‘Ons bly betrokke in dialoog en die soeke na oplossings’

Cyril Ramaphosa

Pres. Cyril Ramaphosa. (Foto: GCIS)

In ʼn geskiedkundige oomblik het pres. Cyril Ramaphosa die 100-jaarvieringe van die Afrikanerbond op 7 Junie 2018 in Paarl toegespreek. Deur die bywoning en toespraak by die geleentheid sluit Ramaphosa aan by die geledere van mnre. Nelson Mandela en Thabo Mbeki wat by vorige geleenthede die Afrikanerbond toegespreek het.

In 1707 verklaar Hendrik Biebauw in Stellenbosch “Ek is ʼn Afrikaner.” Tydens die besprekinge van die Bondsraad van die Afrikanerbond het ons ons plek in Suid-Afrika ook opnuut herbevestig. Ons kon opnuut verklaar dat ons Afrikaners is, maar ook Suid-Afrikaners en ook mense van Afrika. Die Afrikanerbond wat sy begronding vind in Christen-demokrasie, erken ook opnuut dat ons deel is van ʼn diverse Suid-Afrika met ʼn veelheid van tale, gemeenskappe en kulture en dat ons strewe na vryheid binne ʼn regverdige bestel. Ons weet dat ons as Afrikaners onsself nie kan isoleer of kan losmaak van Suid-Afrika, sy probleme en sy uitdagings nie.

Tydens sy toespraak herbevestig die president opnuut die besondere identiteit van Afrikaners deurdat hy sê: “Afrikaners is deur hul naam en per definisie van Afrika. Afrikaners is integraal deel van die Suid-Afrikaanse nasie, net soos enige ander gemeenskap. Hul taal, kultuur, behoeftes en hul verwagtinge is nie minder of meer belangrik is as enige van die ander gemeenskappe nie.”

Dié standpunt moet verwelkom word, want daar het geweldige vervreemding ontstaan die laaste paar jaar.

In ons uitnodiging aan die president in Februarie vanjaar om ons Bondsraad toe te spreek, meld ons die noodsaak aan interaksie tussen die regering, politieke partye en die Afrikanerbond omdat daar belangrike kwessies soos onderwys en ekonomie landbou en grondbesit is. Ons uitnodiging was juis om eerstehands van Ramaphosa te hoor wat sy standpunte oor die kwessies is.

Baie van hierdie uitdagings is wel deur Ramaphosa in sy toespraak by die Afrikanerbond uitgelig. Alhoewel ons meer besonderhede wou verneem oor van die kwessies wat ons veral onrustig maak, is die geleentheid geskep vir verdere gesprek. Onder meer het die Bondsraad tydens sy daaropvolgende besprekinge onsekerheid oor die grondkwessie en besorgdheid oor Afrikaanse onderwys uitgespreek. Alhoewel daar in breë trekke deur die president na die kwessies verwys is, is daar nog groot onduidelikheid.

Omdat die Afrikanerbond nog altyd oplossingsgerig gestaan het ten opsigte van die probleme en uitdagings het ons onself opnuut bereid verklaar om deur dialoog betrokke te bly in die vind van oplossings en sal ons bly beding met ʼn regering wat die Suid-Afrikaanse grondwet van toepassing moet maak vir alle mense in die land.

Ons is terdeë bewus daarvan dat daar kritiek op die Afrikanerbond is wat nie namens alle Afrikaners kan praat nie. Dit het ons nog nooit voorgegee nie en sal ons die rol ook nooit opeis nie. Ons lede is egter almal Afrikaners en dit is op dié grondslag wat ons ʼn rol wil speel omdat ons lede se belange strek oor verskeie sfere van die samelewing.

Ons wil ook graag langs dié weg opnuut ons dank en waardering teenoor Ramaphosa uitspreek dat hy, te midde van ʼn polities onsekere tyd, wel gekies het om met die Afrikanerbond in gesprek te tree en sy visie met ons te deel.

Ons sien uit na toekomstige gesprekke om ons visie met hom te deel.

Hierdie plasing is deur ʼn onafhanklike persoon of onderneming saamgestel. Die menings en standpunte wat in hierdie skrywe uitgespreek word, is nie noodwendig die beleid of standpunt van Maroela Media se redakteurs, direksie of aandeelhouers nie. –Red

Jan Bosman

Meer oor die skrywer: Jan Bosman

Jan Bosman is Hoofsekretaris van die Afrikanerbond.

Deel van: Meningsvormers

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ʼn vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Kommentaar word ná 48 uur op ʼn artikel op Maroela Media gesluit. Kom kuier gerus verder op ʼn meer onlangse artikel.

42 Kommentare

jongste oudste gewildste
jcwf

Ja, hierdie standpunt moet verwelkom word.

Maar ek hoor die Feyenoord-lied op die agtergrond:

“..geen woorden, maar daden…”

Paul

En wanneer gaan daar eendag duidelikheid oor die grondkwessie wees? Dit bly gesels maar die antwoorde bly vaag, Dit stap van die een konfirensie na die volgende en dit pas hulle om die ander aan die raai te hou, want hulle het self nie duidelikheid nie, maar ten minste hou hulle die ander op die tone.

John

Die woord skynheiligheid staan mos reeds in die woordeboek? Wanneer is dit uitgedink en waar, maar verseker is dit nog nie uitgedien nie. Afrikaans bly maar oulik selfs al is daar hordes bonde in SA elk met groot ambisie en klandisie en oogmerke. Mind you, die Bybel het veel daaroor te se maaar nooit iets goeds nie.

dr. Sakkie van der Merwe

Ten spyte van al die gepraat is daar nog steeds “groot onduidelikheid”. Ek is bly dat die AB erken dat hul nie namens die Afrikaner kan praat nie maar dit was die AB (sien NP) wat in gesprek gegaan het met die ANC en uiteindelik die land weggegee het met groot beloftes van “eie” dit en “eie” dat.

Nasievisie Nasiestrategie Nasiesukses Vlakvark

Geagte mnr Bosman, ‘n Netjies geformuleerde stuk. Dankie.
Elke eerlike en opbouende strewe na reg en geregtigheid moet verwelkom word. Die Broederbond het ook ‘n opbouende rol te speel.
Kom ons formuleer as nasie ‘n Nasievisie en ‘n Nasiestrategie sodat ons as nasie gefokus kan saamwerk vir ekonomiese wêreldkompeteerbaarheid. Dan sal meeste van ons probleme langs die pad wegval.