Sy liefde vir Adoons lei tot Boggom-manewales  

Ian de Jager. (Foto: Verskaf)

Ian de Jager van Pretoria was nog altyd lief vir skryf, maar het nooit gedink dat hy ʼn lewe daaruit sou kon verdien nie.

Toe hy die derde keer in ses jaar afgelê is, was dit juis sy humoristiese skrywes wat hom gehelp het om positief te bly te midde van sy finansiële verknorsing.

Vandag is De Jager se Facebook-blad, Boggom, waar hy sy spitsvondige skrywes deel, 40 000 volgelinge sterk en het ʼn suksesvolle sakeonderneming uit dié liefde vir skryf gespruit.

“As ʼn klein kannetjie het oom TO Honiball se strokiesprente my vreeslik gefassineer. Oom Kaspaas se aandik-stories en ‘nefie’ wat dit moes aanhoor het my laat skaterlag, maar Adoons-hulle se kaskenades was verreweg my gunsteling,” vertel De Jager.

“Baie jare later, danksy Facebook, het ek ʼn punt in my lewe bereik waar ek my skryftalent met uitgesoekte vriende en familie kon begin deel. Die terugvoer uit hierdie binnekring was ongelooflik positief en het my genoeg selfvertroue gegee om [in September 2016] my eie Facebook-blad te stig onder ʼn skuilnaam.

“My eerste keuse was natuurlik Adoons, maar ek het by nabetragting op Boggom besluit uit respek vir oom TO se werk.  Die naam is vanselfsprekend ʼn kopknik na die oorspronklike Adoons, wat moontlik vêrlangs familie van Boggom mag wees.”

Boggom se gewilde skrywes het uiteindelik gelei tot ʼn suksesvolle sakeonderneming waardeur egte vellies aanlyn verkoop word. (Foto: Verskaf)

Nadat De Jager vir ʼn derde keer afgelê is, het hy begin om klein sous- en dranktafeltjies uit hout te vervaardig en aanlyn te verkoop onder die Boggom-handelsnaam. “Terselfdertyd het ek weekliks ʼn humoristiese ‘Boggom-berig’ geskryf om myself op te beur, en dit Vrydagmiddae op my Facebook-blad geplaas. Die Boggom-berig was ʼn komiese opsomming van die week se gebeure in my plaaslike gemeenskap,” vertel hy.

Nooit sou hy kon dink dat dié Boggom-berigte só gewild sou wees nie. Spoedig het hy derduisende Afrikaanse aanhangers van reg oor die wêreld op sy Facebook-blad gelok, wat hy tong in die kies die “boggomjane” gedoop het. Gou het sy volgelinge sommer self besluit om hulle in die kommentare te onderskei as “BoggomJanne” vir die mans en “BoggomJanas” vir die vroue, vertel De Jager.

Maar die Boggom-manewales het nie net by skryf gebly nie en later het De Jager sy entrepreneursvaardighede ingespan om te verseker dat die Boggom-handelsnaam kan voortleef.

“Ek wou sedert Boggom se ontstaan ʼn produk aan die trop smous wat net so uniek soos Adoons en sy familie sou wees, maar tog ook deel vorm van ons Afrikanerkultuur en geskiedenis. Kwaliteit, handgemaakte vellies waarmee jy kan bergklim soos ʼn wafferse bergbobbejaan was dus net die ding.”

In Februarie vanjaar het De Jager Boggom Vellies bekendgestel, natuurlik met unieke tong in die kies name gepas vir Boggom! Die vellies vir mans is na drie bergreekse geoem om by die “bobbejaan klim die berg”-tema in te skakel, naamlik die Magaliesberg-vellies, die Sederberg-vellies en die Drakensberg-vellies.

Daar is natuurlik ook voorsiening gemaak vir die “BoggomJanas” met die Bergpatat-vellies wat spesifiek vir vroue ontwerp is. “ʼn Vroumarathon-atleet het net nou die dag laat weet dat sy haar Bergpatatte bo haar hardlooptekkies verkies. Indien dít nie ʼn getuigskrif vir Boggom-vellies se gemak is nie, weet ek jou wrintiewaar nie,” lag De Jager.

Hy beplan om binnekort nog Boggom-produkte bekend te stel, maar is voorlopig eers geheimsinnig oor watter produkte beplan word.

Ian de Jager sê die vellie-verkope gee hom die geleentheid om aan te hou skryf. (Foto: Verskaf)

Sy raad aan ander entrepreneurs? “Doen sover moontlik alles self, na die beste van jou vermoë. As jy nie weet hoe nie, leer hoe. Destyds moes ek biblioteek toe; deesdae is daar ʼn YouTube-video wat jou sal wys hoe om feitlik enigiets onder die son baas te raak,” sê hy.

“ʼn Uitstekende, kwaliteitproduk is jou eerste stap; innoverende maniere om jou produk te bemark is die volgende. Moenie ʼn skaap wees wat bloot die trop volg nie – wees anders. Bemark anders. Dink anders.”

En natuurlik, lang ure, harde werk en opoffering. “Dit neem ongeveer tien jaar om ‘oornag’ ʼn sukses te word. Wees bereid om harder te werk as wat jy in jou lewe nog ooit vir iemand anders gewerk het. Indien deursettingsvermoë en ywer nie twee van jou sterkste punte is nie, laat vaar jou idee sommer nou.”

Maar aanhangers van die Boggom-berigte hoef nie bekommerd te wees dat Boggom se skrywes binnekort gaan opdroog nie – dit bly steeds De Jager se groot passie en die rede hoekom hy doen wat hy doen. “Die vellie-verkope help ʼn mens natuurlik om aan die lewe te bly en dan aan die skryf te bly,” sê hy.

En dit is danksy sy “trop boggomjane” wat hy aanhou skryf, erken hy. “Elke dan en wan kry ek uit die bloute ʼn riem-onder-die-hart kompliment van iemand wat ’n plasing geniet het, of wie se dag ek kon inkleur deur middel van ʼn pittige plasing of ʼn komiese kwinkslag. Dit is ongelooflik inspirerend en hou dit my aan die skryf.”

Boggom het sommer vinnig ‘n reuse groep volgelinge op Facebook opgebou met sy humoristiese skrywes. (Grafika: Verskaf)

Dit is juis Boggom se kwinkslae en spitsvondigheid wat hom so gewild onder aanhangers maak. “Ek het baie beslis my sin vir humor by my dierbare ma geërf,” sê De Jager. “Sy het al die stampe, stote en geweldige beproewinge wat sy in haar lewe ervaar het – selfs tot en met haar dood aan kanker op ʼn vroeë ouderdom – vierkantig in die oë gekyk en met ʼn glimlag die hoof gebied. Die grootste les wat ek by haar geleer het, was om mense rondom jou se lewe op te vrolik. Hopelik doen ek juis dit deur middel van my skrywes, uitlatings, en spitsvondigheid.”

Hoe lyk Boggom se toekomsplanne? “Die onmiddellike plan is (nog steeds) om genoeg te verdien om aan die lewe te kan bly, om sodoende uiteindelik te kan skryf. Indien Boggom per ongeluk iewers langs die pad ʼn welbekende handelsnaam word, is dit goed so. Ek sal beslis weekliks flikflakke in die gang af doen!”

Dan is daar ook ʼn boek in wording oor die lewenslesse wat De Jager langs die pad geleer het, ʼn lighartige kinderboek of digitale app vir kinders oor die avonture van Boggompie, en ʼn derde projek waaroor De Jager nie nou meer wil verklap nie. “Dié aap moet liefs maar in die mou bly vir nou,” lag hy.

Besoek Boggom se Facebook-blad en webblad hier vir meer inligting of om lid te word van die vrolike trop boggomjane.