As God die gras van die veld, wat van dag nog daar is en môre in die vuur gegooi word, só mooi maak, hoeveel te meer sal Hy julle versorg, julle kleingelowiges! Beywer julle vir sy koninkryk, dan sal Hy julle ook hierdie dinge gee. (Luk 12:28, 31)
Jesus berispe die mense as kleingelowig omdat hulle twyfel of God regtig getrou aan hulle sal wees. Hierdie twyfel manifesteer dikwels as vrese. Gaan ons genoeg hê? Gaan ons dit betyds hê? Gaan ons beskut wees? Gaan God by ons wees?
Hy sê: “God sorg in groot besonderhede vir die mees basiese dinge in die lewe soos die gras. Dink julle regtig Hy sal vir die gras sorg, maar nie vir julle wat sy kroonskepping is nie? Dink julle regtig só min van God se karakter? Natuurlik sal Hy vir julle sorg! Sorg julle net dat julle by Hom bly. Julle moet minder besorg wees oor die dag van môre en meer besorg daaroor wees om God se wil te doen.”
Vader, wat ’n vertroosting is Jesus se woorde! Ek bely nou hier hardop dat U absoluut getrou is in u sorg vir my. Mag ek dit nooit vergeet nie.