Verbruikersake: As die skoene wat jy bestel nie opdaag

Foto slegs ter illustrasie. (Foto: Emily Pottiger/Unsplash)

Verbruikers het die afgelope twee jaar al goed geleer om aanlyn te koop, maar die feit dat ons beter raak daarmee, beteken nie dat daar nie probleme is nie. Gelukkig is die ombudsman vir verbruikersgoedere en -dienste altyd op die uitkyk vir ondernemings wat nie verbruikers se regte nakom nie en die ombudsman waarsku verbruikers nou teen ʼn onderneming wat skoene verkoop met die naam Sassy Heels. Ina Opperman het gaan kyk waarvoor verbruikers moet ligloop.

Die ombudsman het besluit om verbruikers teen Sassy Heels te waarsku nadat die kantoor binne twee dae agt klagtes ontvang het van verbruikers wat skoene bestel het by dié onderneming wat sake doen op sosiale media.

Sassy Heels het ook nie gereageer toe die ombudsman die klagtes onder die aandag van die onderneming gebring het nie. Sedert die kantoor die eerste klagte in Maart verlede jaar ontvang het, neem die klagtes toe.

Volgens die klagtes ontvang verbruikers ʼn bestelnommer sodra hulle betaal het, maar daar hou dit op. Die skoene word nie afgelewer nie en volgens die klaers is daar ook geen reaksie op hul klagtes nie.

Volgens die ombudsman is dit beslis ʼn rooi waarskuwingsliggie wanneer daar geen reaksie is op klagtes nie en dui dit moontlik daarop dat Sassy Heels nie van plan is om die skoene te lewer nie, al het verbruikers daarvoor betaal.

Toe die ombudsman se kantoor aanvanklik die klagtes teen Sassy Heels hanteer het, het die onderneming nie gereageer op versoeke om kommentaar te lewer nie. Die onderneming het egter na ʼn lang wagtyd wel op twee van die klagtes gereageer.

Die onderneming het erken dat daar klagtes was en het aangevoer dat die klagtes sonder enige vertragings opgelos en afgehandel sou word. Die ombudsman het egter later vasgestel dat die onderneming nooit met die klaers in verbinding getree het nie en dat die skoene steeds nie afgelewer is nie.

Volgens die ombudsman lyk dit asof Sassy Heels aspris die oplossing van die klagtes vertraag het deur te onderneem om die klagtes op te los maar dit nie gedoen het nie.

Wat sê die Wet op Verbruikersbeskerming?

Volgens artikel 19 van die Wet op Verbruikersbeskerming mag niemand geld vir bestellings aanvaar van verbruikers indien hulle nie beplan om die goedere te lewer nie. Artikel 19 handel oor verskaffers se verpligtinge met betrekking tot die aflewering van goedere en dienste en hul verantwoordelikheid indien aflewering nie plaasvind nie, sê Magauta Mphahlele, die ombudsman.

Hierdie artikel bepaal dat verskaffers verantwoordelik is daarvoor om goedere en dienste te lewer op die datum, tyd en plek waarop ooreengekom is, of binne ʼn redelike tyd nadat die transaksie beklink is.

Wanneer die verskaffer nie die goedere of dienste lewer soos afgespreek nie en geen alternatiewe planne maak om dit wel te doen nie, kan die verbruiker die transaksie kanselleer sonder om enige boete te betaal. Die verbruiker se geld moet ook terugbetaal word.

Mphalele moedig ondernemings aan om ʼn gedetailleerde beskrywing van die goedere of dienste te verskaf om te verseker dat verbruikers nie goedere bestel wat nie geskik is vir die doel waarvoor hulle dit koop nie.

Ander wenke vir aanlyn onderneming is:

  • Maak seker verbruikers weet wat die afleweringstyd is en laat hulle weet as daar vertragings gaan wees.
  • Maak seker die verbruikers weet van belangrike terme en voorwaardes, insluitende die teruggee van goedere en hoe om hul geld terug te eis.
  • Gee duidelike kontakbesonderhede en wie om te kontak indien daar geen reaksie is nie.
  • Vermy lokvinkbemarking of oorverkope deur seker te maak daar is genoeg voorraad en maak seker advertensies dui dit aan as die voorraad beperk is.
  • Moenie geld van verbruikers aanvaar as jy nie voorraad of mannekrag het om die goedere of dienste op die bepaalde tyd en datum te lewer nie.
  • Maak seker die verbruiker neem kennis van enige bykomende onkoste, soos afleweringskoste en kansellasiekoste.
  • Verskaf ʼn stelsel waarmee verbruikers hul aflewerings kan volg.
  • Maak seker die korrekte pryse word vertoon en indien daar ʼn fout insluip, laat die verbruiker weet en stel dit reg binne ʼn redelike tyd, anders moet jy dit teen die prys lewer wat aangedui is.

Wenke vir verbruikers:

  • Koop by aanlyn winkels met ʼn goeie reputasie en loop lig vir groot winskopies.
  • Vra aanlyn groepe vir hul menings oor ʼn onderneming waar jy nog nie voorheen gekoop het nie.

Kla hier:

Jy kan kla oor aanlyn ondernemings by die ombudsman deur die hulplyn te bel by 0860 000272.

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ’n vrywillige bydrae. Onthou – ons nuus bly gratis.

Maak 'n bydrae

O wee, die gesang is uit! Die kommentaar op hierdie berig is gesluit. Kom kuier gerus lekker verder saam op ʼn ander artikel.