PW Botha was nie ál Krokodil nie

Toekomsberaad-Flip-Buys

Flip Buys, voorsitter van die Solidariteit Beweging. Foto: Reint Dykema.

Die DA se hantering van een van sy senior leiers, Dianne Kohler-Barnard, laat opnuut vrae ontstaan oor die land se vertolking van die verlede. Die NP van oudpres. PW Botha word deesdae alleen verantwoordelik gehou vir die politieke doodloopstraat van die tagtigerjare. Daarteenoor word die ANC se rol in die destydse vertraging van ’n grondwetlike skikking totaal onderspeel. Die ANC se uitgesproke strategie was om nie aan politieke onderhandelinge deel te neem voordat die regering só verswak was dat die gesprekke net oor die oorhandiging van mag sou gaan nie. Die party het destyds nog grootskaalse steun van die Sowjetunie geniet en is eers tot onderhandelinge gedwing toe kommunisme in duie gestort het.

Die beste bewys van die ANC se aandeel in die politieke stagnasie was die ontmoeting van dr. Van Zyl Slabbert met die ANC in 1985. Daar het die ANC bevestig dat die gewapende stryd steeds sy amptelike beleid was. Onderhandeling is gesien as ’n proses waartydens die (verslane) regering die mag aan die seëvierende “demokratiese magte” sou moes oorhandig. Die ANC het ook nie destyds geveg vir ’n grondwetlike demokrasie en ’n vrye ekonomie nie. Die doel was om met ’n rewolusionêre oorname ’n “Oos-Duitsland in Afrika” te vestig. Mens kan maar net kyk wat van menseregte, burgerlike vryhede, en ’n moderne ekonomie in al die ander “demokratiese volksrepublieke” geword het waar die ANC se medebevryders hul sin gekry het. Die laaste uitgawe van die ANC-blad Sechaba in Desember 1990, gedruk deur die Erich Welnert-pers van die Oos-Duitse geheime polisie, die Stasi, het ’n foto van hul onversetlike kommunistiese president, Erich Honecker, op sy voorblad gehad. Die redaksionele kommentaar oor die goeie ANC-Oos-Duitse verhoudings betreur die verlies wat die bevrydingsbeweging ly met die verdwyning van die kommunistiese regime in Oos-Duitsland.

Botha-strategie

Die Botha-regering het geen sin daarin gesien om in sulke omstandighede te onderhandel nie. Daarom het hulle ’n vierbeen-strategie gevolg om die dooiepunt te verbreek. Die eerste been was die stelselmatige aftakeling en hervorming van die Apartheidsbestel. Die tweede stap was die begin van ’n proses van onderhandeling om gematigde swart mense in die regering te begin betrek. Die derde stap was om met grootskaalse swart ontwikkelingsprojekte en ekonomiese opheffing swart mense se lewe te verbeter. Die vierde been was om met die afkondiging van ’n noodtoestand die rewolusionêre toestand wat in dele van die land geheers het te onderdruk, in ’n poging om ’n klimaat te skep vir die hervormings om te werk. Hierdie strategie van die NP is bemoeilik deur die verskerping van die ANC se “People’s War”, wat op ’n gewelddadige oorname en die sabotering van vreedsame hervorming gerig was. Die Botha-regering se strategie om demokratiese swart plaaslike regering in te stel, het bykans totaal misluk deur ANC-gesinde ontwrigting en selfs aanvalle op die raadslede. Jare lange belastingboikotte het ook die beskikbare geld vir die ontwikkeling van hierdie gebiede gekortwiek, om nie van die skoolboikotte te praat nie. Die IVP-leier, mnr. Buthelezi, het die ANC vergeefs gewaarsku: Die strategie om die land onregeerbaar te maak, gaan veroorsaak dat die land ná sy oorname steeds onregeerbaar gaan wees.

Vanuit die Botha-regering se gesigspunt, het die ANC se weiering om te onderhandel voordat die magsbalans in sy guns was; die party se geweld en terreur; kommunistiese beleid, alliansie met die Kommunisteparty en noue verbintenis met die Sowjetunie, onderhandelinge wensdenkery gemaak. In die tagtigerjare was sowat driekwart van die ANC se Nasionale Uitvoerende Komitee lede van die SAKP.

Geweld

Teen die middel van 1990 het die geweld in die land onheilspellende afmetings aangeneem. Dit het gespruit uit die ANC se veldtog om mededingende swart groepe uit te skakel om só sy bedingingsposisie by ’n onderhandelingsproses te versterk. Die ANC se aandeel in die politieke geweld word vandag totaal onderspeel. In April 1992 het regter Goldstone ’n verslag uitgereik waarin hy tot die gevolgtrekking kom dat die “primêre oorsaak” van die geweld die “politieke stryd tussen ondersteuners van die ANC en die IVP” was. Vanaf September 1984 tot April 1992 is 455 mense deur die polisie gedood, teenoor 8 825 deur die opstandelinge. Altesaam 801 mense is lewend deur rewolusionêre aan die brand gesteek en verbrand.

Daar word deesdae aanvaar dat die noodtoestand en onderdrukkende maatreëls van die tagtigerjare bedoel was om swart mense te onderdruk en ortodokse apartheid in stand te hou. Maar die werklike doel was om wet en orde te handhaaf om vreedsame onderhandelinge moontlik te maak. So teenstellend soos dit mag klink, was die doel van die noodtoestand nie om apartheid af te dwing nie, maar om die omstandighede te skep waarin apartheid afgeskaf kon word.

ANC-aandeel in probleme

Dit kan nie betwis word dat die Botha-regering belangrike foute begaan het nie, maar die ANC se aandeel in die doodloopstraat kan nie oorgesien word nie. PW Botha was beslis nie die enigste “Krokodil” nie! Die vraag kan gevra word of die land nie ’n groot deel van die konflik van die tagtigerjare gespaar kon wees, as die ANC self ’n paar hervormings aan sy beleid en strategie aangebring het nie. Hier kan gedink word aan die verbreking van sy bande met die Kommunisme en die Sowjetunie, die afswering van geweld, die aanpassing van sy beleid om vir die outonomie van kultuurgroepe voorsiening te maak, en om in goeie trou die Botha-regering se aanbod te aanvaar om te onderhandel. Die ANC het egter ’n ander pad gekies en die strategie om die land onregeerbaar te maak dra nou nog wrange vrugte soos mnr. Buthelezi gewaarsku het. Die ANC-in-regering sit inderdaad met baie van die probleme wat die ANC-in-struggle help skep het. Kyk mens na die huidige radikalisering van die ANC, kan mens nie anders nie as om te vra of mnr. PW Botha dan heeltemal verkeerd was om die ANC te wantrou.

Nee, ek verlang nie na die verlede onder PW Botha nie, maar sien ook nie uit na ’n toekoms onder die ANC nie. Dis hoekom kulturele selfbestuur nodig is om te verseker dat ons nog ’n toekoms het.

Hierdie plasing is deur ’n onafhanklike persoon of onderneming saamgestel. Die menings en standpunte wat in hierdie skrywe uitgespreek word, is nie noodwendig die beleid of standpunt van Maroela Media se redakteurs, direksie of aandeelhouers nie. –Red

Meer oor die skrywer: Flip Buys

Flip Buys is voorsitter van die Solidariteit Beweging.

Deel van: Meningsvormers

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ’n vrywillige bydrae. Onthou – ons nuus bly gratis.

Maak 'n bydrae

Nou pra' jý

23 Kommentare

Alwyn Beetge ·

Uitstekend uit een gesit. Maak alles meer verstaanbaaar.

Winston ·

Pragtig. Dit is presies net so. Baie dankie dat van die oningeligtes dit ook kan lees. Vir n slag n stuk waarheid in n berig. Puik geskryf

Bruno Stef ·

Min of meer dieselfde paadtjie wat Abel Moserewa/Sithole/Ian Smith se regering in Rhodesia geloop het en in goederetrou n verkiesing ingegaan het wat die volle mag aan Mugabe oorhandig het.Dit het tot n Diktatorskap gelei soos die res van Afrika en dit bevestig Zuma se stelling dat die ANC die land sal regeer tot JESUS weer kom hulle gaan aan die mag vasklou ten alle koste.

Tascha ·

Netjies raakgevat in ‘n neutedop. Baie dankie dat geen party oorgesien word nie. Ja, ek stem saam dat die NP net soveel foute begaan het maar die ANC dryf nog altyd vorentoe om rasse haat te verskerp en hammer op die verlede instede daarvan om vorentoe te kyk. Ek was maar net ‘n dogtertjie toe al hierdie dinge gebeur het maar ek dink ook wanneer die ANC nie meer aan bewind is nie hierdie land ‘n beter kans sal hê om te oorleef en dit sluit egte kanse om oorlewing vir beide swart en wit mense in!

Stanley Robertson ·

Kan Afrivorum nie vir Dianne Kohler-Barnard ‘n pos bied, dat sy ophou verkleineer kan word vir eintlik net die “deel”, van die waarheid?

Loeis ·

Is sy nie die een wie so tydjie gelede gese het dat sy eerder Spaans as “that language” (Afrikaans) sal praat nie?

Ook, sy het om verskoning gevra dat sy die omstrede plasing gedeel het, al was elke woord daarin die waarheid. So, waarvoor presies moet daar vir haar iets aangebied word?

Afrikaner ·

Enige persoon wat na Afrikaans as n “bastard language “verwys moet hier padgee…REGTIG!!

chris ·

Wil jy nou wragtig ‘n adder in ons nuwe bed sit sodat die proses wat ons in die gemors laat beland het weer kan gedy.
Hoe kan jy met een uitspraak wat sy ook teruggetrek het aanvaar sy is nou goeie materiaal terwyl baie uitsprake die teendeel bewys?
Ag nee regtig dink nugter die DA doen presies dieselfde.
Een goeie ding en al die swakhede is oorgesien of vergeet.

Loeis ·

Uitstekende artikel, Flip Buys. Dis min dat mense ‘n ding se soos dit is.

Theresa ·

Dankie Flip – ek hoop jy lees al die komplimente en sien die vertroue wat jy skep. Jy is die naam leier werd, want jy het die nodige kennis en genoeg woema om als op so ‘n ordentlike manier aan te pak. Dit dwing respek af.

DewaldS ·

Goeie artikel, Flip Buys. Maar ek glo nie kulturele selfbestuur gaan ons juis help nie. Ons benodig eksterne selfbeskikking – eie grondgebied.

Mike ·

Stem heeltemal saam Dewald. Wat help alles as ons steeds onder ANC bewind gaan bly? Hulle gaan beslis nie net hande in die lug gooi en “hensop” nie. Hulle is in beheer en hulle gaan jou planne kelder met alles tot hulle beskikking, gaan ons dan net aanhou om miljoene rande aan regskostes te betaal?

Hoekom is daar nie tydens hierdie tyd reeds die opsie van selfbeskikking bespreek nie of gaan ons weer oor ‘n paar jaar vorentoe aan ‘n nader opsie moet dink. Wat wil ons nou eintlik hê want dit lyk of baie mense nie kan besef ons woon in Afrika nie.?

Piet ·

As hulle hierdie planne sou kelder soos jy sê, wat op dees aarde gaan hulle met jou selfbeskikking planne maak?
Soos jy sê: besef julle nie dat ons in Afrika woon nie?

Wicus ·

Mens eet ‘n olifant stukkie vir stukkie met goeie beplanning. Hierdie is goed deurdag en het kans op sukses, ons is besig om op te staan!

Maar, ons doodsteek was en is oa ons afhanklikheid van ‘vreemde’ arbeid, en aan wie verkoop ons ons huise, soos dit my lyk gee ons nie om as die prys reg is nie. Ons gaan sukkel om by die einddoel uit te kom as ons nie die twee aspekte aanspreek nie!

Chris ·

Wit mense moet verstaan hulle soek ons uit hierdie land uit, ons moet wakker en slim wees en
bo alles voorbereid op enige iets. As ons nou nog nie die skrif aan die muur kan lees nie is ons blind.

Ben de Klerk ·

Dankie Flip.
Ons moet nie net lof gee nie maar ook die hand in die sak steek
Kom ons help die mense

Bert ·

Was die ANC enigsins net ‘n bietjie bona fide met die onderhandelinge? Of was dit alles ‘n verneukspul?

Johan 2 ·

Piet (Croukramp? ) ja ons is in Afrika maar ons is ook op ons unieke manier deel van Afrika. Om in Afrika te wees beteken nie dat jy soos die massas moet wees nie. Ons hoef nie ons identiteit prys te gee nie, ons is nie Engelse, Duitsers, Xhosa of wat ookal nie ons is en mag Afrikaners wees. Ons oorlewing lê nie in “asimilasie” en vervreemding nie.

Gert Kruger ·

Dis nogal eienaardig hoedat tydsverloop gebeure uit sommige mense se geheues kan uitwis. Min mense besef blykbaar vandag wat P W Botha se aandeel in die huidige verdrukking van die Afrikaner/Boer is. Sy weiering destyds om voor die sg Waarheidskommissie te verskyn, en bereidwilligheid om eerder deur ‘n siviele hof gedagvaar en verhoor te word, was selfs deur regse politieke leiers hoog aangeslaan asof dit kon vergoed het vir sy misdade teen ons volk in die verlede. Diegene wat vergeet het hoe P W Botha Suid-Afrika in 1983 op die glybaan na rasse-integrasie geplaas het kan gerus weer die boek “DIE ANNEKSASIE VAN DIE VOLKSIEL” deur I J Strijdom lees. Daarin is dit duidelik dat P W Botha dieselfde rol in die oorgawe van die Afrikaner/Boer aan die moderne internasionaliste gespeel het as wat generaal Jan Smuts destyds gespeel het toe hy ons aan die Britse imperialisme oorhandig het.

In bg boek meld Strijdom dat die geskiedenis van die Afrikaner/Boer in hierdie land veral gekenmerk word deur die herhaaldelike oorname van politieke en staatkundige beheer deur hoofsaaklik twee moondhede nl Holland in die eertydse geskiedenis en later deur Brittanje. Hierdie twee moondhede, maar veral die Britse imperialisme, (“internasionaliste”) was hoofsaaklik die oorsaak en die rede waaraan en waarom die Afrikaner/Boer al die jare tot vandag toe, probeer ontsnap het. Die Groot Trek en dit wat in Natal daarop gevolg het asook die latere Boere-Republieke, is goeie voorbeelde daarvan.

Hierdie was ‘n “Stryd” wat deur die Afrikaner/Boer tot en met onafhanklikheid in 1961 gestry is waarná die meeste van hulle terug gesit het onder die valse waan dat die stryd iets van die verlede is. Vir hulle was die “internasionaliste” op daardie tydstip verslaan. Min het hulle geweet dat hulle (die internasionaliste) nie gaan lê het nie!

Soos genl Smuts in sy boek getiteld “‘N EEU VAN ONREG” wat in 1899 die lig gesien het en waarin hy die onreg wat die destydse Engelse Regering die Afrikanervolk aangedoen het op treffende wyse uitgebeeld het, en later dieselfde boek as gevolg van ‘n skuldige gewete en onder druk van die Britse imperialisme, laat verban het, het P W Botha dieselfde met apartheid, wat hy vir jare, ja selfs dekades vertroetel het as die enigste uitweg vir die blanke om in hierdie land te oorleef, gedoen, toe hy dit by verskeie geleenthede afgesweer en afgemaak het as iets bykans uit die Bose! (Sien HANSARDS van die Parlement).

Strijdom meld voorts dat algemeen bekende en erkende internasionaliste soos Rhodes en Milner sonder meer verbind word aan die fisiese anneksasie van die Afrikaner/Boer. Hierdie anneksasie het hulle voortdurend in opstand laat kom en die “nuwe geslag internasionaliste” gedwing om telkens van strategie te laat verander. In teenstelling met die goedgelowige Afrikaner/Boer het hierdie “nuwe geslag internasionaliste” en liberaliste reeds vroeg een van die duur lesse van die geskiedenis geleer, nl dat hulle wat nie uit die geskiedenis wil leer nie, gedoem is om die geskiedenis te herhaal. Uit hulle oogpunt kom dit basies daarop neer dat ‘n volk eers sielkundig of geestelik “geannekseer” moet word, waarna hy sonder om dit te besef, outomaties oorgee. ‘n Verdere les wat hierdie “internasionaliste” geleer het is om relatief op die agtergrond te bly want hulle besef dat as hulle eers geïdentifiseer is, hulle maklik geneutraliseer kan word.
Een van die wyses waarop die volk sielkundig en geestelik in Suid-Afrika ná Republiekwording deur die “nuwe geslag internasionaliste” geannekseer is, is sekerlik die moord op dr H F Verwoerd. In die lig van hulle bogenoemde modus operandi kan daar vandag bo redelike twyfel aanvaar word dat hulle doelbewus die moord op dr Verwoerd beplan en laat uitvoer het ten einde beslag aan hulle anneksasiebeleid te gee.

So het hulle hul kans afgewag tot kort na die 1977-verkiesing wat deur ‘n sterk politieke en party-eenheid onder Afrikaners gekenmerk was, toe hulle “gereël” het dat die sg “Inligtingskandaal” Suid-Afrika tref. Vandag weet ons dat dit ook doelbewus so beplan was sodat mnr John Vorster deur mnr P W Botha, wat meer vatbaar vir hulle internasionalistiese oogmerke was, vervang kon word. Daarna weet ons hoe hy John Vorster met ‘n bloedlose staatsgreep uit die kussings gelig het. Om hom nie so sleg te laat voel nie het mnr Botha hom darem die Staatspresidentsamp vir ‘n rukkie laat bekleë!

Om alles te begryp wat hierna gebeur het, kan daar maar slegs gelet word op wat P W Botha in sy ampstermyn gedoen en bereik het ten einde die Afrikaner/Boer in die moeras van ellende te dompel waarin ons tans verkeer!

Eintlik het hyself, soos John Vorster, die weg voorberei om deur ‘n liberaler leier vervang te word toe hy gedurende 1988 vir sy eie spook geskrik het. Op Geloftedag van daardie jaar, tydens die herdenkingfees van GROOT TREK 150 het hy en Adriaan Vlok met ‘n weermag helikopter oor Donkerhoek gery waar die feesvieringe plaasgevind het. Toe hy sien dat die volk dáár saamgetrek is en nie by die Voortrekkermonument waar hy vroeër die dag opgetree het nie, het hy so groot geskrik dat hy ‘n beroerteaanval gekry het. Die aanval was blykbaar nie so ernstig nie want hy kon kort daarna weer sy ampsverpligtinge oorneem. Dit is toe dat hy besef het dat hy op ‘n verkeerde pad is en ‘n stadiger pas met sy rasse-integrasiebeleid wou volg. Dit was egter vir hom reeds te laat en die skrif was vir hom toe reeds aan die muur, want sy “internasionale base” het reeds besluit dat hy sal moet gaan!

Hierna volg ‘n spel waardeur F W de Klerk die mag op ‘n tipiese Julius Caeser-wyse, maar met ‘n bloedlose staatsgreep, oorgeneem het. As mens hierdie drama ontleed dan is dit nogal opvallend hoe elkeen van daardie NP-politieke toneelspelers simbolies inpas by die eeu-oue toneelstuk van Shakespeare, nl Julius Caeser. Veral wat die onttroning van P W Botha deur F W De Klerk betref kan jy feitlik al die rolspelers soos Pik Botha ens., soos ‘n handskoen in bg stuk inpas.

Soos die “conspirators” van ouds moes vlug vir hulle lewens en in die vlaktes van Sardis en Philippi moes gaan skuil vir die wraak van die massas, so het F W, (soos P W) ook gevlug na die politieke vlaktes – veral ná sy besoek aan die buiteland vroeg gedurende 1997 toe hy aan sy “internasionale base” (die internasionaliste) bely het dat hy die blankes in SA uitverkoop het.

Indien mnr Botha gedink het dat hy deur ‘n siviele hof onder ‘n ANC/SAKP-regering wat hy deur sy liberale politieke beleid van hervorming en “gesonde magsdeling” in samewerking met die internasionaliste help skep het, vrygespreek sou word weens sy weiering om voor die WVK (Wraak-en-Vervolgingskommissie) te getuig, het hy net so ‘n mistasting begaan as wat hy al die jare begaan het toe hy in die hande van die internasionaliste met ons land se toekoms gespeel het!

Hein ·

My mening is gister van die forum gehaal en my voorstelle is uit ondervinding en was geensins rasisties van aard. My voorstelle werk want dit werk in praktyk. Ek het geen alarm, diefwering, veiligheidshekke en ‘n viervoet heining. Ewenaar dit

Wicus ·

is goed om na die verlede te kyk en daaruit te leer, maar helaas, wat verby is is verby. En ja, iemand het ges-e hy is nie bang vir wie voor hom is nie, maar wie langs hom is want jy weet nooit of hy jou in die rug gaan steek nie.
Die wat voor jou is kan jy immers identifiseer, die langs jou baie moeilik. Ongelukkig is ons geskiedenis besaai van verraaiers. Die vraag is wat doen ons nou, hoe kom ons uit die gemors.
Al help Solidariteit se plan ons net een tree na die regte rigting is dit ‘n goeie begin.

Ek raak egter bekommerd as ek na die deursnee Afrikaner kyk, ek sien nie baie vaandel draers nie,
en mense met ruggraat met ‘n suiwer doelwit is nou nodig.

My mening, begin klein, bou uit, die sneeubal effek, tree vir tree, en maak baie seker daar is nie ondermyners saam op die wa nie.

Wicus ·

is goed om na die verlede te kyk en daaruit te leer, maar helaas, wat verby is is verby. En ja, iemand het ges-e hy is nie bang vir wie voor hom is nie, maar wie langs hom is want jy weet nooit of hy jou in die rug gaan steek nie.
Die wat voor jou is kan jy immers identifiseer, die langs jou baie moeilik. Ongelukkig is ons geskiedenis besaai van verraaiers. Die vraag is wat doen ons nou, hoe kom ons uit die gemors.
Al help Solidariteit se plan ons net een tree na die regte rigting is dit ‘n goeie begin.

Ek raak egter bekommerd as ek na die deursnee Afrikaner kyk, ek sien nie baie vaandel draers nie,
en mense met ruggraat met ‘n suiwer doelwit is nou nodig.

My mening, begin klein, bou uit, die sneeubal effek, tree vir tree, en maak baie seker daar is nie ondermyners saam op die wa nie.

Henk Theron ·

Jammer dat jy dit in Afrikaans geskryf het Flip. Politieke gevegte word deesdae in Engels baklei, gepubliseer en gelees. Nogtans ‘n baie goeie stuk.

Het jy iets op die hart? Maroela Media se kommentaarfunksie is ongelukkig gesluit oor die Paasnaweek. Kom kuier gerus later weer!

Nuuswenke kan deur hierdie vorm gestuur word.