Stormloop deur Palestyne op Israel se grens

Palestynse Hamas-ondersteuners woon ’n byeenkoms by in Desember 2017 vir die 30ste herdenking van die bestaan van die Hamas-beweging in Nablus aan die Wesoewer. (Foto: Majdi Mohammed, AP)

Hamas, die radikale Palestynse politieke organisasie wat die outonome Gaza-strook beheer, het massas mense, vroue en kinders ingesluit, tot ’n “spontane” stormloop op die grensheining met Israel aangehits nadat daar eers kampe op die grens opgerig is waar hulle vir dae geïndoktrineer is. Dit was egter net ’n fraksie van die duisende “kampeerders” wat aan die stormloop deelgeneem het. Israel moes die aanval afweer, anders sou miljoene ander volg en die land sou vernietig word, ’n verklaarde doelwit van Hamas. Gewapende vegters was blykbaar reeds agter die “burgerlikes” in posisie om aan te val en die ongewapende aanvallers is as kanonvoer voorgestuur. Israel se soldate moes die stormloop afweer en in die proses is 13 mense gedood nadat hulle herhaaldelik gewaarsku is om nie nader te kom nie.

Die Palestynse propaganda het die aanval op Israel vertolk as ’n “terugkeer na ons grond” (sien die parallelle met die EFF se propaganda). Een van die mites van die Palestyne is die “reg tot terugkeer”.

Dit is histories ’n omstrede konsep. Hulle verwys na die feit dat hulle voor die Joodse intrekkers in die gebied van Israel daar gewoon het en ná die oorlog van 1948 – kort ná die onafhanklikheidsverklaring van Israel – wat die Palestyne en hul Arabiese bondgenote verloor het, verdryf is, of eerder, gevlug het. Om daaruit ’n reg op grond in Israel vir opvolgende generasies af te lei, is verregaande. Diegene wat aanval en die oorlog verloor, kan nie aanspraak maak op terugkeer nie, nog minder as daar Israeli’s woon wat die grond intussen ontwikkel het. Nogtans ondersteun die Verenigde Nasies in hierdie geval die Palestyne se aanspraak. Sou, byvoorbeeld, Duitsland eis dat Duitsers die reg het om Pole binne te val omdat daar meer as 70 jaar gelede Duitsers gewoon het wat as gevolg van die verlore Tweede Wêreldoorlog verdryf is, sou geen land dit ondersteun nie omdat feite nie ongedaan gemaak kan word sonder verdere leed nie. Boonop sal lande wat oorwinnaars van ’n oorlog is, hul grond nie weer aan die verloorder afstaan nie. Die beste is dat die lande versoen en mekaar se wedersydse misdade erken.

Allermins is terugkeer ’n ewige reg vir volgende generasies. Aangesien die Palestyne geweldig vermeerder het sedert 1948 sou die “reg tot terugkeer” Israel met miljoene Palestyne laat oorstroom wat die einde van die Joodse staat sou beteken. Die beskerming van jou grense is ’n internasionaal erkende reg, maar blykbaar geld dit nie vir Israel nie.

Die Palestyne en hul wêreldwye ondersteunersnetwerk is meesters op die gebied van emosionele propaganda, beter selfs nog as die ANC tydens die struggle. By hulle tel ’n lewe maar min as ’n mens kyk hoe hulle onder mekaar veg en verskillende organisasies en Islam-denominasies mekaar fisiek aanval, maar in die media kry hulle dit reg om altyd die arme, onskuldige slagoffer te speel. Talle Palestyne leef in armoedige omstandighede en ervaar ’n hardhandige behandeling deur Israel, maar die hoofverantwoordelike daarvoor is die Palestynse leierskap, wat in ’n siniese magspel hul eie mense as pionne gebruik.

Die opoffering van mense as pionne vir ’n “groter doel” is kenmerkend van radikale organisasies. Dink maar aan Mao se Lang Mars of die Groot Sprong wat miljoene menselewens gekos het. Op heelwat kleiner skaal was daar nader aan die huis Swapo se inval deur swak gewapende troepe in die destydse Suidwes-Afrika kort voor hul onafhanklikheid in 1989, of die ANC se binneval van die Ciskei om die leierskap te verwyder waar – willens en wetens – die lewe van ongewapende mense op die spel geplaas is om die verdedigers in die oë van die wêreld te blameer.

Net soos radikale “bevrydingsbewegings” het ook die Palestyne ’n strategie dat elke toegewing op ’n eis net beteken dat die doelpale geskuif word. Gaza en die Wesoewer het reeds outonomie, maar pleks om die geleenthede wat dit bied te gebruik, word die meeste geld wat veral deur internasionale organisasies ontvang word, gebruik om Israel op allerhande maniere aan te val.

Daar is egter ook ’n ander dimensie aan die konflik, naamlik die interne wedywering tussen die radikale Hamas en die meer gematigde Fatah.

Eersgenoemde beheer die Gaza-strook, laasgenoemde die Wesoewer. Beide eis Jerusalem as Palestynse hoofstad op en wil graag die hele Israel tot ’n Palestynse staat verklaar, maar kan nie eens die klein outonome dele saam bestuur nie.

Net soos die EFF probeer om met anti-blanke haat, grondeise en besettings teenoor die ANC punte te wen, probeer Hamas met besonder opspraakwekkende aksies teen Israel aandag te trek om onder Palestyne en internasionaal as hul verteenwoordiger te geld.

Dit volg nadat ’n onlangse samewerkingsooreenkoms tussen Hamas en Fatah kort ná die ondertekening weer verbreek is. Dit is alles pogings om die swak bestuur en korrupsie van die twee Palestynse gebiede te verdoesel deur die ewige sondebok, Israel, te bemoei. Hamas is deesdae selfs in die Arabiese wêreld geïsoleerd, ook deur sy suidelike buurstaat en eertydse ondersteuner, Egipte, en probeer met dié soort aksies aandag te trek.

Hierdie jaar is ook die 50ste herdenking van Israel se onafhanklikheid en Hamas wil met die stormlope volhou.

Hierdie meningstuk is deur ʼn onafhanklike persoon opgestel. Die menings en standpunte wat in hierdie skrywe uitgespreek word, is nie noodwendig die beleid of standpunt van Maroela Media se redakteurs, direksie of aandeelhouers nie. -Red

Sebastiaan Biehl

Meer oor die skrywer: Sebastiaan Biehl

Sebastiaan Biehl werk as navorser, argivaris en toergids vir die Orania Beweging in Orania, is ʼn skrywer van romans en reisbeskrywings in sy vrye tyd en was op ʼn tyd (2001-2005) ook vir Solidariteit se media-afdeling werksaam. Sy kwalifikasies is BA algemeen, BA Hons (Politieke Wetenskap) en MA Politieke Wetenskap by Bloemfontein en RAU, onderskeidelik. Sebastiaan se gebiede van belangstelling en skryf is veral politiek, geskiedenis, reis.

Deel van: Meningsvormers

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ʼn vrywillige bydrae. Onthou – ons nuus bly gratis.

Maak 'n bydrae

19 Kommentare

dr. Sakkie van der Merwe ·

Net soos die ANC in die Sewentiger jare kinders gebruik het om hul doelwitte te bevorder en dan te huil as daar van hul sou omkom.

Jerry ·

In beide SA en Israel duur die onophoudelike stryd voort tussen diegene wat het en diegene wat wil he. Wereldwye ondersteuning behoort in meeste gevalle aan diegene wat niks het. Diegene wat alles het, is dan gewoonlik die muishond van die verhaal, einde niet.

Casper Labuschagne ·

Ek het seker ‘n virus infeksie of iets ophande, want ek stem hier saam met Jerry. Iets moet sekerlik met my gestel verkeerd wees?

Patrys ·

Die modus operandi is so dieselfde! En met ons minister wat die aanvalle elke keer veroordeel weet ons waar ons eie regering se lojaliteit lê. Hulle offer hulle vroue en kinders op sodat die wereld die wat hulself verdedig kan veroordeel. En net so iets interessants, die regering het grondeienaars aangesê om sake van grondonteiening by die polisie aan te meld, nadat die mense dit gedoen het, het die hof onder andere een so saak wat gemaak is teen grondbesetters in Midrand, oor die naweek uit die hof gegooi. So die polisie doen niks, as jy ‘n saak maak, gooi die hof dit uit. So die skrif is teen die muur. Almal moet Afriforum se inligtingsessies bywoon hierdie week as hulle kan. Ons is sitting-ducks. Ons sal ook onsself en ons eiendom en grond moet verdedig …..wonder net of die res van die wereld ons ook sal uitkryt. Een din weet ons almal, Hamas net soos die EFF soek ‘n bloedbad sodat hulle met geweld kan vat wat hulle wil hê.

Pietman ·

Goeie berig. Ja die ANC, EFF en Hamas is voëls van enerse vere.

Kannaland ·

Wat ek nie verstaan nie is waarom Israel so sukkel om sterk te staan. Ek dog die Joodse mense het geweldig baie mag regoor die wereld. Is hulle besig om mag wereldwyd te verloor?

Gerhard ·

Want sekere Jode is of neutraal of vyandig in hulle gesindheid tot Israel. Net ‘n deel van hulle ondersteun Israel.

Marthinus Willemse ·

Sebastiaan, gewoonlik is jou artikels ewewigtig, en akkuraat. Maar nou besmeer jy die Palestyne en Jode met die EFF, en daar is `n hele paar gate in jou argument, en 250 woorde is te min om dit te bespreek. Kortliks, dus.

Die Jode is afstammelinge van die antieke Hebreërs, wat vanuit Mesopotamië (huidige Irak) na die beloofde land, Kanaän (Palestina), emigreer het. In 586 v.C. het Nebukadnesar II Jerusalem verower, en die Jode in ballingskap na Babilon weggevoer. Toe Cirus van Persië Babilon verower, het hy die Jode in 539 v.C. laat terugkeer Jerusalem toe. Baie Jode het egter in Babilon, en wat vandag suidelike Rusland, die Oekraïne, Armenië en Georgië is, agtergebly.
Jy skryf dat oorwinnaars nie hul grond kan terugeis nie, maar die Jode het dit gedoen.
Jy beskou die Palestyne se grondeis as “verregaande” maar dit is presies dieselfde argument wat die Jode gebruik – en dis oukei? Jy praat van gewapende Palestyne wat agter “burgerlikes” skuil in optogte, ens. Dis dieselfde tegniek wat die Jode gebruik het, veral deur Menachim Begin se Stern-groep. Die Jode het terrorisme gebruik om die land te kry. Hulle het briefbomme aan president Harry Truman en Conrad Adenauer gestuur. Hulle het Britse sersante opgehang aan bome. Hulle het hotelle opgeblaas. Hulle het in groepies onwettige immigrante die gebied ingesypel, en toe die skip Exodus volgelaai en in Haifa ingevaar, en geweier om te vertrek. Toe die magsoorwig geskep is, is aangedring op verteenwoordiging (soos nou in Europa).

johan II ·

Eks met jou Marthinus. Daar is GEEN verband tusse Hamas en die EFF nie. Israel het ook GEEN bestaansreg soos hulle daarop aandring nie. Kom by mense, daar is n rede hoekom baie (meeste) Jode niks met Israel en hul massamoord staat te doen wil hê nie.

Gerhard ·

Marthinus Willemse. Hamas is selfs erger as die EFF. Verder dink ek jou kommentaar is net so eensydig soos waarvan jy Sabastiaan beskuldig. Die Palestyne het nog nooit hulle eie staat gehad nie en oorlog is wel ‘n aanvaarde manier om grond af te neem. Lande soos Duitsland en Japan het alby grond verloor in die Tweede Wereld Oorlog. Wat Sebastiaan se is dat die debat oor grense na ‘n sekere tydperk nie langer van belang is nie. Dit is net so geldig hier omdat Israel reeds geruime tyd bestaan en tensy die Arabiese bure van Israel bereid is om plat geskiet te word met kernwapens hulle dit sal moet aanvaar.

Joe Hall ·

Kannaland

Die Israeli’s bevind hulself tot ‘n groot mate in dieselfde posisie as die Suid Afrikaanse staat voor 1994. Trouens, Israel word ook vir jare lank as ‘n “Apartheidstaat” deur hul talle vyande beskryf en geniet met die uitsondering van die VSA, nie veel steun vanuit die res van ons planeet se state en mense nie.

Soos die pre-1994 RSA regering en hul wit ondersteuners hulself in isolasie binne swart Subsahara Afrika bevind het, word Israel in die sogenaamde Midde Ooste verswelg deur Arabiese volkere wat wêreldwyd ook die simpatie en steun van die Westerse wêreld geniet. Selle probleem wat die RSA destyds ondervind het. Die VSA se beleid jeens Israel wysig effens van President tot President, maar is afgesien van siele soos Obama, in hoofsaak ondersteunend. Die Oosblok state in die algemeen en Rusland in besonder, het ook deur die jare heen hulp en ondersteuning aan Arabiese state verleen, soos dit tans in Sirië plaasvind.

Israel en die pre-1994 RSA se moeilikgeite en “Struggles” toon inderdaad groot ooreenkomste.

johan ·

Behalwe dat Israel die grond by Palistina (hoofsaaklik met geweld) afgevat het terwyl die Boere dit gekoop, geruil of eenvoudig onbewoond in besit geneem het . Dit maak nogal n verskil.
(die Engelse in SA is natuurlik n ander storie)

Boerseun ·

Nie eintlik nie . Daar was wel oerloe met swart stamme en Israel is die grond gegee na WO2, was onder westerse beheer was. Palestina was nie n land met n koning of president nie en Israel het dit nie met geweld afgevat nie. Het wel oeloe teen arabiese lande daarna gevoer.

TDW ·

Ek kan nie glo jy kom weg met hierdie artikel nie. Gepraat van polities inkorrek. Ek het op Quora een keer gesê dat die wêreld op die oomblik anti-wit, pro-swart, anti-christen, pro-moslem, anti-geslag, pro-geslagsvloeibaar is en is summier “afgeskop”
En ons almal weet Suid-Afrika het nog minder persvryheid/vryheid van spraak.
Wonder hoe lank gaan hierdie artikel op MM wees voordat haatspraak geroep word.

Jerry ·

Casper, aangesien jy met my saamstem, kan ek nie anders as om ook met jou saam te stem. Jy behoort egter vinnig te genees wanneer jy my volgende kommentaar gaan lees

jean ·

Het palestina ooit die grond besit of het dit alles aan Israel behoort wat die grond bewerk het tot waar dit vandag is…palestina het kom plak…dis hoekom daar nog niks is nie. Eandag sal ons nog sien.

JC ·

Moderne argeologie het die geskiedenis van die verhaal in die Torah,in groot mate weggegooi as synde tewees die Israelitiese grondliggende nasionale “mite”.Nou goed dan…
Voorouers van die Israeliete kon ou antieke Semities-volkere INHEEMS aan Kanaän ingesluit het.Die Israeliete en hul kultuur het volgens die moderne argeologiese verslag NIE die streek met geweld oorgesteek nie, maar het in die streek ontstaan uit die Kanaänitiese volke en kulture. Daar is argeologiese bewyse wat verwys na “Israel”, wat tot ongeveer 1200 vC dateer, en die bestaan v/d Kanaäniete is op argeologies wyse bewys reeds in die Middelste Bronstydperk.
Historici stem saam dat ‘n koninkryk van Israel bestaan ​​het TEEN ongeveer 900 vC en dat ‘n koninkryk van Juda bestaan ​​het met ongeveer 700 vC. ​​Die koninkryk van Israel is ongeveer 720 vC vernietig toe dit deur die Neo-Assiriese Ryk verower is. In 586 vC het koning Nebukadnésar II van Babilon Juda verower.Die Babiloniese ballingskap het teen ongeveer 538 vC onder die heerskappy van Cyrus die Grote geëindig nadat hy Babilon verower het. Die Tweede Tempel is rondom 520 vC gebou.

Nou vra ek ALMAL: wie se grond is dit nou eintlik? Het God nie die grond gegee aan die Jode (Israelis)nie?!

Indien die geloofwaardigheid van die Bybel bevraagteken word,slaan tog ag op hierdie onbetwiste feite!!!!
Watter kamtige reg het die “Palestyne”-(fiktiewe volk) op “terugkeer”!!!? Dis lagwekkend.
Niemand gaan aan Israel raak nie.
#staanmetIsrael.

John ·

… en nerens geld die Woord nie? Na WO2 het Engeland en Swede die stukkie van die ou Israel vir die Jode gegee…. en dit is nie alle Jode nie net diegene wat seker riglyne volg. Christen-Jode word nie eintlik verduur nie, hoewel ateiste en vreemde volke wat die Joodse geloof aanvaar, burgerskap bekom. Die Palestyne is nie ‘n homogene groep nie en leef van aalmoese vanaf die EU. Baie VSA-Jode is ateiste en baie konserwatiewe Jode glo die tyd is nog nie reg vir hulle om na Israel terug te keer nie ooreenkomstig antieke geskrifte waarvan daar baie is en moeilik interpreteerbaar is, gevolglik die baie sieninge. Om die situasie rondom Israel en sy geskiedenis en dan ook nog sy toekoms te verklaar is sake buite ons begripsveld. Om Openbaring uit te le, is wat dit vra en hoeveel van ons sal dit waag om so slim te probeer wees?

O wee, die gesang is uit! Kommentaar word ná 48 uur op ʼn artikel op Maroela Media gesluit. Kom kuier gerus verder op ʼn meer onlangse artikel.