Beginet, ʼn bediening wat fokus op gesinstabiliteit, het sy deure amptelik op Vrydag 13 Julie in die Jakarandastad geopen.
Warren Brosnihan, ʼn bekende in rugbykringe en ondersteuner van Beginet, het die geleentheid gelei en ds. Deon van den Berg, stigter van die bediening, het aan die gaste die inspirerende storie van Beginet se ontstaan vertel.
“Beginet sê gaan oor tot aksie en neem verantwoordelikheid vir jou lewe. Waar jy ook al nou is, begin net vandag met die eerste tree na ʼn beter lewe wat daar in die Here God vir jou moontlik is. Uiteraard begin die pad na ʼn beter toekoms by jouself en jou belangrikste verhouding – die een met jou Skepper,” het Van den Berg gesê.
Van den Berg het bygevoeg dat die bediening wil help om gemeenskapstabiliteit te bevorder deur gesinne te stabiliseer en te ondersteun.
Die gaste, wat sakelui, politici en die media ingesluit het, het oorweldigend positief gereageer op die nuus dat die programme wat Beginet aanbied gratis gedoen sal word om alle gesinne wat hulp nodig het, te bedien.
Na afloop van die verrigtinge in die saal van Radio Kansel, het gaste beweeg na die nuwe kantore van Beginet, waar Doris Msibi, ʼn voormalige mevrou Suid-Afrika, die lint geknip en gaste na binne genooi het.
“Die kantore dien as basis, maar die bediening word landwyd uitgerol en maak ook gebruik van klankgolwe van gemeenskapsradiostasies om elke gemeenskap moontlik bereik.
“Gesinne bestaan uit ouers, ʼn huwelik en kinders en daarom fokus Beginet op volwassenes sowel as kinders. Die bediening sal uitreik met programme vir verhoudings binne gesinne, asook hersaamgestelde en enkelouergesinne, asook huweliksverhoudings. Die finansies van die gesin word ook as deel van die programme behandel,” het Van den Berg gesê.
Die bediening is nog in sy babaskoene en materiaal is tans net in Afrikaans beskikbaar, maar Van den Berg sê daar word reeds aan Engelse bedieningsmateriaal gewerk en hulle sal hulle programme later ook in ander Afrika-tale beskikbaar wil stel.
- Beginet se kantore is in Kilnerpark, Pretoria, en lesers is welkom om navrae aan die bediening te rig deur ʼn e-pos te stuur aan [email protected] of [email protected].
Baie geluk Deon. Ons wens julle alle seen toe by Beginet.
Baie dankie Thys
Deon, ek het jou vroër die jaar ontmoet. Hierdie nuwe bediening vul beslis ‘n leemte in ons samelewing. Sterkte en ek bid ons Vader se seën op jou en jou span!
Derek. Baie dankie vir jou ondersteuning en gebed. Kom kuier gerus by die kantoor
Baie geluk Deon. Ons wens julle sterkte, seen en voorspoed toe.
Baie dankie Susan