Michelle Oelofse
So sê Michelle Oelofse van die Hoërskool Riebeeckstad in die Vrystaat, wat in die matriekeindeksamen sewe onderskeidings ingeoes het.
Sy het A’s behaal in Afrikaans, Engels, rekeningkunde, ekonomie, besigheidstudies, geografie en lewensoriëntering.
Die slimkop gaan vanjaar BCom regte studeer. Sy is nog nie seker of dit by Tukkies, Kovsies of Maties sal wees nie.
Michelle se lewensfilosofie is geskoei op die woorde van Ralph Waldo Emerson: “Moenie volg waar die pad lei nie. Gaan waar daar geen pad is nie en laat ’n wandelpad agter.”
Haar sukses skryf sy toe aan nuuskierigheid en leergierigheid. En natuurlik passievolle onderwysers.
Haar rolmodel is ma Mariëtte, ’n entrepreneur in die tekstielbedryf. “Sy is die sterkste mens wat ek ken. Sy is hardwerkend en altyd ’n ware dame.”
Op skool het Michelle aan redenaarskompetisies deelgeneem en sy was in 2012 die redakteur van die skoolkoerant. In 2013 was sy die voorsitter van die Voortrekkers se Vrystaatse Jeugraad. Sy het ook haar Presidentsverkenner-toekenning gekry met die hoogste gemiddeld van 94% in Suid-Afrika en Namibië.
Sy was ook hoofmeisie van haar skool en onderburgemeester van die junior stadsraad van die Matjhabeng-munisipaliteit.
Michelle beskou haarself as iemand wat passievol oor die land is en glo dat sy ʼn bydrae kan lewer in die ontwikkeling daarvan.
“Ek glo in regverdigheid en vorm my opinies eers nadat ek soveel moontlik inligting oor ʼn saak gekry het. Ek is trots op my organisatoriese vaardighede, maar weet ook dat ek aan my geduld moet werk.”
Michelle se pa Anton is ’n beroepsveiligheidsopleier. Sy het ook ʼn tweelingboetie en sussie, André en Nadine, wat in Kroonstad skoolgaan.
