Reageer só op Malema

Grafika: Verskaf.

Bly kalm en stig ’n buurtwag!

Ek het die bedenklike voorreg gehad om in lewende lywe na Julius Malema se toespraak tydens sy onlangse hofverskyning in Bloemfontein te luister. Van die opruiende uitlatings wat hy gemaak het, was onder meer: “Afrikaner-boys, die poppe gaan dans. Die EFF kom vir julle.” Ook: “Ons is nie bang vir Afrikaners nie. Wit mense is bang vir die EFF.” As dit nie vir die polariserende aard van sy toespraak was nie, sou ek dit beskou het as een van die beste optredes deur ’n komediant voor ’n klein gehoor wat ek ooit gehoor het.

Malema moet besef dat geweld deur sy ondersteuners ’n reaksie sal uitlok wat uiteindelik tot nadeel van almal in die land sal strek. Hy moenie geweld romantiseer nie. Dit is nie romanties nie, want as jy begin skiet, gaan daar ook op jou geskiet word. Die werklikheid het ook gewys dat dié wat luidrugtig geweldpraatjies maak, die eerste is om weg te hardloop as moeilikheid uitbreek. Verder misgis Malema hom indien hy die selfbeheersing wat minderheidsgroepe tot dusver teenoor sy uitlokkende uitsprake getoon het, as swakheid beskou.

Die vraag is hoe Afrikaners en wit mense moet reageer op Malema se geweldpraatjies. Daar is drie opsies: Afrikaners en ander minderheidsgroepe kan dit ignoreer en afmaak as bloot politieke retoriek; in vrees verval; of kalm daarvan kennis neem en iets daaraan doen.

Probleme word nie opgelos deur dit net te ignoreer nie. Minderheidsgroepe in Zimbabwe het reeds die ignoreer-opsie probeer en die resultaat is daar vir almal om te sien.

Om in vrees te verval is ook nie ’n opsie nie, aangesien dit ’n verlammende uitwerking het. Ons is nie gebore om in vrees te leef nie. Dit is daarom belangrik dat almal wat vreesbevange raak oor Malema se uitlatings ’n oomblik stil staan en die werklikheid in perspektief sien. Die werklikheid is dat Malema en sy volgelinge ’n klein groepie is met meer blaf as byt. Die meerderheid mense in die land glo net soos AfriForum dat daar wedersydse erkenning en respek tussen gemeenskappe moet wees en hulle is nie voorstanders van geweld nie. Tydens die verkiesing het die EFF slegs sowat 8% van die stemme getrek. Dus het 92% van die stemmers nie vir die EFF gestem nie. Hoewel Malema graag voor die kameras dreigemente maak, het die werklikheid gewys dat hy nie die dreigemente doeltreffend op grondvlak uitgevoer kry nie. Só het Malema al gedreig om banke en grond grootskaals te beset. Daar het dadels van gekom. Wanneer ’n mens kyk na die aantal ondersteuners wat hy tydens sy optog van 2 November in Pretoria – asook tydens sy hofverskyning in Bloemfontein – kon mobiliseer, is die groep relatief klein. Die vermaaklikheidswaarde vir omstanders is groter as die werklike impak van die deelnemers.

Wanneer ’n klein hondjie jou bestorm hoef jy nie in vrees te verval nie. Maar jy kan hom ook nie ignoreer nie, want hy kan jou aan die hakskeen byt as jy wegkyk. Soortgelyk is die beste manier om op Malema te reageer om kalm kennis te neem van sy uitlatings, hom fyn dop te hou, voor te berei en stappe te neem dat hy nie figuurlik gesproke minderheidsgroepe aan die hakskeen kan byt nie.

Die stappe wat AfriForum neem om Malema se skade te beperk is tweeledig. Eerstens gaan AfriForum volstoom voort om Malema in die howe tot verantwoording te roep. Die wiel van die reg draai ongelukkig stadig, maar AfriForum is gereed om die pad enduit te loop. Benewens die klag van aanhitsing tot geweld waarvoor Malema in Bloemfontein in die hof verskyn het, is AfriForum ook tans besig om voorbereidings te tref om verskeie ander regsroetes te volg soos die verkryging van ’n hofbevel teen Malema se polariserende uitlatings en die voer van ’n saak in die gelykheidshof.

AfriForum is ook nie so naïef om te glo dat die howe al die probleme met Malema sal kan oplos nie. Meer is nodig.

Die laaste ding wat ons egter nodig het, is dat emosies oorkook en mense begin om soos cowboys die strate in te vaar om Malema “op sy plek te sit”. ’n Kalm, gedissiplineerde en welgeorganiseerde selfverdedigingsaksie is eerder nodig. Om jouself te verdedig teen aggressie is immers ’n basiese demokratiese reg. Daarom het AfriForum die afgelope tyd begin om pogings te versnel om gemeenskapsveiligheidsinisiatiewe soos buurtwagte landwyd tot stand te bring. Hierdie buurtwagte het natuurlik nie ten doel om in konflik met die EFF te tree nie. Dit is eerder ’n poging om ons gemeenskappe landwyd te mobiliseer om kalm binne die raamwerk van die wet misdaad te help bekamp en die veiligheid van gemeenskapslede en hulle eiendom te verseker. AfriForum het reeds 80 buurtwagte tot stand gebring wat volgens streng gedragsriglyne en noukeurig uitgewerkte stelsels reusewerk doen om misdaad te bekamp. Daar bestaan ook gesonde samewerking met talle ander buurtwagte en veiligheidsinisiatiewe wat nie deel van AfriForum se strukture is nie, asook met die Suid-Afrikaanse Polisiediens op nasionale vlak en in verskeie plaaslike gemeenskappe.

Soos enige skoolboelie sal Malema en sy ondersteuners fokus op diegene wat hy as kwesbaar beskou. Welgeorganiseerde buurtwagte sal wys ons gemeenskappe is nie kwesbaar nie en sal Malema twee keer laat dink voordat hy en sy ondersteuners tot onverantwoordelike optrede oorgaan. Binne die huidige omstandighede is buurtwagte dus ’n voorvereiste vir die handhawing van vrede en stabiliteit binne die raamwerk van die wet.

Mense wat bekommerd is oor hulle veiligheid word dus aangemoedig om kalm te bly en betrokke te raak by die buurtwagte in hulle onderskeie gemeenskappe. Indien daar nie een bestaan nie, stig een. AfriForum sal graag help daarmee.

Die Britse regering het in 1939 (in reaksie op die vrees wat oor die komende Tweede Wêreldoorlog onder die land se bevolking ontstaan het) mense tot kalmte geroep deur miljoene plakkate te laat druk met die tema “KEEP CALM and …”. Soortgelyk is AfriForum se beroep dat mense soos volg moet reageer op Malema: “BLY KALM en STIG ’n BUURTWAG.”