Boer gee stukkie mielieland prys om jawoord te vra

Tiaan en Andrea nadat hulle verloof geraak het (Foto: Verskaf)

ʼn Vrystaatse mielie-en-boontjieboer het die grootste opoffering gemaak toe hy ʼn deel van sy mielieland prysgegee het om sy geliefde te vra om met hom te trou.

Tiaan de Wet (25) het sy meisie van die afgelope drie jaar verras deur die woorde “trou met my” in die mielieland op die plaas Mooigelegen buite Kestell te vertoon tydens ʼn helikopterrit oor die plaas. Maar ten spyte daarvan dat die meeste mense gedink het hy het dié letters uit sy mielieland gesny, het hy eintlik al lánk voor die tyd die projek begin aanpak, want dié mielies is so geplant.

Andrea Bierman (22), De Wet se verloofde, het aan Maroela Media vertel dat sy heeltemal onkant betrap is.

“Ek het dit glad nie verwag nie. Tiaan se ma het die vorige aand gesê daar is roes op die mielies omdat daar hael geval het. Hulle het gesê Tiaan se pa gaan met die helikopter vlieg om te kyk wat die skade is en ek moet saamkom. En ek het nogal die storie geglo!” het Bierman gesê.

Die woorde wat Tiaan ‘n jaar gelede so laat plant het (Foto: Verskaf)

Bierman was eintlik nog onseker of sy wou saamgaan, want sy was nie lus om so vroeg op te staan nie. Maar die volgende oggend het Tiaan haar met koffie in die bed wakker gemaak, sodat sy móés saamgaan.

“Ek belowe ek het régtig probeer kyk vir roes en toe sien ek die woorde daar staan,” het sy gesê.

Sy het aanvanklik nie verstaan wat aangaan nie. Sy het toe na Tiaan langs haar gekyk. Hy het begin lag en die ring uit sy sak gehaal.

“Alles het so vinnig gebeur, ek het eers later besef ek het nooit ‘ja’ gesê nie! Dit het my baie spesiaal laat voel,” het sy gesê.

Tiaan en Andrea trou in Augustus 2019 (Foto: Verskaf)

“Wat die beste is, is dat die meeste mense wat die foto’s op sosiale media sien, dink Tiaan het die woorde uitgesny, maar hy het nie. Hy het dit al verlede jaar so geplant! Hy het net gewag dat dit reën sodat dit kan groei.”

Bierman het gesê lank terug het iemand vir hulle gevra wanneer hulle verloof gaan raak, en toe sê De Wet se pa dat dit een van die dae gaan reën. Destyds het sy nie verstaan hoekom hy dit sê nie, maar nou weet sy.

Sedert hulle verlowing kry hulle baie kommentaar oor die jawoord-vraag en mense keer hulle in die dorp voor om verder uit te vra. Daar is ook mense wat toevallig oor die plaas gevlieg het, De Wet se handewerk gesien en hom op sosiale media sterkte toegewens het.

Bierman en De Wet het op 17 Februarie verloof geraak, en beplan om op 10 Augustus vanjaar te trou.