Gedagte vir die dag: As ek Hom net kan aanraak …

 Jesus_kleed_stiltetyd.jpg

Foto: freebibleimages.org

Daar was ’n vrou in die skare wat twaalf jaar lank aan bloedvloeiing gely het. Sy het alles wat sy gehad het, aan dokters bestee, maar kon nie genees word nie. Sy het van agter na Jesus gekom en die soom van sy kleed aangeraak. Onmiddellik het die bloeding gestop. (Lukas 8:43, 44)

Twaalf jaar van dié vrou se lewe was hel. Op grond van die aard van haar siekte was sy vir die gemeenskap ’n onreine en ’n uitgeworpe randfiguur. Sy het in die skadu geleef, weggesteek van ’n onsimpatieke samelewing. Toe hoor sy van Jesus, die Man van Nasaret wat mense gesond maak. As deel van ’n malende skare mense kon sy onopgemerk saamloop. Daar was net die een begeerte in haar hart, naamlik om sy kleed aan te raak. Sy was seker dit sou genoeg wees. En toe gebeur dit …

Die oomblik toe sy sy kleed aanraak, het haar bloedvloeiing gestop. Sy kon dit voel! Wat meer is, Jesus kon dit voel! En daar voor die hele skare word die vrou ontmasker – nie as ’n verworpene nie, maar as ’n begenadigde. Sy kon huis toe gaan met Jesus se seëngroet in gedagte: “Dogter, jou geloof het jou gered, gaan in vrede.”

Die verlies van jare se skadulewe het vir haar uitgeloop op die wins van ’n ontmoeting met Jesus. Sy het inderdaad vrede gevind.

Bron:
By waters van rus deur Johan Smit
Uitgewer: Christelike Uitgewersmaatskappy

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ’n vrywillige bydrae. Onthou – ons nuus bly gratis.

Maak 'n bydrae

Nou pra' jý

2 Kommentare

Het jy iets op die hart? Maroela Media se kommentaarfunksie is ongelukkig gesluit oor die Paasnaweek. Kom kuier gerus later weer!

Nuuswenke kan deur hierdie vorm gestuur word.