Oom Herrie se kerrie: Van halfpennies tot talente

Argieffoto (Foto: nattanan23, Pixabay)

Die Cheetahs se grootste gevaar in die Pro14-reeks, aldus berigte, sou ene Halfpenny wees. Nou ja, klein bedrae en selfs breuke, het oom Herrie lankal geleer is nie iets wat ’n mens kan vlak kyk nie. Kyk net hoe het Naspers geblom met ’n stewige hand op die Chinese firma Tencent. En wie sal nou Tiekie van die sirkus ooit vergeet?

Maar ’n halwe pennie, vir diegene wat oud genoeg is om te onthou, kon in ’n stadium vir ’n man twee Wilson-toffies lewer. Maar ’n man moes ’n yslike klomp tuinwerk doen en nog die kar was voor hy ’n halfpennie ryker geword het. En stringe drop het ook danksy ’n halfpennie van hande verwissel.

In matriek het ons manne, wat ná skool agtergebly het vir skyfskietoefening, ons trommeldik aan slaptjips met sout en asyn geëet wat ons ouers ’n hele tien sent uit die sak gejaag het.

Dan sê die Bybel ons moet ons talente benut. Baie predikante en selfs Bybelvertalings verkies om die woord “muntstukke” te gebruik, want talente kan nogal ’n probleem oplewer.

Deur die loop van die Bybelse geskiedenis het ’n talent twee inhoudelike betekenisse gehad, maar nou ook nie vreeslik baie verskil nie. Punt is, ’n talent was ’n yslike lot silwer en selfs goud. In Kronieke lees ons dat die Ammoniete hul strydwaens teen 33,7 ton silwer gehuur het – ’n aanduiding dat talente nie vlak gekyk moes word nie. In Babilonië was ’n talent net onder die 50 kg.

Ná die koms van die Romeine was die talent steeds ʼn enorme bedrag, en een gelykstaande aan 6 000 denarii. ’n Denarius (’n Griekse geldeenheid) was die normale bedrag wat aan ’n werker betaal is.

Nou kom die heer in die gelykenis se woede oor die kneg wat die paar talente wat aan hom toevertrou is, in perspektief. Dit was ’n enorme bedrag geld wat hy vir veilige bewaring gaan begraaf het. Deur dit eerder rente te laat verdien, kon daar al ’n aardige bedraggie geld by gewees het.

So ons dink ons het nie eintlik talente nie? Dus ook nie talente om ten bate van die Here in te span nie? Wat dan daarvan om in ons binnekamer te bid vir ’n saak? Of ʼn vriend wat ’n geliefde aan die dood afgestaan het te gaan bystaan, of bloot gereeld by te gaan kuier. Eintlik het ons groot rykdom om te deel.

Ja, as ons ’n slag met ’n positiewe ingesteldheid gaan sit en konsentreer, gaan ons ontdek hoeveel talente ons het, en soos ons hulle inspan tot eer van die Here, hoeveel daar dalk nog iewers verskuil is.

Geen wonder baie predikante hou maar liefs by muntstukke nie. Sjoe, dink net hoe sou mense met vele talente moes kruiwastoot om talente, een-een van een plek na ʼn volgende te kan stoot.

Maar ons met minder talente, onthou maar dat die besit van talente wel ’n groot geskenk van die Here is, maar die eintlike geheim is die doeltreffende aanwending daarvan – al is dit nou ook die spreekwoordelike halfpennie wat met liefde aangewend word.