkeling binne die uitgestrekte Romeinse Ryk vir honderde jare verseker. In die Middeleeue, waar staatsgrense grootliks verval het, moes stede stadsmure bou om hulle te beskerm teen aanvalle. Meer onlangs, het die muur tussen Israel en die Palestynse gebiede terroristiese aanvalle aansienlik laat afneem.

Mure is nie ʼn ideale toestand nie, maar ons lewe nie in ʼn ideale wêreld nie. Net iemand wat dink dat alle mense inherent goed en gelyk is, kan beweer dat grense sleg is. Ook die Europeërs, wat nou so veel te sê het oor die Mexikaanse muur, het hoë, bykans ondeurdringbare heinings opgerig waar Europa en Afrika op mekaar tref, in die Spaanse enklaves Ceuta en Melilla in Noord-Afrika. Terloops, as jy ʼn muur moet bou om mense in te hou omdat almal wil vlug, doen jy iets verkeerds in jou land, en as jy een moet bou om hulle uit te hou omdat almal na jou land toe wil kom, doen jy iets reg. Dalk moet Mexiko, eerder as om die bou van die muur te kritiseer, vra hoekom hulle mense nie in hulle eie land wil bly nie.

Behalwe vir tronkmure word eintlik alle mure gebou om ongewensde elemente uit te hou. Enige huiseienaar in Suid-Afrika omhein sy erf om goeie redes. Daar was tye in die verlede toe mense se erwe oop was, omdat die grense effektief bewaak is, maar in vandag se tyd kan ʼn mens dit nie meer doen nie. Ironies genoeg, hoe meer staatsgrense verval en geen effektiewe grensbeheer meer plaasvind nie, hoe meer is individue gedwing om mure om hulle eie erwe op te rig. Terwyl die groot mure verdwyn, vermenigvuldig die talle mure om erwe, komplekse en woonbuurte. Diegene wat skreeu teen die grensmuur met Mexiko moet hulle afvra of hulle bereid is om hulle eie erf se heining te verwyder en om hulle erf ʼn kuierplek vir boemelaars te maak (om van inbrekers nie te praat nie).

Waar mure saamgaan met natuurlike grense, soos historiese en etniese grense, skep dit gewoonlik vrede en vreedsame naasbestaan, terwyl daar waar geen grense meer bestaan nie, gedurige konflik heers. Uit ons eie geskiedenis is die voorbeeld van die Oosgrens by die Visrivier goed bekend. Juis omdat daar geen duidelike grens was om te keer nie, het mense heen en weer op mekaar se gebied oortree en was daar gedurig konflik, tot die Voortrekkers geen ander kans meer gesien het as om te trek nie.

Die Mexikaanse muur, soos enige normale grens, sal nog steeds mense wat wil reis, familie wil besoek, handel wil dryf of wettiglik wil werk, toelaat om dit te doen. Dit sal wel onwettige immigrasie, misdaad en dwelmhandel keer. Net diegene wat laasgenoemde wil doen, het ʼn rede om kwaad te wees oor die muur.

Hierdie plasing is deur ʼn onafhanklike persoon of onderneming saamgestel. Die menings en standpunte wat in hierdie skrywe uitgespreek word, is nie noodwendig die beleid of standpunt van Maroela Media se redakteurs, direksie of aandeelhouers nie. –Red

Sebastiaan Biehl

Meer oor die skrywer: Sebastiaan Biehl

Sebastiaan Biehl werk tans as ʼn analis in Berlyn, Duitsland. Hy is ook ʼn skrywer van romans en reisbeskrywings in sy vrye tyd en was op ʼn tyd (2001-2005) ook vir Solidariteit se media-afdeling werksaam. Sy kwalifikasies is BA algemeen, BA Hons (Politieke Wetenskap) en MA Politieke Wetenskap by Bloemfontein en RAU, onderskeidelik. Sebastiaan se gebiede van belangstelling is veral politiek, geskiedenis en reis.

Deel van: Meningsvormers

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ʼn vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Kommentaar word ná 48 uur op ʼn artikel op Maroela Media gesluit. Kom kuier gerus verder op ʼn meer onlangse artikel.

24 Kommentare

jongste oudste gewildste
SANNA

en wat gebeur as hull net om die muur swem?

Julie

Selfbehoud, as SA lankal ‘n muur gebou het tussen SA en Zimbabwe en SA en Mosambiek was hier nie XENOFOBIA in SA nie, ook nie uitlanders wat misdade pleeg en die ‘locals’ se werk afneem nie. Ongelukkig is die persone wat uit Zim en Mozambiek hier aangekom het NIE almal wettig nie. SA spandeer miljoene ‘n jaar om aan hierdie mense huisvesting te probeer verskaf, hulle aansoeke aan te hoor of uiteindelik te deporteer, net om te sien hulle is binne ‘n week weer terug. Hoekom het ‘n onwettige emigrant uit ‘n ander land (waar hulle demokratiese regerings INGESTEM het)… Lees meer »

Hendrik

‘n Muur om my woongebied is goed, want ek bly tussen my eie kultuurmense met dieselde waardes. Ander mense is nie daar welkom nie. Daar is gemeenskaplike areas soos die werk en winkels waar mure nie nodig is nie. Eenvoudige konsep om konflik te vermy.

swart

Ek het geen probleem met ‘n muur nie- dit hou die kwaad uit. Net kwaaddoenners sal oor ‘n muur kla.’n Muur by ons – tussen SA en Mosambiek en Zim sal goed wees want dan sal die stropery afneem en baie sal ‘n werk het deur om die muur te bou en baie sal kan werk deur om die muur instand te hou en nog ‘n lot sal ‘n werk he omdat hulle die muur moet patrolleer. Ook sal ongewenste elemente soos ‘drug- handelaars” dit moeiliker vind om ons land in te kom.Ek stem vir ‘n muur – maak nie… Lees meer »

JC

Ek is nou al redelik moeg vir hierdie debat. Die muur gaan gebou word, kom wat wil.
Wat het geword van nasiestate se soewereiniteit indien daar die heeltyd tot vervelens toe gedebateer word hieroor? Wat ons nou weet, is dat nasies se sowereine reg om hul grense te beskerm nog soos altyd belangrik is asook die reg om absolute beheer uit te oefen oor wie hul land binnekom en klaar, soos daargestel deur die Amerikaners wat President Trump verkies het, welke belowe het hy gaan die muur bou.