Waarom elke boer en sy span vir die DA moet stem

ina-cilliers-da

Ina Cilliers is ‘n DA-lid van die Gautengse wetgewer. Foto: Twitter.com

[Red] In aanloop tot die nasionale verkiesing op 8 Mei vanjaar gee Maroela Media politieke partye die geleentheid om hul menings oor verskillende kwessies wat kiesers raak op Maroela Media se debatsportaal te lug. Alle politieke partye is welkom om meningstukke vir publikasie voor te lê onderhewig aan die bepalings en voorwaardes van Maroela Media se redaksionele beleid.

Deur Ina Cilliers, DA-lid van die Gautengse wetgewer

Ek moes onlangs ’n kragopwekker koop om my boerdery tydens beurtkrag aan die gang te hou. Wanneer die krag afgaan, werk my kweekhuise se verkoeling nie meer nie, en ek kan nie die pomp aanskakel wat kos direk aan die plante se wortels lewer nie.

Sodra die kweekhuise warmer as 27 °C word, hou die plante op om te produseer. Ek het dus hierdie belangrike besigheidsbesluit met omsigtigheid hanteer.

Ek het navorsing gedoen, spesifikasies, werksverrigting en dieselverbruik vergelyk voordat ek rasioneel besluit het watter vervaardiger my besigheid gaan kry.

En ek gaan dieselfde proses volg met my stem in hierdie jaar se verkiesing.

Die ANC is nie meer die ontembare reus nie. Die speelveld is oop. Boere hoef nie meer ’n emosionele stem uit te bring wat gegrond is op verlore drome nie.

Ek kan stem vir ’n nuwe regering, en hier is ’n paar van die hoofredes hoekom my plaas vir die DA gaan stem:

  • Die DA verstaan dat jou plaas ’n minigemeenskap is. Dit help nie om plaasveiligheid, eiendomsregte, ekonomiese geleenthede en voedselsekerheid elk in sy eie boksie te plaas nie. Al hierdie elemente moet saamwerk om ons boere veilig en produktief te hou.
  • Om landelike veiligheid te bevorder, gaan die DA ‘n spesiale landelike veiligheidseenheid in elke polisiestasie wat ’n landelike gebied bedien, vestig. Hierdie spesialiste gaan die regte opleiding en toerusting hê, permanent in die gemeenskap wees en inskakel by die gemeenskapspolisieforums. Daar gaan ook aparte statistieke gehou word sodat ons die data kan verwerk en tegnologie kan inspan om veediefstel en plaasaanvalle te bekamp.
  • Die DA veg vir my reg om grond te besit. Hulle verstaan dat geen boer iets kan produseer as sy grondregte nie beskerm word nie. Waar die DA regeer, het hulle reeds honderdeduisende titelaktes aan begunstigdes oorhandig. Hulle praat dus nie net nie, hulle tree daadwerklik op.
  • As my boerdery klein is en minder as R30 miljoen per jaar genereer, gaan ek onthef word van alle verpligtinge ten opsigte van die arbeidswette, behalwe vir die Wet op Basiese Diensvoorwaardes. Dit gaan my in staat stel om meer mense geleenthede te gee om te groei in die agrimark.
  • As ek graag wil deelneem aan grondhervorming, sal die DA my ‘n geleentheid gee. In die Wes-Kaap is die suksespeil van grondhervormingsplase 72%. Dit is omdat baie van die projekte privaat is. Boere kan kies of hulle wil deelneem, hulle word vergoed, en hulle kry betekenisvolle ondersteuning van die provinsiale regering af.
  • Die DA veg teen korrupsie en werk hard om ’n bekwame staatsdiens te vestig. In DA-regerings is daar geen plek vir korrupsie nie, selfs al betaal ons ‘n politieke prys daarvoor soos met Patricia De Lille se saak. Jou waardes bly altyd opperbelangrik en soms moet jy die regte ding doen in plaas van die maklike ding.

Ek kan nie wag vir 8 Mei nie. Ons het potensieel minder as 40 dae van ‘n ANC-regering oor! Die DA se hele manifes is gebou op hoop. Hoop vir een Suid-Afrika vir almal.

Maar die kersie op die koek is dat hulle hoop kan rugsteun met ’n bewese prestasierekord, naamlik dat hulle reeds 15 miljoen mense onder hul regeringsvlerk het.

Dus, wie se “kragopwekker” gaan jy koop?

Hierdie plasing is deur ʼn onafhanklike persoon of onderneming saamgestel. Die menings en standpunte wat in hierdie skrywe uitgespreek word, is nie noodwendig die beleid of standpunt van Maroela Media se redakteurs, direksie of aandeelhouers nie. –Red

Deel van: Meningsvormers

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ʼn vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Kommentaar word ná 48 uur op ʼn artikel op Maroela Media gesluit. Kom kuier gerus verder op ʼn meer onlangse artikel.

138 Kommentare

jongste oudste gewildste
Leon van Rensburg

En voor jy jou oe uitvee het die DA ook jou plaas uitgedeel, droom maar aan Ina

Johan

Met die DA se uitsprake teen witmense kan ek nie glo dat daar nog mense is wat hulle stem sal gee vir daardie grap van ‘n party nie.

KrokodilBotha

Hahaha whatever. Ek twyfel sterk oor die manifes. DA kom agter hulle kry minder ondersteuning. VF+ baie dankie

Vra net

Die DA wil hê ek moet vir hulle stem. Ek het groot geword met spreekwoorde soos “haal eers die balk uit jou eie oog” en “Vee voor jou eie agterdeur” ens. Hoe kan ek stem vir iemand wat nognie om verskoning gevra het na hulle Elana Barkhuizen in die media onskuldig verguis het nie? Nog nie woord van “Jammer!” nie. Die partye het soos ‘n klomp besete goed tekere gegaan om haar te verguis. Toe sy onskuldig bewys is was hulle so stil soos die graf. Jammer DA, mooi woordjies veronskuldig nie dade nie. Maak eers reg en dan kom… Lees meer »

KrokodilBotha

DA propoganda. Kan nie glo die auntie raak die strooi kwyt nie