Voorspel tot ʼn rewolusie?

Wetstoepassers wat ontplooi is in die Johannesburgse sakesentrum waar geweld opnuut opgevlam het. (Foto: Twittere via @AsktheChiefJMPD)

Deur Daniel du Plessis

Dit is altyd effens onvanpas om te praat oor die moontlikheid van rewolusie. Maar, terselfdertyd, wanneer dit uiteindelik tyd is om te praat daaroor, is dit nie wys om die gesprek onnodig uit te stel nie.

Die gebeure van die afgelope paar weke – onluste, openbare geweld en stede wat brand – noop ons, ongelukkig, om nou daardie gesprek te hê.

Dit is vir baie duidelik dat Suid-Afrika se bestaande omstandighede alles behalwe volhoubaar is. Uit talle oorde is daar iets van ʼn versugting na die een of ander radikale verandering. So is sommige ten gunste van ʼn IMF-lening – en die streng voorwaardes wat daarmee gepaardgaan. Ander, daarenteen, bepleit dat meer geld gedruk word, ʼn swakker rand en meer toegeeflike monetêre beleid.

Dit is nie onnatuurlik in hierdie omstandighede om te wonder oor die radikale verandering wat, histories gesproke, die mees algemene reaksie op politieke onstabiliteit en ekonomiese onsekerheid was nie. Dit is, natuurlik, die rewolusie.

Hoewel partye soos die EFF – natuurlik – hulself hier aan gruwelike wensdenkery skuldig maak, is dit nie te sê dat ons té gerus behoort te wees nie. Suid-Afrika is, natuurlik, nie juis ʼn bastion van stabiliteit en sosiale harmonie nie.

Daarenteen is dit nie duidelik dat rewolusie die noodwendige gevolg is van die talle protesoptogte, openbare geweld en onstabiliteit wat ons tans beleef nie.

Hoewel ontsenuend is hierdie onsekerheid eintlik baie tipies. Talle rewolusies, soos dié wat deel uitgemaak het van die sogenaamde Arabiese lente, was nie vooraf voorspel nie.

Wat, dan, is die algemene oorsake van rewolusies? En kan ons poog om Suid-Afrika se risiko te probeer skat?

Aristoteles, een van die eerste denkers wat ernstige aandag geskenk het aan die “rewolusie” as politieke fenomeen, was van mening dat armoede, ongelykheid en ongeregtigheid die omstandighede geskep het waarin rewolusies kon plaasvind.

Hierdie faktore is natuurlik in oorvloed in Suid-Afrika beskikbaar – en, daarmee saam, meer as genoeg politieke retoriek wat daarop teer.

Hoe lyk die situasie dan in Suid-Afrika – as’t ware op toi-toi-vlak?

Openbare geweld en onstabiliteit is, sonder enige twyfel, besig om toe te neem. So, byvoorbeeld, is daar in die afgelope paar jaar ‘n stelselmatige toename in die aantal en hoeveelheid eise ingestel by Sasria, ‘n staatsbeheerde versekeraar wat dekking bied vir skade aangerig tydens protesoptogte en terrorisme.

Hierdie tendens word ook bevestig deur empiriese data – die algemene tendens is dat Suid-Afrikaanse protesoptogte meer gereeld word en langer duur. Wat veral kommerwekkend is, is dat verskeie ontleders bevind het dat geweldpleging skerp aan die toeneem is in hierdie protesoptogte.

Dus, selfs al sou ons geen ag slaan op die afgelope paar weke se geweld en protes nie, sou ons steeds rede tot kommer gehad het.

Is Suid-Afrika dan op die drempel van ʼn rewolusie?

Alles in ag genome – waarskynlik nie. Maar dit behoort vir ons ʼn rede tot groot kommer te wees dat ons nie die moontlikheid met absolute sekerheid kan uitsluit nie.

Dit was ook Aristoteles wat gesê het dat rewolusies – in die “regte” atmosfeer – deur beuselagtighede veroorsaak word.

Wat staan ons te doen te midde van hierdie toenemende onsekerheid? Klein insidente kan die sade word van rewolusies wat verder en verder uitkring, mits dit in vrugbare grond daarvoor val.

Dalk, as hierdie vrugbare grond die probleem is, behoort politici soos Julius Malema en Ace Magashule op te hou om nog kompos by te gooi?

  • Hierdie nuuskommentaar word deur Pretoria FM verskaf. Luister daagliks na Klankkoerant op Pretoria FM vir die jongste nuuskommentaar.

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ’n vrywillige bydrae. Onthou – ons nuus bly gratis.

Maak 'n bydrae

Nou pra' jý

17 Kommentare

Duppie ·

Uiteindelik iemand wat wakker word. Ek sê al lankal dat hier iets aan die kom is en dat ons te slap is om dit te erken of dalk te “wil” erken. Maak nie saak hoe nie, ons sal dit moet erken en sorg dat ons daarop voorbereid is. Mense dink seker dat dit nooit in Suid Afrika sal gebeur wat in ander Afrika state gebeur nie. Hallooooo, skrik wakker en ruik bietjie die koffie

Elred Ferreira ·

Daar is hoegenaamd nie twyfel dat daar n rewolusie oppad is nie, die vraag is net wanneer. Alhoewel die EFF dit kort kort probeer aan die gang kry, vermoed ek die land sal afgebrand word wanneer die regering sukkel om die 18 miljoen grants te betaal….ek glo dit sal in die volgende 3 tot 5 jaar wees!

Jerry ·

Die ANC en die eff het absoluut niks om te verloor met n rewolusie nie, inteendeel sal dit hulle bloedspoor van korrupsie permanent uitwis, waarna geen haan sal kraai nie, maar daar is n maar in die verhaal. In SA woed n redelike hoe vlak rewolusie wat deur die ANC en eff kaderstrukture binne gemeenskappe bestuur word reeds n geruime tyd en dit sal voortduur totdat die ANC hulle sin gekry het met nasionalisering van grond, privaatmaatskappye, fondse en pensioenfondse. n Volskaalse rewolusie wat deur politieke en ekonomiese onstabiliteit, werkloosheid en armoede veroorsaak word is buite die kwessie in SA omrede dit doelbewus geskied, maar bestuur en beheer word. n Volskaalse rewolusie sal net in SA deur die ANC en eff geaktiveer word indien verandering en nasionalisering na n kapitalistiese sosialistiese staat, demokraties nie kan realiseer nie. Die huidige beheerde plunder en geweldstoneelspelrewolusie in SA heers as intimidasie instrument om weerstand teen gedwonge sogenaamde “vreedsame” verandering, te laat verkrummel. Daarmee saam kry ons dan ook sekere ANC politici wat met mooi woorde en planne poog om hulle opponente te paai, gerus te stel en te mislei tot samewerking vir verandering (nasionalisering). Die ANC se rewolusie toneelspel bestaan dus uit, “bad cop, good cop”. Die ANC het die rand laat val met n rewolusie klimaat genaamd staatskaping tot voordeel van die ANC en die ANC gaan die rand optel met n rewolusie klimaat genaamd die herstel van die skade van staatskaping deur verandering (nasionalisering) tot voordeel van die ANC!

Attie. ·

As ek my moes steur aan w app berigte dan moes hier al maande terug ‘n rewolusie gewees het. Hoe minder ons ons steur aan nuus op ons selfone hoe gouer gaan almal rustig raak en besef watse lekker land on het om in te werk en te leef.

Wim ·

Ou Attie jy redeneer nou soos n Niggie van my in 2000 ,2001 geredeneer het in Zimbabwe toe sy een aand om die braaivleis vuur gesê het mense moet ophou bekommerd wees oor Mugabe wat die plase gaan vat en die wat toe al weg was Australie toe gesê het, hulle gaan nog druipstert terug kruip .Wel vandag is hulle uit hulle groot plase en sy maak tuine skoon in Aussie land om aan die lewe te bly

Raoul ·

Dankie iemand wat sin praat. Die mense Se al die afgelope 30 Jaar van rewolusie… Terwyl daar ander mense dai energie spandeer om geld te maak en die lewe te geniet :)

Deon ·

Raoul, die “lekker” lewe is nie volhoubaar nie en sal tot ‘n einde kom.

kla-kous ·

Daar word gewag gemaak in die artikel van mense wat meen dat ons aansoek moet doen om ‘n IMF-lening. Dawie Roodt het ‘n ruk gelede daarop gewys, in ‘n artikel in Politicsweb, dat ons nie daarvoor kwalifiseer nie (“Why we won’t need an IMF loan”)

Andreas ·

Slavoj Zizek het gese dat rewolusies begin ALTYD wanneer die armes ‘n periode van verbetering ervaar maar die verbetering is nie tot op die vlak en skaal wat verwag word nie. Ek sal se net hieroor is ons ryp vir rewolusie.

Pieter, Weskaap. ·

Jerry, ek is regtig baie beïndruk deur jou kommentaar hierbo!

Toe die EFF hul eerste parlementêre setels bekom het in die voorlaaste algemene verkiesing, het Julius Malema gesê: “The revolution has just started”.

Neem kennis!

Petrus ·

Ons is klaar in die revolusie. Ons is net te gewoond aan moord, opstande, swak openbare diens, vervalle infrastruktuur, korrupsie , en ‘n ondoeltreffende staatsdiens en parlement om dit te besef.

Jerry ·

SA is in n ANC/eff georkestreerde, gekoordineerde en beheerde rewolusie wat die intimidasie klimaat skep vir gedwonge verandering (nasionalisering). Enige ander land in Afrika sou reeds in n volskaalse rewolusie gewikkel gewees het met die hoe intensietyd van werkloosheid, misdaad, politieke/ekonomiese onstabiliteit ens. Waarom sal die ANC en eff wat aan dieselfde kant van die draad staan en na dieselfde einddoel strewe nl. om kolonialisme en westerse idees te vervang met kapitalistiese sosialisme en kommunistiese idees, n volskaalse rewolusie van stapel stuur, veral wanneer die einddoel dmv die huidige demokratiese status que en gepaardgaande met oorreding deur intimidasie en vrees vir n volskaalse rewolusie, kan geskied? Misleidende toneelspel van die ANC en eff politici is aan die orde van die dag met kaderstrukture wat onder beskerming service delivery stakings en campaigns in gemeenskappe van stapel stuur en die vlakke van geweld en plundering beheer om vrees in te boesem deur intimidasie by diegene wie teen verandering gekant is, ten einde weerstand teen die idees vir verandering te laat verkrummel. Die ANC en eff is nie werklik lus vir n volskaalse rewolusie nie, maar sou as laaste uitweg hulle daartoe wend, indien hulle daartoe gedwing word. Gegewe die feit dat wetgewing deur n parlementere twee derde meerderheid vir verandering (nasionalisering) redelik naby aan grondwetlik geskied, is n volskaalse rewolusie onwaarskynlik en buite die kwessie!

ANC lite ·

Nonsense , all is fine and all is good. The rainbow she takes time, yes. One South Africa for all, no worry, be happy

Henry ·

Die rewolusie wat deesdae deur sommiges as ‘n onafwendbare gebeurtenis beskou word, is mynsinsiens propvol retoriek, maar dunnerig wanneer die komende konflik meer in besonderhede verduidelik behoort te word.

Rewolusies is niemand se pel nie en het deur die eeue heen bewys gelewer dat bloed wyd vloei met gepaardgaande geweld en ellende. Dis ‘n aaklikge gebeurtenis. Is dit die rede vir al die vae waarskuwings? Of is dit fopnuus – bobbejaan-agterrie- berg, bangmaak sprokies?

Alhoewel dit gewoonlik nie in soveel woorde omskryf word nie, is die logiese afleiding immers dat wittes – veral ons Afrikaanse wittes – en hoogstens ‘n paar buitelandse spaza winkeleienaars, die hoofteikens van so ‘n rewolusie sal wees.

Gewapende verdediging? Vluggeleentheid? Waarheen? Wanneer?

In die afwesigheid van enige objektiewe uiteensetting mbv gemotiveerde feite oor die bestaansmoontlikhede van so ‘n rewolusie, sal ek steeds onoortuig bly oor die uitvoerbaarheid van ‘n volskaalse en bloedige konflik in hierdie droewe land.

Ag ja.
Ek is nietemin oortuig dat gerugte van rewolusies eerder negatiewe gevolge inhou, as wat dit van veel nut vir mens of dier mag wees.

Christiaan Potgieter ·

‘n Rewolusie is in sy wese ‘n uitbarsting wanneer beheer verloor is. Ek kan dus net gedeeltelik met Jerry saam stem. Wanneer die lae intensiteit hand uitruk en temperatuur onverwags styg, kan ons in groot moeilikheid wees. Die staatsorgane wat die orde moet handhaaf kan moontlik letterlik en figuurlik te kort skiet, wanneer ons hulle nodig het.

Erika ·

Van dat die ANC wat vryheidsvegters is, aan bewind is, is ons in n rewolusie. Dit is hoekom ons nie meer n regering het nie, want waar het jy gesien vryheidsvegters kan regeer.

O wee, die gesang is uit! Die kommentaar op hierdie berig is gesluit. Kom kuier gerus lekker verder saam op ʼn ander artikel.