Is jy reeds besig om jou huis te versier vir die Kersseisoen? Maak hierdie jaar jou eie Kerskrans! Dis maklik, goedkoop en eenvoudig.
Wat het jy nodig?
- Bloemiste-bloekom (Eucalyptus cinerea)
- Bloemiste-draad
- Bloemiste-kleefband
- Snoeiskêr
- Lint/strik
- ʼn Stukkie tou
- Ander versierings (opsioneel)
Só maak jy:
Stap 1:
Besluit hoe groot jy jou kerskrans wil hê en heg twee bloemiste-drade aanmekaar om ʼn sirkel te vorm.
Stap 2:
Bedek die deel waar die twee drade geheg is, met bloemiste-kleefband.
Stap 3:
Knip die bloemiste-bloekom af met ʼn snoeiskêr tot enkel takke en heg die blare met bloemiste-kleefband en/of korter stukkies bloemiste-draad aan die draadsirkel so dig as wat jy verkies.
Stap 4:
Bind die lint of strik vas aan die onderkant van die krans.
Stap 5:
Bind die tou aan die bokant van die krans vas sodat die krans teen ʼn deur of muur kan hang.
Wenke:
Bloemiste-bloekom (“pennygum”) is volop te koop by enige bloemiste. Jy kan ook hederablare (klimopblare of “ivy” in Engels) gebruik, maar die blare van die bloemiste-bloekom word mooi droog en behou hul mooi groen-grys kleur en kan sommer nog lank ná Kersfees jou huis versier.