Verbanning in die naam van Mandela

kallie-kriel-2019-05-02

Kallie Kriel, die uitvoerende hoof van die burgerregte-organisasie AfriForum. Foto: Verskaf.

Oudpresident Nelson Mandela ontvang wêreldwyd erkenning vir sy rol in die stryd teen apartheid. Gedurende die stryd teen apartheid het die destydse minderheidsregering ook skerp deurgeloop weens sy inperking van burgerlike vryhede en die staat se gebruik van verbanning en sensorskap om die opponente van apartheid te muilband. ’n Voorbeeld hiervan is dat die ANC en die SAKP en hul simbole tydens die apartheidsera verban is.

Dit is daarom ’n skokkende ironie dat die Nelson Mandela-stigting, wat hulle daarop roem dat hulle as vaandeldraers van Mandela se nalatenskap optree, nou soortgelyke metodes as destyds gebruik om burgerlike vryhede in te perk en verbanning en sensorskap op hedendaagse Suid-Afrika af te dwing deur die hofsaak om die Suid-Afrikaanse vlag van 1928 (beter bekend as die ou vlag) te verban.

Benewens die gevaar wat die inperking van burgerlike vryhede inhou, lei die onverdraagsaamheid wat verbanningsaksies onderlê, ook tot onaanvaarbare vlakke van polarisasie in die land. AfriForum is en bly verbind tot die bou van ’n samelewing op die beginsel van wedersydse erkenning en respek tussen gemeenskappe. Hierdie strewe is duidelik uiteengesit in AfriForum se burgerregtemanifes, wat op AfriForum se webtuiste verskyn.

Binne die konteks van AfriForum se strewe na wedersydse erkenning en respek tussen gemeenskappe het AfriForum in die aanloop tot die vlaghofsaak reeds op 4 September 2018 ’n brief aan die Nelson Mandela-stigting gestuur waarin teen die polariserende uitwerking van ’n hofgeding gewaarsku word en ’n gesprek aangevra word om ’n wedersyds aanvaarbare oplossing vir die geskil te vind. Die Nelson Mandela-stigting het egter geantwoord dat hy AfriForum se versoek tot dialoog verwerp.

Ten spyte hiervan het die stigting ná die hofsaak op oneerlike wyse aangevoer dat AfriForum pogings tot gesprekvoering van die hand gewys het. Dit terwyl die teenoorgestelde waar was. Ten spyte van die Nelson Mandela-stigting se leuens bly AfriForum verbind tot gesprekvoering, sou die stigting herbesin oor die dwase rigting wat hulle ingeslaan het om dialoog te verwerp.

Anders as wat oningeligte kritici probeer voorgee, gebruik AfriForum geen vlae by sy byeenkomste nie en het die organisasie ook nie die ou vlag tydens die Swart Maandag-protesaksie gebruik nie. Die joernalis Nickolaus Bauer, wat destyds valslik beweer het die ou vlag is gebruik, het later om verskoning gevra vir sy wanvoorstelling.

AfriForum gebruik nie die ou vlag nie omdat die organisasie besef dat daar ’n deel van die samelewing is wat gekwets voel deur die vlag se vertoon. Daar is tog geen sin daarin om tydens byeenkomste, soos Swart Maandag, standpunt in te neem teen hedendaagse vergrype soos plaasmoorde in die land, simbole in te trek wat sommige mense aanstoot gee en die aandag van AfriForum se strewe (om ’n beter en veilige toekoms te bou) af te trek nie. Die basis van die Nelson Mandela-stigting se verbanningshofsaak en hul ongevraagde optrede om AfriForum as respondent by die saak in te trek, is dus ook op leuens gebou.

Nadat AfriForum op kwaadwillige wyse deur die Nelson Mandela-stigting by die saak ingetrek is, het AfriForum in die hof aangevoer dat gemeenskappe uit respek vir mekaar uit eie beweging en deur dialoog daaraan moet werk om mekaar nie te beledig en aanstoot te gee nie.

Hierdie benadering beteken beslis nie dat enigiets wat aanstoot gee, verban moet word nie. Mense wat ná die uitspraak in die vlagsaak dalk hoogs tevrede is met die verbanning van die ou vlag, moet besef wat die gevolge sal wees as iemand in die toekoms aanstoot neem rakende iets anders wat weer vir hulle belangrik is.

Sodra die staat die mag kry om te bepaal wat aanstootlik is en wat verbied moet word, beweeg ons in die rigting van ’n polisiestaat wat vryheid van spraak inperk tot in jou eie huis. Dit is dus uit beginsel belangrik om teen enige polities gedrewe verbannings te veg, self al besef mens dat die prys daarvoor hoog is omdat die veldslae vir vryheid van spraak ongelukkig inherent net rakende omstrede onderwerpe geveg word.

AfriForum ondersteun ook die feit dat geen reg, ook nie die reg op vryheid van spraak, onbeperk is nie. Die beperkings op vryheid van spraak moet egter goed omskryf word, om te voorkom dat hierdie beperkings deur ’n staat misbruik word om mense wat van die owerheid verskil, se denke en idees te onderdruk.

Die Suid-Afrikaanse Grondwet omskryf die beperkings op vryheid van spraak wel goed in artikel 16(2). Hier word dit duidelik gestel dat vryheid van spraak nie geld vir propaganda vir oorlog, aanstigting tot geweld en die verkondiging van haat wat aanhits om leed te veroorsaak is nie. ’n Verbod op iets wat aanstoot kan gee, sonder dat daar ’n oproep is om iemand leed aan te doen, strook dus nie met die Grondwet se uitdruklike bepalings nie. Daar bestaan dus geen grondwetlike rede vir die Nelson Mandela-stigting se polities gedrewe heksejag teen Ernst Roets en hul ondemokratiese aanslag op vryheid van spraak nie.

AfriForum sal, onder meer, op hierdie grondwetlike bepaling steun om die Nelson Mandela-stigting se verdere aanslae op vryheid van spraak in die howe teen te staan.

Die Nelson Mandela-stigting se benadering dat aanstootlike en kwetsende uitsprake verban moet word, selfs al gaan dit nie met aanhitsing tot leed gepaard nie, is problematies veral weens die dubbele standaarde wat die Nelson Mandela-stigting self en die regerende elite toepas wanneer dit kom by wat aanstootlik is en wat nie.

Hoewel die stigting ’n vlag aanstootlik vind, vind hulle geen fout met oudpresident Mandela se dogter, Zindzi Mandela, se uitsprake dat wit mense “diewe”, “lafaards”, “verkragters” en “onwelkome gaste” in die land is nie. Die Nelson Mandela-stigting het in reaksie op Zindzi se kwetsende uitsprake selfs so ver gegaan as om aan te kondig dat hulle geen noodsaak sien om eers met Zindzi daaroor in gesprek te tree nie. Hierdeur het hulle duidelik gewys dat hulle nie werklik daartoe verbind is om alle kwetsende optrede te pak nie, maar dat hulle eerder daarop uit is om net diegene wat van die Nelson Mandela-stigting en die regerende elite se sienings verskil, se spraakvryheid in te perk.

AfriForum steek ’n hand van vriendskap uit na almal in die land wat uit innerlike oortuiging en deur dialoog wil saamwerk om wedersydse erkenning en respek tussen gemeenskappe te bevorder, maar ook besef dat verbannings en die inperking van burgerlike vryhede in niemand van ons se belang is nie.

Die land kan nie weer ’n sensuurraad bekostig nie, selfs nie al funksioneer sodanige raad nou onder die naam Nelson Mandela-stigting nie.

Hierdie plasing is deur ’n onafhanklike persoon of onderneming saamgestel. Die menings en standpunte wat in hierdie skrywe uitgespreek word, is nie noodwendig die beleid of standpunt van Maroela Media se redakteurs, direksie of aandeelhouers nie. –Red

Meer oor die skrywer: Kallie Kriel

Kallie Kriel is die Uitvoerende Hoof van AfriForum.

Deel van: Meningsvormers

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ’n vrywillige bydrae. Onthou – ons nuus bly gratis.

Maak 'n bydrae

Nou pra' jý

31 Kommentare

James ·

Ek steur my min aan hulle verbanning.
Dit bly my vlag en deur verbanning gaan die Vlag en sy mense net sterker word!
Hoera!

Jerry ·

Stem saam indien Afriforum dit hou by burgerregte vir Afriforum lede wie deel is van n minderheidsgroep, maar wie nie die minderheidsgroep is nie. Praat en maak uitsprake namens Afriforum lede en hulle regte. Afrikaners wat nie lede van Afriforum is nie se regte en vryhede moet nie tersprake wees nie sodat dit nie geteiken word nie. Om daarop aanspraak te maak dat Afriforum opstaan vir die regte en vryhede van die Afrikaners wie nie lede van Afriforum is nie, is dus vals, misleidend en lafhartig. Om ten koste van die Afrikaner agter die Afrikaner te skuil is seker by verre die laakbaarste ding wat n Afrikaner aan mede Afrikaners kan doen. As jy wil skuil, doen dit agter jou organisasie en die se lede! Afriforum se ledetal dui daarop dat julle die absolute minderheid van die Afrikaner verteenwoordig en wie nie fout vind dat julle die ou vlag as n politieke speelbal gebruik nie. Die Afrikaner wie nie lede van Afriforum is nie en wie by verre die meerderheid Afrikaners is, verkies dat die ou vlag as n versoeningsgebaar ter ruste gele word sodat die res van ons onverdedigbare vryhede nie ook geteiken word nie. Vryhede wat geteiken word is iets wat Afriforum graag sal wil sien gebeur, want dit waarborg Afriforum se bestaansreg en geldmaak motief. Hou op om van die Afrikaner n teiken te maak en hou op om die Afrikanerjeug onbehoorlik te beinvloed. Doen dit aan julself, julle lede en die se gesinne!

Richter van Schalkwyk ·

Goeie genugtig, Jerry! Gaan kyk bietjie of jy een keer die woord “Afrikaner” in die artikel sien. Dis nie daar nie, want spraakvryheid raak almal. Nie slegs Afrikaner, of Zulu, of wit of swart nie, maar almal.

Met jou idee van omrol en bly toegee, is jy in geen posisie om vinger te wys oor lafhartigheid nie. Haal eers die balk uit jou eie oog…

Awie Opperman ·

As jy kan lees, skryf en tel kan jy ‘n groot sukses van jou lewe maak. Hier is vir jou ‘n voorstel om te oorweeg voordat jy weer kommentaar lewer. Stap 1: Haal jou politieke bril af; Stap 2: lees die berig; Stap 3: gaan sit en dink oor wat jy gelees het; Stap 4: vorm ‘n mening; Stap 5: besin oor of jy moontlik kan bydra tot die gesprek en hoe dit relevant is tot die berig; Stap 6: lewer kommentaar.

John ·

Jerry jy maak weer ‘n aanname dat alle Afrikaners wat nie lid van AfriForum is nie, jou standpunt onderskryf. Jy maak presies dieselfde fout. Praat net namens jouself en jou ondersteuners. Daar is baie Afrikaners wat verskeie ander standpunte huldig. Ons kan ook nou maar ophou om te maak of Mandela vreeslik lief vir Afrikaners was. Luister eerder na sy presiese woorde. Mandela het dit duidelik gehad oor gelyke regte en meerderheidsoorheersing. Hy het nie ‘n duit toegegee aan wit onderhandelaars se planne nie. Die ANC lag vir die ‘kruipery’ by die oorle swart leier om sodoende idees aan te dik.

Jerry ·

Daar is vier verskillende groepe Afrikaners. Die Suid Afrikaanse Afrikaners, die buitelandse Afrikaners, die Afriforum/Solidariteit Afrikaners en die Orania Afrikaners. Nie een van hierdie groepe Afrikaners kan namens die Afrikaner praat nie. Praat dus namens jou groep Afrikaners, in die geval, die Solidariteit/Afriforum Afrikaners!

Goed gestel ·

Jerry, dis ‘n baie goeie opsomming. Ek is ‘n Suid-Afrikaanse Afrikaner, wat ek aanneem die grootste groep onder die Afrikaners is. Nie baie Suid-Afrikaner Afrikaners lewer kommentaar op MM nie. Soms het ek raakpunte met van die ander tipes, maar is seker maar meestal heel liberaal. Ek kan myself bv. glad nie met die Orania Afrikaner vereenselwig nie. So verskil ons almal maar en mag ons ook verskil sonder om te oordeel. In my opinie is volwassenheid as jy ander se standpunte kan insien al verskil jy van hul mening.

Gert ·

EK dink daar is twee soorte Afrikaners, nl. trotse Afrikaners en skaam Afrikaners. Jerry val in die laaste groep, en ek in die eerste.

Awie Opperman ·

Jy het die grootste groep Afrikaners gemis naamlik die Apatiese Afrikaner.

Judge Dredd ·

Jerry – uiteindelik gaan daar slegs 3 tipe Afrikaners wees – die wat geveg het – die wat gevlug het – en die wat hul eie mense verraai het.

Jy is goed op pad om 1 van die laaste 2 groeperings te wees.

JG ·

@ Jerry…jy het n vyfde groep vergeet…die “Jerry”Afrikaners wat nie n benul het waar hulle inpas nie…

Alie ·

Ek is n trotse Suid-Afrikaner en ook n trotse Solidariteit/Afriforum lid. Hulle is van die min organisasies wat werklik iets doen vir die Afrikaners (maar ook vir ander minderheidsgroepe). Mense wat nie lede is nie moet dalk net uitvind waarvoor Solidariteit en Afriforum staan want dis duidelik dat sulke persone wat so gal braak absoluut oningelig is. Dankie Solidariteit en Afriforum vir wat julle doen. Dit word waardeer!

humor ·

Die onderskeid wat getref word tussen die sg 4 Afrikanergroepe is geensins absoluut begrens nie. Daar bstaan n openheid met betrekking tot mekaar se beginsels en belyd en selfs politieke benadering . Jy sal vind dat uit al genoemde groepe tog mense is wat Afri Forum en Solidariteit ondersteun. Ek vind dit onvanpas dat mense giftig en vyandig en aftakelend is en meebring dat daar geen vordering gemaak word nie. Oral bestaan daar raakvlakke wat eiendomlik is.

JohanR ·

Ek kyk die saak soe. Wie en wat is die Nelson Mandela Stigting, en is hulle rerig belangrik, en gee ek eintlik om of hulle belangrik is? Soos met van hulle doen en late, lyk en klink hulle net na nog ‘n rassistiese organisasie. Ek is trots om ‘n Afrikaner te wees, en te sien dat AfriForum en Solidariteit vir die Afrikaner weg. Sal miskien nie altyd die oorlog wen teen rasiste soos die Nelson Mandela Stigting en anders nie, maar as daar nou en dan ‘n geveg gewen word, kry ek darem soe LEKKER!!

hercu ·

…en dit alles oor ‘n stuk lap, terwyl Pretoria se middestad erger as die wilde weste lyk en dit terwyl agbare, edele, sir, hoogagtende Cyril Ramaphosa in die buiteland rond rits op belastingbetaler geld :-( alles net gejaag na wind!

Jerry ·

Afriforum wie se motief dit is om te verdeel, emosies op te sweep en mense teen mekaar af te speel, steek n hand van vriendskap uit. Nee wat regtig, julle bluf net julself!

Henning ·

Jerry, as jy teen die tyd nognie bewus is van alles wat Afriforum/Solidariteit al vermag het tot voordeel van alle Afrikaners en ook van ander groepe en anders kleurige mense nie, is jy voorwaar ‘n slaapwandelaar.

Leon ·

Hulle gebruik nog die naam van nelson Mandela maar hulle is eintlik die Winnie Mandela stigting. Hulle werk nou soos Winnie Mandela. Hulle het lankal Nelson se ideale afgesweer en liewer Winnie s’n aanvaar.

Ja swaer ·

Iets wat ek nie verstaan nie, is waarom die NM groepie net die vlag aangeval het. Waarom laat die Stem nie hulle ook trauma ondervind van gedagtes aan apartheid nie? Hoe onderskei hulle nogal? Hulle behoort die volkslied en alles wat lyk na ‘n witman ook te laat verban (ha ha ha)

Wonder ·

Ja, valghysing in die goeie ou dae het gewoonlik gepaard gegaan met die sing vd volkslied. Hoe nou? Dan moet albei die massas mos getraumatiseerd laat. Die hofuitspaark is nie net belaglik nie, Afriforum behoort dit konstitusionele hof toe te neem as hulle so sterk voel oor vryheid v spraak (anders praat hulle sommer net), ne mnr Kriel

Jerry ·

Dit is van Afriforum se veg vir Afrikaans dat Afrikaans gesneuwel het en uitgesluit is by universiteite. Dit is van veg vir grond dat die grondwet verander gaan word en grond sonder vergoeding onteien gaan word. Dit is van veg vir boere dat plaasbeveiliging misluk. Dit is van veg vir vryheid van spraak dat sensuur teenoor die minderheid toegepas gaan word op alle onverdedigbare Afrikaner vryhede. Kallie se idees van veg het dit sover ten doel om die aanslag op die Afrikaner minderheid se vryhede en geskiedenis uit te lok en die Afrikaner minderheid emosioneel op te sweep, te verdeel en af te speel teen die regerende party en om die Afrikaner minderheid uitgesluit te kry en te isoleer by Afriforum/Solidariteit se strewe na selfbeskikking en vir die bou van n sakeryk. Om Afriforum te ondersteun is om jou vryhede en regte op te offer vir isolasie! Inderwaarheid veg Afriforum vir die uitsluiting van die Afrikaner minderheid uit die breer Suid Afrikaanse gemeenskap met die doel om die Afrikaner minderheid te isoleer tot selfbeskikking. Die Afrikaner minderheid se vryheid van keuse word dus ingeperk tot slegs geisoleerde selfbeskikking. Kallie se idee van veg vir die minderheid se vryhede strek net tot voordeel van die minderheid van die minderhede en tot uitsluiting en verarming van die meerderheid van die minderheid! Kallie se selfbeskikkingsplan kan nie lewensvatbaar wees vir die meerderheid van die minderheid nie. Die wereld is die minderheid se oester, dit is beslis nie geisoleerde selfbeskikking in SA nie!

Hendrik ·

Wel ek is ‘n Suid-Afrikaanse Afrikaner, Afriforum/Solidariteit Afrikaner en ‘n Kleinfontein Afrikaner. Dus is daar beslis ‘n oorvleuing en die een is gekoppel aan die ander. Wel ek is deel van die Suid-Afrika omdat die meerderheid te ondelhandelingsstryd gewen het en as minderheid het ons geen se nie. Ons word ge- AA, BBBEE, EWC, NHI en nou ook ons beleggings (deur pensioenfonds). Dus is alles nie so eenvoudig en so ook is die oplossing ooglopend logies eenvoudig. Apatiese en oorsese Afrikaner is ek nou nie.

Waar of vals? ·

Om asem in te trek oor die verbanning van ‘n vlag wat nie strook met die sogenaamde Mandela nalatenskap nie, is debateerbaar gegewe sy boek LWTF. Die strategie om deur fopnuus redes te fabriseer vir verbanning van ‘n vlag en dan jou opposisie te betrek om die spreekwoordelike vark in die verhaal blyk te wees, is teksboek. Het 20 jaar terug ‘n bladsy in bg. boek geoormerk wat handel oor: nasionalisering van banke, grondonteiening ensovoorts. Was hul simbole verban om as “opponente van Apartheid” gemuilband te word, of in die stryd teen kommunisme waaroor die Britte die SA Regering gewaarsku het?

Jerry ·

Wel Hendrik as dit vir jou aanvaarbaar is dat Afriforum hard veg sodat die Afrikaner minderheid se regte en vryhede uitgesluit word uit die breer Suid Afrikaanse gemeenskap en dat die Afrikaner minderheid se regte en vryhede geisoleer en beperk word by selfbeskikking, dan is dit goed so en dan is dit jou keuse. Dit is en bly volgens my beskeie opinie nie n goeie keuse nie, want al is dit al amper te laat, sal die Afrikaner hulself van Afriforum distansieer wanneer die Afrikaner daarvan bewus raak dat Afriforum die Afrikaner om die bos gelei het!

Logika ·

Hallo Jerry. Ek sien jou punt. Volgens jou insette voel jy dat die (term) Afrikaner nie meer gepas is of tuis hoort in SA nie? Volgens jou redenasie en gevolgtrekkings doen Afriforum dus eintlik ‘n “goeie job” om hierdie doel wat jy ondersteun (naamlik dat die “Afrikaner” liewer in SA moet verdwyn) te bewerkstellig, nê? So, dit beteken eenvoudig dat jy eintlik vir Afrifirum moet bedank omdat hulle (volgens jou eie mening) so ‘n “goeie job” doen om die (term) Afrikaner uit SA te laat/help verdwyn? Afriforum doen dan immers wat jy nastreef, of hoe?

Janco ·

Jerry, ek is daarvan oortuig dat Afriforum teen hierdie tyd kennis geneem het van jou veragting vir hulle, want jy sing elke dag dieselfde ou deuntjie. Dis ook duidelik dat hulle nie met jou sienswyse saamstem nie. Aanvaar dit nou asseblief. Saam met Solidariteit praat hulle darem namens 400 000-plus lede en dit is daardie lede se keuse om hulle te ondersteun of nie. Vir iemand wat Afriforum en Solidariteit so minag, maak jy darem met oorgawe van hulle media-platvorm (MM) gebruik.

Jerry ·

Afriforum steek n hand van vriendskap uit, maar die hand van vriendskap word nie as n opregte gebaar ervaar deur die NMS nie. Hoekom nie? Dit blyk dat die NMS en Afriforum beide nie deel kan wees van oplossings nie. Beide blyk maar deel van die probleem te wees! Die Afrikaner se probleme word dus net al hoe erger gemaak!

Positief? ·

En volgens alles wat jy tot op hede kwytgeraak het is “die Afrikaner se probleme” eintlik “die gewensde resultaat”. Dws, beide die NMS én Afriforum doen eintlik (volgens jou redenasie) “die regte ding”.

Jerry ·

@Positief/drogredenasie. Die benadering van beide NMS en Afriforum is totaal en al onversoenend. Beide is oneerlik oor hulle motiewe en dra deur hulle benadering/taktiek by tot verdeeldheid en opsweping wat vir Afriforum die gewenste resultaat is, nie vir my of vir die Afrikaner nie. Dit daar gelaat, jy probeer hard om weg te beweeg van Afriforum wat die Afrikaner mislei het met n volkstaat, mislei het met kamtige veg vir Afrikaans by universiteite, mislei het met hulle onvermoee vir plaasbeveiliging, valse en skoorsoek redes vir die boikot van borge en maatskappye en nou die vlag te gebruik waaronder Afriforum nie gedien het nie, vir die veg vir minderhede se vryheid van spraak. Dit gaan ook net nog n onverdedigbare geveg wees ten koste van die Afrikaner minderheid se vryheid! Afriforum se uitlokking van die aanslag teen die Afrikaner mag dalk nou die gewenste uitwerking vir Afriforum/Solidariteit se bestaansreg wees, maar vorentoe gaan dit die Afrikaner minderheid in erge uitsluiting, isolasie en verdrukking dompel! Die NMS en Afriforum kan nie meer deel van enige oplossings wees nie, daarvoor skep beide te veel verdeeldheid gepaardgaande met al hoe groter wordende wantroue! Die eindresultaat wat Afriforum in gedagte gehad het vir n volkstaat, het reeds verander. Die eindresultaat wat Afriforum nou koester oor selfbeskikking, gaan noodgedwonge ook verander soos wat die aanslag na meer intensiewe optredes aangepas gaan word. Afriforum gaan verander/aanpas totdat daar nie meer spasie vir Afriforum is om aan te pas of in die howe te veg nie!

O wee, die gesang is uit! Die kommentaar op hierdie berig is gesluit. Kom kuier gerus lekker verder saam op ʼn ander artikel.