Wit studente ontwikkel ’n weersin weens dubbele standaarde

Screen Shot 2014-09-30 at 7.25.10 PMRasseverhoudings in Suid-Afrika het ʼn nuwe laagtepunt bereik na ’n reeks voorvalle by universiteite regoor die land.

Onlangs het twee damesstudente van die Universiteit van Pretoria (UP) hulself by ’n privaatpartytjie swart gesmeer. Kort nadat die foto die lig gesien het, is hulle summier uit hul koshuis geskors sonder dat ʼn ondersoek na die saak afgehandel kon word. Die DA se studente-organisasie, DASO, het klagtes teen hulle ingedien en die ANC-geaffilieerde studente-organisasie, SASCO, het alweer gedreig om universiteite regoor die land tot stilstand te bring. Die Menseregtekommissie (MRK) het ook ʼn ondersoek na die “skandaal” onderneem.

Kort daarna het nog ʼn foto op sosiale media die ronde gedoen. Hierdie keer het twee wit studente van die Universiteit Stellenbosch (US) hul gesigte by ’n vriend se verjaardagpartytjie swart gesmeer. Hulle het soos die tennissusters Venus en Serena Williams aangetrek. Ook hier het die media vinnig op die storie geklim: “Black face scandal hits Stellenbosch,” het een mediahuis berig. Soos verwag, het die universiteit ook hier in die openbaar verklaar dat ’n ondersoek gelas word en die studente was genoop om in die openbaar vir hul “wangedrag” om verskoning te vra.

Dit was nie lank nie, of die debat het op Twitter in ’n groot grap ontaard. Tientalle foto’s van swartmense wat hulself wit gesmeer het, het skielik opgeduik en die algemene vraag was waarom hierdie mense nie ook van rassisme beskuldig word nie.

Vroeër vanjaar het twee wit studente by die Universiteit van die Vrystaat (UV) ’n swart student raakgery. Die studente is daarvan beskuldig dat hulle dit doelbewus gedoen het en die swart student aangerand het. Dit is as ’n rassistiese daad bestempel. Die studente is sonder ’n dissiplinêre verhoor, op aandrang van die rektor, deur die universiteit geskors en selfs in die openbaar erg beledig. ’n Hof het hulle egter op alle aanklagtes onskuldig bevind en die MRK het bevind dat die voorval nie rassisties was nie. Kort na hierdie voorval het die teenoorgestelde gebeur nadat ’n wit student deur ’n swart student van sy bromponie af gestamp en aangerand is. Die swart student is ook aangekla, maar in hierdie geval het die universiteit in die openbaar geswyg en is die saak laat vaar nadat die student skuld erken het en ’n boete betaal het.

universiteiteBy die Potchefstroomkampus van die Noordwes-Universiteit (NWU) het die minister van hoër onderwys besluit om in te gryp nadat daar in die media berig is dat daar ʼn beweerde “Nazi-kultuur” op die kampus is. Die feit dat ’n onafhanklike ondersoek bevind het dat daar nie ʼn Nazi-kultuur op die kampus is nie, het egter nie die minister van stryk laat bring nie. In Rapport verklaar hy dat hy nie omgee wat enigiemand vir hom daaroor sê nie, omdat hy reeds oortuig is dat die studente hulle met Nazi-praktyke gebesig het. Valse beskuldigings van Nazisme word nou as ’n groen lig gebruik om die kampus “radikaal te transformeer”. In die proses word daar nou selfs gedreig om Afrikaans by die PUK saam met die badwater uit te gooi.

Kort daarna verskyn ’n rassistiese pamflet op die kampus met die woorde “Kill the Boer, kill the Racist, Kill Afrikaans.” Die ANC-gesinde Higher Education Transformation Network (HETN) reik ’n verklaring uit en verklaar dat daar bewerings is dat hierdie pamflet deur sogenaamde regses versprei is. Die organisasie was egter nie in staat om te antwoord wie hierdie bewerings gemaak het nie en dit blyk dat hulle die “bewerings” self uitgedink het.

Kort nadat die pamflet sy verskyning gemaak het, het die nuwe rektor van die NWU, prof. Dan Kgwadi, sy stem by hierdie sentiment gevoeg deur te verklaar dat die universiteit ’n ondersoek na die bron van hierdie pamflet gelas het, maar onmiddellik bygevoeg dat die moontlikheid dat die pamflet deur “regses” versprei is, nie uitgesluit word nie. ’n Afrikaanse dagblad wat hieroor berig het, het nie geskryf dat die moontlikheid van regse betrokkenheid “nie uitgesluit word nie”, maar sommer dat die pamflet nou “glo” deur regses opgestel is.

’n Mens kan maar net wonder waarom universiteitsbesture bereid is om in sulke gevalle so drasties op te tree, terwyl daar met handskoene opgetree word wanneer ANC-gesinde jeugleiers hulle aan wangedrag skuldig maak. Ek het self al hieroor by die UP-bestuur beswaar aangeteken. Die geval waaroor ek destyds gekla het, het ongelukkig veel meer as gesigverf behels. Dit het verband gehou met ʼn onwettige SASCO-protesoptog, waartydens klasse ontwrig is en studente met geweld gedreig is. In antwoord op my beswaar is aan my verduidelik dat ’n dissiplinêre proses ’n privaataangeleentheid is en dat die universiteit nie eers aan die klaer kan bekend maak watter stappe teen die betrokke studente geneem word nie. Die argument was dat dit die (seker maar toevallig swart) student se regte sou skend as inligting oor ’n dissiplinêre proses aan enigiemand anders as die beskuldigde gekommunikeer word. Sover my kennis strek is daar in hierdie geval nooit opgetree nie. Vreemd dat hierdie ingesteldheid klaarblyklik nie geld wanneer die gelaatskleur van die beskuldigdes anders lyk nie.

Een ding is egter seker: terwyl die rassismedebat by universiteite oor die land heen voortduur is rassespanning nie aan’t verbeter nie. Die teenoorgestelde gebeur eerder. Daar is ’n groeiende weersin onder wit jongmense aan die ontwikkel – ’n weersin wat gesetel is in die feit dat jong wit Suid-Afrikaners bloot op grond van die kleur van hul vel tot tweedeklasburgers gedegradeer word en deurlopend onder growwe vorme van dubbele standaarde gebuk moet gaan.

Hierdie plasing is deur ʼn onafhanklike persoon of onderneming saamgestel. Die menings en standpunte wat in hierdie skrywe uitgespreek word, is nie noodwendig die beleid of standpunt van Maroela Media se redakteurs, direksie of aandeelhouers nie. –Red

Ernst Roets

Meer oor die skrywer: Ernst Roets

Ernst Roets is die Adjunk-Uitvoerende hoof van Afriforum.

Deel van: Meningsvormers

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ʼn vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Die kommentaar op hierdie berig is gesluit. Kom kuier gerus lekker verder saam op ʼn ander artikel.

46 Kommentare

jongste oudste gewildste
Trots

‘n Kort en kragtig samevatting van nie net gemoedstemming op kampusse nie, maar oor die res van SA. In die lig van die gebeure wat die bogenoemde artikel uitwis, is die verskil tussen blankes en die “verontregte” nie-blankes dat die meerderheid van eers genoemde nie skaam oor hul vel kleur is nie. Ons kripeer nie elke keer sodra ons skeef aan gekyk of ons “boere” of whites of mlungu’s genoem word nie. Ons is gemaklik in ons velle en voel nie die wereld skuld ons iets nie. Ons weet wie ons is en waar ons vandaan kom, en al weet… Lees meer »

Trots

‘n Kort en kragtig samevatting van nie net gemoedstemming op kampusse nie, maar oor die res van SA. In die lig van die gebeure wat die bogenoemde artikel uitwis, is die verskil tussen blankes en die “verontregte” nie-blankes dat die meerderheid van eers genoemde nie skaam oor hul vel kleur is nie. Ons kripeer nie elke keer sodra ons skeef aan gekyk of ons “boere” of whites of mlungu’s genoem word nie. Ons is gemaklik in ons velle en voel nie die wereld skuld ons iets nie. Ons weet wie ons is en waar ons vandaan kom, en al weet… Lees meer »

Chris

Die rasstellende-aksie ANC-kaders wat in beheer van ons universiteite is, tesame met die Nasperskoerante wat by die regime gatkruip, doen alles met ‘n doel. Die hoofdoel is maar om van Afrikaans ontslae te raak en universiteite te transformeer sodat Engels en swart oorheersend is.

Chris

Die rasstellende-aksie ANC-kaders wat in beheer van ons universiteite is, tesame met die Nasperskoerante wat by die regime gatkruip, doen alles met ‘n doel. Die hoofdoel is maar om van Afrikaans ontslae te raak en universiteite te transformeer sodat Engels en swart oorheersend is.

Sellehier

Die wit dosente ook…sê maar net