Plaasmoorde in Suid-Afrika haal Nederlandse koerant

sylvain-ephimenco

Sylvain Ephimenco. Foto: Speakersacademy.com

Sylvain Ephimenco, ’n Fransman wat as rubriekskrywer vir verskeie Nederlandse koerante en ’n radiostasie optree, het hom hierdie week in die koerant Trouw oor plaasmoorde in Suid-Afrika uitgelaat. Die wrede moord op Annette Kennealy, wat hy as menseregte-aktivis beskryf, het hom geruk en geïnspireer om sy kuberpen oor die lot van blanke Suid-Afrikaanse boere in ink te doop. Hy draai nie doekies om nie.

Ephimenco is in Algerië gebore te midde van die onafhanklikheidsoorlog. By geleentheid het hy ’n massaslagting van wit mense aanskou, en dit het ’n blywende indruk op hom gemaak. Hy skryf in Frans en Nederlands.

Hy het die volgende in sy meningstuk oor die voorval geskryf: “Net gister het my blik op haar foto geval: Geliefdes het dit op haar Facebook-bladsy gedeel. ‘n Mooi vrou in haar vyftigerjare, glimlaggend in haar pers rok, met haar linkerarm leunend op die rug van haar stoel. Kennealy is gisteraand op haar Suid-Afrikaanse plaas vermoor.”

“Ek het gaan inloer op die Facebook-blad van hierdie menseregte-aktivis wat die afgelope jaar bekommerd was oor die lot van wit Suid-Afrikaanse boere. Die rekening was nog oop. Kennealy het Sondag om 09.49 twee boodskappe gepos. Ongeveer 24 uur voor haar dood. Die eerste het gelui dat tien plaasaanvalle binne vier dae plaasgevind het. Die tweede was dat 126 plase in Suid-Afrika aangeval is en dat van Januarie tot April 16 boere vermoor is.

“Die eerste boodskap bevat 81 antwoorde. Byna almal bevat meegevoel wat Kennealy nie kan lees nie. Ongemaklike surrealisme. Sy is Dinsdagoggend deur haar familie in ‘n plas bloed met ‘n verbryselde skedel gevind. Langs haar was ‘n hamer en ‘n ysterpyp. Of Kennealy vermoor is as gevolg van haar aktivisme, is onbekend. Sy het dikwels ‘n 9 mm Astra-pistool gedra, maar kon dit nie vir haar verdediging gebruik nie.

In Suid-Afrika word wit boere met onteiening bedreig, hul plase is aangeval en baie van hulle is brutaal vermoor, dikwels nadat hulle ure lank met boormasjiene gemartel is. Tans word ‘n plaas elke dag aangeval en ‘n boer word elke sewe en ‘n half dae vermoor. Die oudste slagoffer vanjaar was 88. Baie wit boere het die afgelope twee dekades geëmigreer en die Suid-Afrikaanse boerepopulasie het met sowat die helfte tot 30 000 gekrimp.

“Ek is herinner aan daardie jare van wrede apartheid toe die wêreld terselfdertyd teen die rassistiese regime gemobiliseer het. Nou is die wêreld stil. Daar is baie onverskilligheid in Suid-Afrika. En ook ‘n swart suprematistiese party genaamd Black First Land First (BLF) wat gelei word deur Andile Mngxitama, wie se slagspreuk op T-hemde lui: “Land or Death” (wat beteken: gee jou land en plaas aan swartes of sterf). Hierdie maand het Justisie die BLF gevra om sy slagspreuk te los, maar Mngxitama het geweier.

Ek lees op die NOS-nuusdiens se webwerf dat daar glad nie bewyse is dat moorde op blanke boere om politieke of ideologiese redes gepleeg word nie. En bowendien maak hulle jaarliks ’n fraksie uit van 19 000 ander moorde.”

Oorspronklike rubriek hier.

Hierdie plasing is deur ʼn onafhanklike persoon of onderneming saamgestel. Die menings en standpunte wat in hierdie skrywe uitgespreek word, is nie noodwendig die beleid of standpunt van Maroela Media se redakteurs, direksie of aandeelhouers nie. –Red

Herman Toerien

Meer oor die skrywer: Herman Toerien

Herman Toerien is ‘n veelsydige vryskutskrywer van Bloemfontein. Hy het ‘n Honneurs in Politieke Wetenskap, en kwalifikasies in Politieke Wetenskap, Staatsreg, Arbeidsreg en Ekonomie. Artikels en rubrieke uit sy pen het al in meer as 20 publikasies verskyn.

Deel van: Meningsvormers

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ʼn vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Kommentaar word ná 48 uur op ʼn artikel op Maroela Media gesluit. Kom kuier gerus verder op ʼn meer onlangse artikel.

12 Kommentare

jongste oudste gewildste
Boerboel

Hoop dit word nie net gelees nie ,maar begin druk op die regering te plaas.

Gemaskerde Sopbeen

Hy’s welkom om vir ‘n maand of so te kom kuier….ek sal vir hom sorg en hom ‘n paar goed gaan wys wat hy NIE op sosiale media sal lees nie….Hy sal dan lekker BAIE inligting hê vir sy rubrieke…

Kosie Kramer

Die Russiese Engelssprekende nuusdienste RT en Sputnik plaas gereeld artikels oor plaasmoorde. RT het selfs `n dokkie, waarin met oorlewendes gepraat word.

piet piet

Die beste nuus in n lang tyd plaas druk op die regering en voeg sommer die regering se diskriminerende wette teen die minderhede by waneer word dit geskrap of het hulle n 1000 jaar nodig.

Therese van Schalkwyk

Ernst Roets se “Kill the Boer” moet beslis wyer gelees word in die stamlande.
Verblydend dat Ephimenco kans sien om te skryf oor hierdie tragiese onderwerp, op ‘n reguit manier wat Afrikaanse en Engelse hoofstroom-joernaliste nooit doen nie.
Hy is reg oor die “onverskilligheid” wat heers in Suid-Afrika, ‘n algemene apatiese afgestomptheid wat ontnugter. Selfs nie die geteikende groep het eenstemmigheid hieroor nie.
Die vyandiggesinde organisasie, “African-European Indaba,” o.l.v. Johan ‘Sloet’ de Villiers is boonop in Amsterdam gesetel, vanwaar hierdie gewese Suid-Afrikaner en sy helpers vurige veldtogte voer om enige bewusmakingspogings uit SA in die wiele te ry.
Wil jy nou meer!