Stook jy of blus jy?

Foto: Pawel Janiak/Unsplash

My liewe Suid-Afrika, ons huis is aan die brand. Vir jare was daar baie van ons met emmertjies wat probeer het om die vlamme te blus, emmer vir emmer. Terwyl andere die vuur stook en nog hout bygooi. Ekstra stompe van haat, misdaad, onreg, geweld, korrupsie, swart ekonomiese bemagtiging, werkloosheid, swaarkry, belastingverhogings, verkragting en dood.

Een vir een het ons die emmertjies begin neersit. Party, uit pure moedeloosheid, het net gaan sit in sak en as. Party het gevlug, landuit, sak en pak. Party probeer net aan die lewe bly, een desperate asemteug op ’n slag. Ander het probeer terugveg – met gewere en woorde en buurtwagte en platgetrapte satellietskottels en getwiete vlaggies.

Maar die huis het bly brand. Terwyl dié wat water gooi al hoe minder word, het die vlamme groter en groter geraak. Dit is nie vlamme wat jou velkleur, jou vriendelikheid met jou anderrassige buurman of die grootte van jou bankrekening respekteer nie. Soos met enige vuur, is dit stom en onnosel. Dit brand alles. Dit brand almal. En in die huis sit onse president en sy vriende, soos Marie Antoinette van ouds, besig om hul knuppeldik te eet aan die koek waarvoor ons betaal. Hulle kan nog nie sien hoe die fondamente van die huis onder hulle uitbrand nie. Hulle lag en dans terwyl hulle nog ’n bietjie die soustrein aanstook, en nog ’n wolhaarstorie aan die wêreld vertel.

Maar die huis bly brand. Die klippe in die strate is te veel. Die gebrande voertuie is te veel. Die geplunderde winkels en trokke is te veel. Die video’s en foto’s op die internet is te grusaam en te veel. Die lyke van die vroue is te veel. Die trane oor ontvoerde dogtertjies is te veel. Die bloed van die boere kan nie die land aan die lewe hou nie. Die vrees is te veel – “#AmINext”? Die plase is ’n slagveld. Die stede is ’n slagveld. Die slaapkamers is ’n slagveld.

Die mense met die emmertjies kan nie meer keer nie. Genoeg is genoeg.

Die huis blý brand. Die wêreld kan nie ignoreer hoe die land in vlamme opgaan nie. Op elke lys van die slegste, is Suid-Afrika die wenner. En elke Suid-Afrikaner is die verloorder.

Want ons huis brand. Die tyd vir rusbankkommentaar is verby. Die tyd vir video’s en kommentare op sosiale media is verby. Die tyd vir aanlynpetisies is verby.

Dis tyd vir besluite: gaan jy veg of vlug? Is jy een van dié wat die vlamme stook of een met ’n emmertjie?

Daar is party wat die vlamme stook in die naam van dit wat “reg” is. Of in die naam van geskiedenis en hul interpretasie daarvan. Heelwat van hulle is te jonk om te weet wat werklik destyds gebeur het en hul tweedehandse haat is ál bewyse wat hulle kan lewer van goed wat lankal betekenis verloor het. Hierdie generasie sal nie 16 Junie onthou nie. Ons sal 6 September onthou.

Vir ’n oomblik hierdie week het ons almal paniekerig na die huis in vlamme gekyk en vergeet dat Sadrag, Mesag en Abednego sonder ’n rookreuk uit die vlamme gestap het. Maar hulle moes eers in die vlamme ingaan om te sien wat die Here kan doen. Dit was sekerlik nie maklik om tog aan te hou vertrou terwyl die vlamme aan hul klere lek nie.

En nou… nou lek die vlamme aan jou. Jy moet besluit: is jy geroep om vuur te slaan in hierdie land? Is jy geroep om op te staan en te veg? Is jy geroep om te sê genoeg is genoeg? Is jy geroep om die wêreld in te gaan en te vertel van wat gebeur sodat meer mense kan gaan help vuur blus?

Jou huis brand. Jou huis brand en jy kan nie stilbly en stilsit nie. Staan op. Trek jou wapenrusting aan. Jy moet nóú iets doen.

Dis tyd.

Meer oor die skrywer: René du Preez

René du Preez is ʼn projekbestuurder, ma en eggenote. Sy is passievol oor die natuur, mooi musiek en kuns. Skryf is vir haar ʼn manier om sin te maak van die wêreld en ʼn stukkie van haarself vir mense te gee. René en haar gesin woon tans in Nieu-Seeland.

Deel van: Rubrieke

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ’n vrywillige bydrae. Onthou – ons nuus bly gratis.

Maak 'n bydrae

Nou pra' jý

30 Kommentare

Nettie ·

Wat? Wat??? Wat moet – of kan – ek doen???

Ek is ‘n wit vrou, ongetroud, sonder afhanklikes of ‘n ondersteuningsnetwerk, met beperkte gesondheid, geld, hulpbronne en woon in ‘n plattelandse dorp; ek is in my laat 40’s – wat kan/moet ek doen???

Kallie Grafie ·

Nettie, Nieu-Seeland kan hoegenaamd nie met ons vergelyk word nie. Die skrywer kla met `n witbrood onder die arm. Skakel by die plaaslike kerk of ander organisasie in, en lewe jou lewe op jou eie manier. Nie almal het die vermoë om daadkragtig op te tree nie. Ek weet, want ek en jy is in dieselfde bootjie.

KrokodilBotha ·

Stem saam jou Dirk. Baie kla kouse hier. Klink ook soos jaloesie vir iemand anders se geluk en wysheid. Dis soos kuns wat Rene daar se , geskiedenis aan die maak. Sterkte daar in NZ

Anke ·

Hierdie het my hart so aangeraak, tot ek lees die skrywer van die artikel bly in NZ, dit is
so maklik om te sê: “ons huis brand” maar waar is jy, daar vêr in NZ waar jy gelukkig is en van buite af inkyk wat ons elke dag moet trotseer, dit voel of die skrywer ook op die soustrein is want sy is duidelik nie in SA nie. Jou artikel het hoop in my opgevlam tot jy homself geblus het.

Boer ·

Beste Rene

Jou woorde is deels waar. Ons wat bly en veg, weet al lankal wat wag. Ons het die keuse gemaak om nie weg te hardloop nie. Soos die oorweldigende meerderheid wat nie kan weg, wil ons nie weg. Die is ons huis. Ons ken Afrika en interessant as jy ons volk se geskiedenis ken, dan weet jy dis niks nuut nie. Baie dorpe is al afgebrand. Tog ons voorouers het gewerk, geveg en oorkom. Ons hoef en is nie paniekerig nie. Ons volk se leiers werk rustig onverpoos voort. Hulle is in SA en buite SA en kry ondersteuning v oral. Somtyds moet mens goed los, sodat dit goed kan brand. Sorg net dat jy nie naby die vuur staan nie. Met Genade v Bo kan mens enigiets oorkom.

KrokodilBotha ·

Ja Boer. Ek sien die NG kerk is ook opad , met Agri SA om jou plaas te kom vat.

John ·

Hoekom hou mense wat na die buiteland uitgewyk het aan om hulle te bemoei en vermoei met wat hier aangaan? Hoekom nie ‘n brief rig aan ‘n webwerf in Venezuela of Skotland nie? Om nou oor die grote see te skreeu ‘julle huis brand!’ Jy kan net mòre voor jou nuwe huis doodgery word… en? Diegene wat hier agtergebly het, loop in die Lig van Bo, indien ons Christene is. Hoekom moet almal jaloers gemaak word omdat jy skuldig voel oor jou uitwaartse besluit… Wow, julle huis brand… julle huis brand… oy, suster… koebaai!

Johane ·

Hierdie is n wonderlike artikel. Beskryf presies hoe ek voel. Dis hartseer om te sien, maar maak n passie in my wakker wat ek nooit van geweet het nie, n liefde vir volk en ons geskiedenis.
Sal die tyd kom dat Onse Vader ons HELE land kom red en die haat, moord, verkragting en ons vrees kom wegvat. Ek weet HY is oppad en is ons leidsman. Alles is deel van Sy plan en ons weet op wie ons kan vertrou. Dis tyd…..

Susan ·

Deur die eeue heen, het die land maar kort-kort gebrand. Die heel vroeë setlaars het beslis nie dit alte maklik gehad nie, ook nie die trekkers wat die binneland in is op soek na beter lewensomstandighede nie. Na die ABO moes boerebannelinge, hul vrouens en kinders uit konsentrasiekampe, oud kommandovegters wat wapens moes neerlê, terugkeer na afgbrande plase en met moeite weer begin bou. Daar was die rebellie, twee wêreldoorloë wat vooruitgang geknel het. Ek onthou my ouers se bekommernis in die sestigerjare tydens die Rivoniagebeure, hul ontsteltenis oor apartheid ( hulle was nie ondersteuners van die beleid nie) die opstande in die sewentigerjare en die grensoorlog, die opstande weer in die tagtigerjare en vroeë negentigs…….brande oorals.
En hier is ons nog steeds. Ek raak ook onrustig, ja. Maar nie moedeloos nie, want ek weet: Tot hiertoe het God ons gehelp. En dié God, wat beloof het hy is bý ons, is gister, vandag en môre dieselfde.

Petrus ·

As ek so deur u kommentaar gaan dan lyk dit tog of onse mense chronies in ‘n oorlewingstryd gewikkel is. Maar dinge gaan eintlik net afdraande.

Dalene Heydenrych ·

My aarde Rene,die huis brand en jy is veilig? in ander land.Ons moet NOU ons wapenrusting opneem waar is jy sussie?en wat gaan jy van doer ver af doen?Kalmte is nou nodig want uiteindelik bly Hoop,Geloof en Liefde al wat saak maak

Gemaskerde Sopbeen ·

Hahahahaaa…Haan. Net so. Ons ignoreer die Bybel, glo in Oom Siener, Google ons feite, doen sendingwerk deur Whatsapps…..en koop die Huisgenoot sodat ons Afrikaans kan voel!!….terwyl ons meer Engels praat as Afrikaans, al kan ons nie Engels praat nie….Ai, die mens”dom” darem….

Jimmy ·

Bou vir jou en jou kinders ‘n toekoms in Nieu Zeeland. SA is agter jou en deel van jou verlede.

George in Bloem. ·

En dit van iemand wat nie eers meer hier bly nie? Rerig? Pfffffffttt.

Jerry ·

Wanneer jy in SA is waar die huis brand kan jy nie lekker deur al die vlamme sien wat aangaan nie, die vlamme hou jou n bietjie vas, so wanneer iemand soos Rene van buite die vlamme, iets sien en dit deel met die wat in die vlamme vasgevang is, dan moet dit eerder maar gedeeltelik ter harte geneem word, asook gedeeltelik met n knippie sout. Onthou die beste stuurman staan aan wal, maar nie noodwendig altyd nie. So wat moet gedoen word om die vlamme te blus, want hoe meer jy blus, hoe erger word die vuur gestook. So, moet jy vlamme blus terwyl dit tans baie duidelik net meer vlamme tot gevolg het? Boosheid sal homself uitwoed en blus. Diegene wie verstandig is bly uit die pad uit van boosheid, wat n manier het om alles in sy pad met onheil te verswelg. So, as jy in SA is, moet nie in die vlamme vasgevang word wanneer die vlamme sterker is as jou poging om die vlamme te probeer blus nie, bly eerder uit die pad van die vlamme! Het enige pogings van enige opposisieparty of burgerregte of landbou organisasie die vlamme geblus, nee dit het nie, inteendeel het dit die vlamme vererger. Bly dus uit die pad van boosheid totdat boosheid homself uitwoed en blus! In Zimbabwe woed boosheid reeds vir vyf geslagte en nog is dit einde niet. Dit is duidelik dat boosheid nie geblus word totdat dit, dit self uitwoed en blus!

@Jerry ·

Weereens 100%. Daar is wysheid as jy die kwaad kan vermy. Die haat , rassisme en boosheid het SA oorgeneem, en dit sal voortbrand totdat die vuur nie meer suurstof kry nie.
Baie sal in die slag bly. Baie sal vlug, (soos die skrywer reeds het) en dié wat sal bly en oorleef sal uiteindelik die insigte hê wat nou ontbreek.

Koos ·

Jerry, soos gewoontlik praat jy baie, maar sê jy eintlik niks!!! Jy het ook mos weggehardloop?!

Jozi ·

Puik geskryf, dis hoe ons Suid-Afrikaners voel. Maar ek stem saam met kommentare hierbo.
Ons is hier, in ons huis en land wat brand.
Maar jy my liewe mens, jy sit daar doer ver saam met jou gesin.
Ek het een groot wens vir hierdie land van ons – dat ons so gou as nou kan losmaak van die verlede.
Dat ons mekaar kan “embrace” en respekteer.
Dat geen man, vrou of kind ooit weer armoede, hongersnood en desperaatheid hoef te beleef nie.
Dat God se liefde, vrede en seën met ons elkeen sal wees.

Delia ·

Nee Rene..ONS SUID AFRIKA…hierdie is nie meer jou Suid Afrika nie. Jou nuwe land is NZ.

Kallie ·

Ek is jaloers op Rene en ander wat nou in die buiteland woon.

KrokodilBotha ·

Gee die arme vrou n blaaskans. Kyk waar sit die NG kerk en Agri SA met die ander om die tafel om die boere se grond te help vat. Maar almal kla.

Swartwolf ·

Grootmond uit NZ, vra haar wat gaan sy doen om Christchurch 2 te stop. Hoekom word die snert geplaas ?

humor ·

Nettie wat van Solidariteid- helpende hand. Afri Forum en miskien sommer iemand baie naby aan jou in die dorpie waar jy woon. Beslis sal gebede help want dit is ons sterkste WAPEN.

author unknown ·

“Maturity is learning to walk away from people and situations that threaten your peace of mind, self-respect, values, morals or self-worth.”

Emmer ·

OPENBARING 14:18
en ’n ander engel wat mag oor die vuur gehad het, het uit die altaar uitgekom en met ’n groot stem geroep na hom wat die skerp sekel het, en gesê: Slaan jou skerp sekel in en samel die trosse van die wingerdstok van die aarde in, want sy druiwe het ryp geword.

Ons mense in SA, hou goeie moed, die tyd is naby. Ons karaktervorming is amper op die plek waar ons diensbaar gemaak kan word

O wee, die gesang is uit! Die kommentaar op hierdie berig is gesluit. Kom kuier gerus lekker verder saam op ʼn ander artikel.