Die Wild Heart-natuurlewestigting in Johannesburg het onlangs ʼn projek van stapel gestuur om ʼn veilige hawe vir 20 leeus te vind wat in aanhouding gebore is.
Volgens Paul Oxton, stigter en direkteur van dié stigting, kan die leeus van die #Life4Lions-projek wat in aanhouding geteel is nooit in ʼn natuurlike habitat vrygelaat word nie, maar slegs in veilige en kleiner reservate gehuisves word.
“Die geriewe waar die leeus tans aangehou word, is oorvol en die roofdiere sal binnekort uitgeplaas moet word om hulle oorlewing te verseker.”
Verskeie van die leeus het reeds inentings, veeartsenykundige sorg en mikroskyfies in die eerste fase van dié projek ontvang. Twee leeumannetjies, Rafiki en Hatari, is ook gesteriliseer om te verseker dat daar nooit met hulle geteel kan word nie. Dit help om die leeus te beskerm teen enige uitbuitende praktyke soos blikjag- en onetiese teelbedrywe, wat gewoonlik uitloop op die onwettige handel van leeubeendere.
Wild Heart het ʼn skarefinansieringsveldtog van stapel gestuur op die BackaBuddy-platform om die verskuiwing en vervoer van die halfwilde majestueuse wesens te finansier.
Die geld wat deur dié projek ingesamel word, sal ook gebruik word om vir veeartsenykundige prosedures, sorg en ondersoeke te betaal. Dit sal verder aangewend word om die vervoerkoste te dek vir besoeke aan potensiële reservate en veilige hawens vir lede van dié groep leeus.
Met die tweede fase van die #Life4Lions-projek wil die stigting R27 500 insamel en het reeds meer as R2 600 van skenkers hiervoor ontvang.
“Ons glo dit is ons taak om te verseker dat hierdie groep leeus die kans kry om so gelukkig en vry moontlik te wees, sonder menslike wisselwerking of uitbuiting.
“Daar is tans net te veel leeus in aanhouding in Suid-Afrika en die verwoestende werklikheid is dat talle van dié diere uiteindelik aan geblikte jaggeriewe verkoop word, of in die handel van leeubeendere eindig,” sê CJ Carrington, nog ʼn stigterslid van die organisasie.
Die Wild Heart-natuurlewestigting is ʼn klein niewinsgewende organisasie, wat glo in etiese natuurbewaring waar die welsyn van natuurlewe eerste kom.
- Volg die Wild Heart-natuurlewestigting se werksaamhede op Facebook of besoek sy webwerf vir meer inligting.
- Jy kan die #Life4Lions-projek ondersteun deur ʼn skenking op die BackaBuddy-platform hier te maak.
As ek nou n miljoener was, het ek al die geld gegee! Dankie vr julle goeie daad en goeie werk wat julle doen.
Ek het groot erf. Kan ek een kry
‘Fals nuus’ geblikte jag is verbode in SA. Gebruik weer emosie om geld in te samel.
‘Fals’?
Geblikte jag mag dalk “verbode” wees, maar dit gebeur nog. Net soos diefstal, motorkapings, moord, verkragting, ens. “verbode” is en nogsteeds plaasvind
Ek hoop hulle kry ‘n goeie tuiste gou. As ek die spasie en die plek gehad het, het ek hulle almal geneem.