Maranée het A’s in Afrikaans, Engels, wiskunde, ekonomie, rekeningkunde, besigheidstudies, rekenaartoepassingstegnologie en lewensoriëntering behaal.
Sy gaan vanjaar BCom rekeningkunde aan die Noordwes-Universiteit se Potchefstroom-kampus studeer. “Ek gaan ʼn inwoner van Eikenhof-dameskoshuis wees. Die kampuslewe lyk so lekker, dit voel of ek dit al ken! My ma en my broer is oud-Pukke.”
Maranée het op skool ʼn liefde vir rekeningkunde ontwikkel. “Dit was my gunstelingvak.”
Sy het verskeie rolmodelle en beide haar ouers is vir haar ʼn inspirasie. “My ouers het ʼn groot invloed op my sukses. Hulle het my altyd ondersteun en motiveer. Hulle is vir my ʼn voorbeeld van mense wat hardwerkend is.”
Maranée skryf haar sukses toe aan volgehoue en harde werk. “Ek het elke dag my huiswerk gedoen want ek het geweet ek sal eendag die vrugte pluk.”
Sy was op haar skool se leerlingraad en het ook aan redenaarskompetisies deelgeneem. “Jy moet tyd maak vir vriende en familie. As jy nie balans het nie, sal jy nie voluit vir akademie kan gaan nie.”
Maranée se lewensfilosofie is:
Doen jou bes en die Here sal sorg vir die res.