Dr. Louis Dey is die hoof van Laerskool Constantiapark in Pretoria. (Foto: Laerskool Constantiapark.)
Deur dr. Louis Dey
Geagte Ouers
Gesien in die lig van die veranderde tye wat die jaar 2020 kenmerk, het sommige hoofde van die Afrikaanse skole wat die openbare skole in die oostelike voorstede van Pretoria bedien, dit gerade geag om ’n skrywe saam te stel om ouergemeenskappe se denke oor skole te stimuleer.
Talle vrae het in hierdie onseker tye ontstaan oor modelle wat as alternatiewe vir skole oorweeg kan word. Afstandsonderrig is noodwendig ’n opsie vir skole in die Covid-19-jaar. Om leerlinge te help om só akademies die jaar te voltooi was onafwendbaar.
Ons openbare skole se onderwyskorps – wat die topskole nie net in Gauteng nie, maar ook in Suid-Afrika verteenwoordig – het juis tydens die nasionale inperking uiters innoverend en kreatief te werk gegaan om kuberskole van stapel te stuur.
Trouens, al die skole in ons omgewing kon steeds daarin slaag om akademie van uiters hoë standaarde te bly handhaaf. Skole wat navorsing onder ouers gedoen het, het aangedui dat soveel as 97% van ouers in die omliggende skole met groot sukses van die alternatiewe manier van onderrig gebruik gemaak het. Indien akademiese onderrig die enigste verantwoordelikheid van skole sou wees om kinders na behore in samewerking met ouerhuise op te voed, sou mens kon redeneer dat hierdie manier van doen die manier van die toekoms blyk te wees.
Wanneer opvoedkundige literatuur egter onder die loep geneem word, blyk dit duidelik dat organisasies soos Unesco (Verenigde Nasies se Opvoedkundige, Wetenskaplike en Kulturele Organisasie), Unicef (Verenigde Nasies se Kinderfonds), die Pedriatiese Vereniging van Suid-Afrika en verskeie onderwysstigtings wêreldwyd dit eens is dat skole baie meer as slegs platforms vir akademiese onderrig moet wees. Trouens, as die toereikende opvoeding van ’n kind – wat ten doel het om ’n kind ten opsigte van ál sy/haar moontlikhede tot volwassenheid te begelei – met die dwarssnit van ’n lemoen vergelyk word, blyk dit gebiedend noodsaaklik te wees dat elke segment ewe veel aandag verdien. ’n Kind wat argumentshalwe slegs akademies toegerus word, uiteraard die gevaar loop om slegs ten dele sy/haar volwassenheid suksesvol te realiseer.
Sosiologiese navorsing dui daarop dat kinders wat van hul portuurgroep geïsoleer word, sukkel om na behore hul volwassewording toereikend te voltrek. Literatuur dui voorts daarop dat kinders wat nie binne veilige en koesterende omstandighede sosialiseer nie, se lewensverwagting selfs in sommige gevalle benadeel kan word. Daar is bevind dat hierdie kinders as ontheemdes sosiaal beperk word om hul plek volwaardig in die samelewing te vind.
Doeltreffende skole dien as die ideale oefenveld vir die grootmenswêreld. Gevolglik is sosiale opvoedkundiges eensgesind dat effektiewe skole ’n ideale ruimte bied om kinders sodanig toe te rus om as lojale landsburgers in die samelewing ’n sinvolle en betekenisvolle bydrae te lewer.
Goeie openbare skole wat opvoedkundig innoverend bestuur en strategies geposisioneer word om kinders vir die toekoms voor te berei, bied aan kinders vanaf gr. R tot 12 veel meer as net akademie. Waardegedrewe skole vorm kinders as toekomstige volwassenes in totaliteit. Hierdie skole as mikrosamelewings bied emosionele-, sosiale-, normatiewe-, fisieke- en kulturele geleenthede om geronde grootmense te slyp – volwassenes wat uitstekend opvoedend toegerus is om ’n blink toekoms vir ons land te verseker.
Om alternatiewe onderrigmodusse te bly ontwikkel, is ’n moet, maar onses insiens skep funksionerende skole geskikte ruimtes om ’n broodnodige bydrae tot ’n samelewing te maak wat op sóveel dimensies verarmd daar uitsien.
- Dey is hoof van die Laerskool Constantiapark.
- Hierdie brief is met die vergunning van Forumnuus.co.za geplaas. Lees die oorspronklike brief hier.
Laat hierdie skrywer dit van die begin af duidelik stel: Skole slaag goed daarin om kinders oor ‘n periode van 12 jaar te lei om die Nasionale Senior Sertifikaat te verwerf en daardeur toegang te kry tot beroepspesifieke opleiding en kwalifikasies. Skole vaar egter sleg as dit kom by opvoeding as die definisie daarvan aanvaar word as volwassewording.
‘n Mens kan volwasse word slegs binne die intieme ruimte van ‘n gesinsverhouding, gekenmerk deur nabyheid, met gesag as uitkoms. In die skool bestaan daar afstand tussen volwassene en kind, omdat dit ‘n formele ruimte is waar mag, nie gesag nie, die kinders rig. Onderwysers het nie persoonlike verhoudings met kinders nie, maar dit bestaan wel tussen die kinders onderling. Daarom spreek die gesag van die portuurgroep veel harder as die mag van onderwysers of die gesag van ouers. Die grootste nadeel van skool is juis die invloed van die portuurgroep/maats, want kinders is geskei van die “neswarmte” wat by hulle ouers te vinde is.