Ná beproewing wil hy ander help

Greg Bertish. (Foto: Verskaf)

Die welsynsorganisasie The Little Optimist Trust wil leerlinge van ʼn Wes-Kaapse skool vir kinders met spesiale behoeftes ophef deur hul koshuiskleedkamers ʼn broodnodige opgradering te gee.

Sowat 45 uit die 300 leerders van die Astra-skool vir fisieke en verstandelike gestremde kinders in Montana, Kaapstad, is van die skool se koshuisgeriewe afhanklik.

Dié geriewe is egter tans nie vir alle leerders se behoeftes ingerig nie en veral rolstoelgebruikers sukkel omdat die koshuis se storte nie in ʼn werkende toestand is nie.

Daarom hoop Greg Bertish, stigter van The Little Optimist Trust, om teen Oktobermaand vanjaar R70 000 deur skarefinansiering in te samel om fase een van dié projek – wat die aankoop van genoeg boumateriale om twee badkamers te herstel insluit – van stapel te stuur.

Leerlinge van die Astra-skool. (Foto: Verskaf)

Dié organisasie is daarop ingestel om mediese, opvoedkundige en kinderversorgingsfasiliteite en -instellings met beperkte hulpbronne op te knap en het reeds teëls, baddens en wasbakke ter waarde van R133 000 van Italtile-winkels regoor die land ontvang om in die Astra-skool se koshuisbadkamers te installeer.

“Met bykomende ondersteuning is ons optimisties dat ons dié projek in Oktober kan begin. Ons hoop dat die publiek saam met ons ʼn betekenisvolle verskil in die lewens van hierdie wonderlike kinders sal maak deur dié tipe fasiliteite – wat so baie van ons as vanselfsprekend aanvaar – aan hulle beskikbaar te stel,” sê Bertish.

Endokarditis, ʼn lewensgevaarlike tipe inflammasie van die hart se binneweefsel, is op die ouderdom van 30 by dié 51-jarige branderplankryer en seiljagter van Kommetjie in die Wes-Kaap gediagnoseer. Sy hart het gevolglik met 30% vergroot en hy moes noodopehartchirurgie ondergaan en het 200 dae in die hospitaal deurgebring.

Die Astra-skool se kleedkamers het dringende opknappingswerk nodig. (Foto: Verskaf)

Volgens Bertish het die lewensveranderende gesondheidsreis hom geïnspireer om ʼn kinderboek, The Little Optimist, neer te pen.

Dié boek speel af op die Langebaan-strandmeer en vertel die verhaal van ʼn klein seilbootjie wat leer om teëspoed te oorkom en sy drome te verwesenlik. “My droom was dat die boek jonges sal leer dat hulle ongeag enige siekte, uitdaging of agterstand steeds kan floreer en hulle passies en doelwitte kan nastreef,” vertel hy.

Daaruit het die Little Optimist Trust die lig gesien en kon die organisasie reeds meer as R3,2 miljoen insamel en meer as 500 000 kinders bystaan.

Volgens Melanie Mabotha, hoof van die Astra-skool, sal Bertish se projek nie net dié skool se leerlinge toegang tot beter fasiliteite gee nie, maar ook help om hul waardigheid te herstel. “Hierdie tipe inisiatiewe beïnvloed meer as die kinders se fisieke struikelblokke. Dit dien vir hulle as bewyse dat iemand omgee en bied vir hulle die liefde, hoop en positiwiteit wat baie van hulle broodnodig het.”

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ’n vrywillige bydrae. Onthou – ons nuus bly gratis.

Maak 'n bydrae

Nou pra' jý

Een kommentaar

Anel ·

Dit wys net weer dat ons regering geen erns het met hierdie land se kinders nie. Hulle kan nie help vir hul ligaamlike toestand nie, maar die is die regering se plig om te sorg dat ook hierdie kinders met waardigheid behandel word. Om ‘n gebreekte liggaam te hê is nie te sê dat daar ook fout is met jou verstand nie. Hoekom hulle minder waardiger ag as kinders sonder gebreke? Dit was nog altyd vir onverstaanbaar.

O wee, die gesang is uit! Die kommentaar op hierdie berig is gesluit. Kom kuier gerus lekker verder saam op ʼn ander artikel.