Wenke hoe om skuld af te betaal

Deur Nicolene Steenkamp

(Foto: Maroela Media)

Spaar is makliker gesê as gedaan. Waar moet ek begin spaar as ek soveel skuld het om af te betaal?

Skuld in Suid-Afrika het astronomies toegeneem en huishoudings is in die algemeen in die knyp. Onlangse navorsing toon dat ongeveer tien miljoen mense slegte skuld het, met meer as drie maande lange agterstallige betalings.

Skokkend genoeg toon die statistieke dat mense gemiddeld agt lenings het. Hulle bestee meer as 70% van hul besteebare inkomste aan skuld wat terugbetaal moet word en verkeer dus in ʼn skuldstrik. Hierdie hartseer neiging het te midde van die Covid-19-pandemie toegeneem met skuld-tot-inkomste-verhoudings van meer as 100%.

Skuld ontstaan wanneer mense meer geld gebruik om ʼn spesifieke lewenstandaard te handhaaf wat nie deur hul inkomste toegelaat word nie. Wanneer jy jou oë uitvee, sit jy in ʼn skuldpandemie en weet nie hoe om daar uit te kom nie. Die groot nadeel van skuld is dat rentekoerse ontsaglik hoog is.

Hier is ʼn paar wenke hoe om jou skuld onder beheer te kry:

Bepaal die omvang van jou skuld

Voordat jy jou skuld kan begin afbetaal, moet jy weet hoeveel jy vir wie skuld. Om hierdie inligting op skrif voor jou te sien, gaan jou help om jou volgende stappe te beplan.

Maak ʼn lys van die volgende:

  • jou krediteure (almal vir wie jy geld skuld);
  • hoeveel jy vir elkeen skuld;
  • die betaaldatum van die uitstaande paaiemente;
  • die rentekoers wat jy betaal; en
  • boetes vir laat betalings.

Die onderstaande formaat kan jou help om die volgende te bepaal:

KrediteurTotale skuldBetaaldatumRentekoersBoetes
     
     

Stel doelwitte

Stel vir jou realistiese doelwitte soos: “Voor die einde van die jaar gaan ek een van my kredietkaarte se skuld afbetaal.” Deur doelwitte te stel gaan jy jouself motiveer om die skuld af te betaal. Skryf die doelwitte saam met jou algehele skuldlas neer.

Bepaal jou alledaagse besteding

Stel vir jou ʼn maandelikse begroting op. Die doel van die begroting is tweeledig.

  1. Om vas te stel hoeveel jy kan bekostig om op jou skuld af te betaal.
  2. Waarop jy jou inkomste uitgee en waar jy moontlik koste kan besnoei om eerder jou skuld af te betaal.

Indien jy onseker is oor wat alles in ʼn persoonlike begroting ingesluit moet word, kan jy hierdie begrotingstemplaat soos deur Akademia opgestel is, gebruik.

Betaal die duurste skuld eerste af

Jy het reeds vasgestel watter rentekoers jy op jou skuld betaal. Betaal die skuld met die hoogste rentekoers eerste af. Kyk wat jy kan bekostig nadat jy jou persoonlike begroting opgestel het en betaal meer as die minimum paaiement af op die skuld met die hoogste rentekoers.

Moenie nog skuld maak nie

Moenie nog skuld maak voordat jy nie jou doelwitte bereik het nie. Los jou kredietkaart en klererekeningkaarte by die huis wanneer jy inkopies gaan doen. Stel jou krediet­kaart so dat jy nie oorplasings na jou spaarrekening kan maak nie.

Gebruik ekstra inkomste om skuld af te betaal

Wanneer jy ʼn ekstra inkomste verdien, gebruik dit om skuld af te betaal. As jy bevoorreg is om ʼn bonus of dertiende tjek by jou werkgewer te ontvang, gebruik dit om jou skuld af te betaal eerder as om iets te gaan koop.

Verander jou leefstyl en gewoontes

Een van die groot redes hoekom skuld ontstaan, is om ʼn sekere lewenstandaard te handhaaf. Bepaal wat jy regtig nodig het en probeer afskaal op dit wat jy nie nodig het nie. Vra jouself af of dit regtig nodig is om elke dag op pad werk toe ʼn koffie te koop of elke dag middagete te koop eerder as om self jou middagete in te pak. Stel vas watter klein gewoontes jy kan verander sodat jy geld kan spaar.

Vergoed jouself

Beloon jouself wanneer jy jou doelwitte bereik het. Jy gaan meer gemotiveerd wees om jou skuld af te betaal wanneer jy nie daaraan dink as ʼn straf nie. Die enigste manier hoe jy jou skuld gaan afbetaal, is as jy aanhou met jou plan en gemotiveerd bly. Maak net seker jou beloning veroorsaak nie weer onnodige skuld nie.

  • Nicolene Steenkamp is die programkoördineerder van BCom (Finansiële Beplanning) by die Afrikaanse hoëronderwysinstelling Akademia.

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ’n vrywillige bydrae. Onthou – ons nuus bly gratis.

Maak 'n bydrae

Nou pra' jý

2 Kommentare

Eric ·

As jy net R50 per maand kan spaar beteken dit R600 vir n jaar. Die onverwagte uitgawe is altyd daar, en die 600 kan dalk help.

Het jy iets op die hart? Maroela Media se kommentaarfunksie is ongelukkig gesluit oor die Paasnaweek. Kom kuier gerus later weer!

Nuuswenke kan deur hierdie vorm gestuur word.