Nou kan sy matriekafskeid toe gaan, danksy weldoener

Ronel Lombaard. Foto: Verskaf

Ronel Lombaard. Foto: Verskaf

ʼn Weldoener van Pretoria-Noord het ʼn matriekmeisie se grootste wens – om haar matriekafskeid by te woon – laat waar word.

Die 18-jarige Ronel Lombaard van die Hoërskool Gerrit Maritz in Pretoria moes vroeër vanjaar hoor dat sy moontlik nie haar matriekafskeid sou kon bywoon nie, omdat haar ouers, wat in Kuruman werk, geraak gaan word deur mynafleggings.

Magda Bylsma, Ronel se ma, het aan Maroela Media vertel sy moes vroeër vanjaar dié slegte nuus met haar dogter deel, omdat die gesin onder erge finansiële druk verkeer.

“Mense oor die hele land is in die knyp omdat daar nie geld is nie. Die myne maak toe en daar is oral afleggings. Dit het my hart gebreek om vir my dogter te sê sy kan dalk nie na die geleentheid gaan waarna matrieks heeljaar uitsien nie,” het sy vertel.

Magda het haar dogter egter belowe dat sy alles in haar vermoë sal doen om haar in staat te stel om steeds die matriekafskeid by te woon. “Ek het gesê, sussie, ek sal kyk wat ek kan doen, maar ek weet nie waar ek die geld gaan kry nie.”

Maroela Media het vroeër berig oor ʼn voorval waar ʼn bruid van Kanada se rok, net voor haar troue, tydens ʼn brand verwoes is.

“Wens daar was so ʼn engel in Suid-Afrika om my dogter te help met ʼn matriekafskeidrok,” het Magda, sonder enige verwagting, onderaan die berig kommentaar gelewer.

ʼn Weldoener van Pretoria het vinnig met Magda kontak gemaak.

“Die vrou het aanvanklik gesê sy sal kyk wat sy kan doen,” het Magda verduidelik. “Toe bel sy ʼn rukkie later terug en sê maak nie saak wat nie, ons gaan haar by die matriekafskeid kry.”

Die weldoener het intussen ʼn rok vir Ronel uit haar eie sak gereël en boonop gesorg dat haar grimering en naels die aand foutloos sal wees met ʼn professionele fotosessie om die aand te verewig.

“Hoe kan ʼn mens dankie sê? Dis alles net genade. Die vrou het my vertel sy lees nooit eens die kommentaar nie, omdat mense te goor is met mekaar. Sy het egter wel daardie dag die kommentaar gelees, en dit het ons lewe geraak.”

Ronel se groot aand is op 25 Oktober wanneer die Hoërskool Gerrit Maritz sy matriekafskeid hou.

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ʼn vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Kommentaar word ná 48 uur op ʼn artikel op Maroela Media gesluit. Kom kuier gerus verder op ʼn meer onlangse artikel.

34 Kommentare

jongste oudste gewildste
Gesiggie

Magda daar is baie mense in die lewe wat weens finansies nie meer kop bo water kan hou… dit is niks om voor skaam te wees, en ek Glo elke Ma wil net die beste vir haar kind doen, en as ek in jou omstandighede was tydens my dogter se matriek afskeid .. sou ek ook vir hulp gevra het, hierdie is n baie spesiale en groot dag… Dankie aan n Engel van Pretoria.. dat jy jou hart oop gemaak het vir die Ma en haar Dogter.. Ronel… ek weet jy gaan sommer stunning lyk.. geniet jou Matriek afskeid…( Van… Lees meer »

Snuffels

Baie dankie aan die weldoener wat Ronel se droom waar laat word het, dit is wonderlik.

Ronel geniet dit. Sterkte aan Magda en gesin. Dit is so hartseer om te hoor van al die afleggings, ons almal word daardeur geraak, en dit gaan nog baie erger word.

Magda

Baie dankie almal
Hierdie dierbare ma huil haar oe elke keer uit as sy aan die goeie nuus dink
En hoe sy soos n prinsess gaan lyk

Maria

Ronel het jy al skoene en wat se nommer skoen dra jy?

Magda

Maria sal uitvind van die skoene
@Met Liefde… weereens baie dankie