Skoolkoor ‘uit die veld geslaan’ oor reaksie op Queen-video

‘n Skermskoot uit die video.

ʼn Projek deur Hoërskool Rustenburg se skoolkoor om iets uniek te doen “wat bietjie anders as ʼn gewone CD is”, het oornag van dié koor ʼn Suid-Afrikaanse gunsteling gemaak.

Dié skool het Maandag ʼn video op hul Facebook-blad gedeel van hul skoolkoor se vertolking van Queen se bekende Bohemian Rhapsody. En die reaksie was verstommend!

“Ons is uit die water geblaas deur die reaksie. Ons het dit regtig nie verwag nie, maar ons is baie opgewonde daaroor,” sê Bernhard Visser, ʼn lid van die skool se beheerliggaam.

Teen Woensdagoggend is die video van die skool se indrukwekkende vertolking al meer as 600 000 keer op Facebook gekyk en meer as 23 000 keer gedeel. Duisende sosialemediagebruikers het ook op die video kommentaar gelewer. “Absoluut briljant! Die vervaardigingspan, die koor, die videoredigering – dit is wêreldklas!” skryf een gebruiker. “Ek trek Rustenburg toe net sodat my kinders by hierdie skool kan skoolgaan. Briljant. Fantasties. Ongelooflik,” skryf ʼn ander.

Visser vertel aan Maroela Media die idee vir die video kom al ʼn paar maande. Die skoolkoor het vantevore al CD’s uitgebring, maar dié jaar wou die beheerliggaam graag iets meer uniek doen. “Die groot rede hiervoor is om ʼn nalatenskap vir die kinders te skep. Sodat hulle eendag vir hul kleinkinders kan wys, ‘kyk, hier het ouma of oupa in my skoolkoor gesing’,” sê hy.

Die skool het ʼn skarefinansieringsinisiatief van stapel gestuur om die geld in te samel om die video te maak en toe hulle genoeg geld bymekaargemaak het, kon hulle wegspring. Die musiekopnames is voor die tyd gedoen en die video is verlede week by The Rand Club in Johannesburg deur ʼn professionele videovervaardigingspan geskiet met Andrew Timm as regisseur.

Die koorleier, Ralf Schmitt. (Foto: Facebook)

En die man agter dié ongelooflike vertoning? Niemand anders nie as die skool se koorleier, Ralf Schmitt, dieselfde man wat verantwoordelik is vir die Ndlovu Jeugkoor se wegholsukses op America’s Got Talent.

“Ralf is ongelooflik. Hy is ongelooflik passievol oor wat hy doen en doen dinge net op ʼn ander vlak. Ons is absoluut bevoorreg om hom as koorleier te hê,” sê Visser. “Saam met Madeleen Koch en Lize Meyer is ons koor net in ongelooflike hande.”

Schmitt het die verwerking van die liedjie gedoen en saam het hulle die konsep vir die video aanmekaargesit. Kykers sal boonop ook een van die koorlede herken wat ʼn solo in die video sing. Dit is niemand anders nie as Bernice West, die tweedeplekwenner van die jongste seisoen van Maak my Famous.

Selfs met so ʼn uiters talentvolle koor en ysterspan aan die stuur van sake, is die koor oorweldig deur die reaksie op die video. “Ons is uit die veld geslaan, dit is ongelooflik,” sê Visser.

“Natuurlik is die skool baie trots op ons koor. Ons koor is ʼn ander tipe koor, dit is nie die tradisionele ‘kompetisiekoor’ nie. Ons fokus is regtig daarop om musiek te maak wat vir die luisteraar lekker is om te hoor en die reaksie wat ons kry op dié video, wys ons dat ons suksesvol is met wat ons doen.”

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ʼn vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Kommentaar word ná 48 uur op ʼn artikel op Maroela Media gesluit. Kom kuier gerus verder op ʼn meer onlangse artikel.

77 Kommentare

jongste oudste gewildste
Essa

Puik! Briljant! Soveel talent! Ja, baie geluk aan almal betrokke by hierdie grootse produksie. Ralf Schmitt jy is ‘n ster.

Wurmpie

FANTASTIES,WONDERLIK WAT Ń MOOI VERTONING

ella

wow… die beste wat ek nog gehoor het. Fantastiese stem beheer en afronding.

Arsène Lupin

Fantasties!
Julle maak ons trots!!

Sanna

Ongelooflik! ‘n Skoolkoor? Welgedaan!