Video: Koerantverkoper se verhaal gryp harte aan

'n Skermgreep uit die video.

‘n Skermgreep uit die video.

Albert Bredenhann, die bekende fotograaf en eienaar van Pixel Pro Photography, se selfoonvideo van ʼn vrou in Pretoria wat vertel van haar lewe as koerantverkoper, het soveel mense aangeraak dat dié video binne ʼn dag reeds meer as 200 000 keer op sosiale media gekyk is. Die video is ook bykans 6 500 keer gedeel.

Bredenhann het aan Maroela Media vertel hy was omstreeks 04:00 Dinsdagoggend by ʼn vulstasie in Olympus in die ooste van Pretoria, toe hy ene Cornelia sien staan het met haar koerante.

“Ek loop gereeld interessante mense raak en dan vra ek hulle uit oor hulle lewe. Nie al die video’s word egter so wyd versprei soos Cornelia sʼn nie. Sy het so vrolik gelyk dat ek gedink het ek wil graag met haar gesels,” sê hy.

In die video vertel Cornelia (29) dat sy reeds om 01:00 die oggend moes opstaan om 04:00 by die vulstasie aan te meld vir haar koerantverkope. “Ek moet, oom,” sê sy gelate.

Sy vertel verder dat sy reeds voor 02:00 die koerante moet gaan afhaal by die depot in Silverton en dat sy op daardie spesifieke dag slegs agt koerante gehad het om te verkoop. Hoewel sy sê dat haar inkomste van dag tot dag verskil, het sy vertel dat sy die vorige dag R13,00 huis toe gevat het.

Op ʼn vraag van Bredenhann hoe dit moontlik is om te leef op R13 ʼn dag, antwoord sy: “ʼn Mens moet seker maar ʼn broodjie eet.”

Verder vertel sy dat sy ʼn seuntjie het wat in Laerskool Nicolaas Smit, wat in Hercules in Pretoria-Wes is, skoolgaan. Volgens Bredenhann het die skoolhoof van dié skool intussen met hom kontak gemaak en bevestig daar word by die skool vir die seun voorsiening gemaak vir kos en klere deur die skool se voedingskema en klerebank.

Sedert die video so wyd op sosiale media versprei is, het talle weldoeners na vore gekom om Cornelia te help. ʼn Tandarts het sy dienste aangebied om Cornelia se tande te trek en vir haar valstande in te sit. “Ek het vanoggend die nuus aan haar oorgedra en sy is baie dankbaar. Ek sien daar het intussen ook mense vir haar sakke klere by die vulstasie afgelaai,” sê Bredenhann.

Bredenhann voeg by dat sy missie nie is om slegs vir Cornelia by te staan nie en daarom is daar nie ʼn bankrekening of ander fonds vir haar geskep nie.

“Cornelia is gelukkig met haar lewe. Om koerante te verkoop gee vir haar ʼn doel in die lewe. Die missie deur Cornelia se verhaal te deel, is eerder om mense aan te spoor om behoeftiges in hul omgewing by te staan. Op elke hoek is daar ʼn koerantverkoper. Ken jy sy naam? Weet jy wat sy storie is? Daar is soveel behoeftige mense daar buite, dalk selfs jou eie familie, wat nie noodwendig eens finansiële hulp nodig het nie, maar dalk net iets eenvoudigs soos ʼn drukkie of ʼn glimlag.”

Hy benadruk dat finansiële hulp nie altyd die enigste uitweg is om ʼn behoeftige persoon te help nie. “Geld kan soms meer skade aanrig as goed doen. Gee dan eerder kruideniersware, klere, of groet bloot net. Maak ʼn verskil deur jou tyd te gee. Ek glo dat daar wel nog empatie vir ander in die samelewing is en dit is hoekom Cornelia se verhaal so wyd gedeel is.”

Volgens Bredenhann kan ons elkeen ʼn “Cornelia” in die lewe raaksien en daardie persoon se lewe probeer verander.

“Elke ou moet uitgaan en ʼn ‘Cornelia’ gaan soek in sy lewe. As elkeen ʼn ‘Cornelia’ in sy lewe kan aanraak, sal die wêreld ʼn beter plek wees. Daar is altyd ʼn storie agter die storie.”

Vanoggend net na 4am was ek by die garage en het ek 'n rukkie na die vrolike girl gestaan en kyk … En toe kon ek nie anders as om vir haar paar vrae te vra nie …

Posted by Albert Bredenhann on Monday, 4 March 2019

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ʼn vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Kommentaar word ná 48 uur op ʼn artikel op Maroela Media gesluit. Kom kuier gerus verder op ʼn meer onlangse artikel.

46 Kommentare

jongste oudste gewildste
Elize

Een mens kan nie die wêreld eiehandig verander nie, maar elke mens kan bydra tot ‘n groter geheel. Sluit aan as vrywilliger by die Helpende Hand tak naaste aan jou en maak so ‘n verskil. Dit is die beste besluit wat ek nog in my hele lewe geneem het. Dit verander lewens

Ronel Nortje

Dit laat mens besef hoeveel ons het om voor dankbaar te wees. Elke dag is net genade. Ek stem saam – al kan elkeen van ons net een persoon se lewe beter maak, kan dit ‘n groot verskil maak. As ons ander seën word ons ook geseën. Ons almal kan iets uit hierdie artikel leer.

Ek sou

As ek ‘n besigheid gehad het het ek haar aangestel want hierdie is ‘n mens wat wil werk!!!!!

Nadia

Baie mooi storie! Hier in Brooklyn weg op die hoek van Brooklyn en Lynnwood staan daar ‘n nie blanke man, ek het geen idee wat is sy naam nie. Hy verkoop ook koerante maar met ‘n passie. Ek druk net die toeter dan waai hy behoorlik sy arm af, almal wat verby gaan groet hy met passie en ‘n masiewe glimlag! Jy kom gou agter die dag as hy nie daar staan met sy koerant nie, dan soek jy na daai vrolike energieke mens.

Chellie

Mens is so geneig om te klae oor wat jy nie het in die lewe nie – ek ingesluit, dan sien mens iets soos hierdie en jy besef eintlik het jy so baie om voor dankbaar te wees! Dankie vir die deel Maroela!