In die begin was die Woord daar, en die Woord was by God, en die Woord was self God. Hy was reeds in die begin by God. Alles het deur Hom tot stand gekom: ja, nie ’n enkele ding wat bestaan, het sonder Hom tot stand gekom nie. (Johannes 1:1-3)
Die Jode het geglo dat God nie direk met die wêreld omgaan nie omdat Hy te heilig is, maar dat Hy sy “Woord” of Logos – ’n aparte verskyning van Homself – daarvoor gebruik. Deur sy Logos het Hy die wêreld gemaak en gaan Hy met die wêreld om.
Johannes sluit by hierdie geloof aan, maar hy sê hy ken daardie Logos, hy het met Hom gepraat – trouens, hy het drie jaar saam met Hom geleef! Hy praat van Christus, natuurlik. Hy sê Christus is God se “Woord” wat Hy tot die mens gespreek het. Alles wat God vir ons wou sê, het Hy in Christus gesê! Johannes maak hiermee ’n abstrakte konsep baie konkreet. Vir hom gaan dit nie oor filosofie nie, maar oor ’n persoon – een wat hy persoonlik geken het! Ons moet ook nie te filosofies oor God dink nie, maar prakties. As ons wonder hoe God is, hoef ons nie teoreties te raak nie. Ons kan Hom persoonlik ontmoet. Sy Naam is Jesus!
Onmeetlike God, dankie dat U tot ons ’n Woord gespreek het: Jesus Christus. Dankie dat ons U deur Hom kan ken! Amen.
Dankie ons Here. U het mens geword en hier tussen ons kom woon. Ons kom wys hoe Liefde lyk. Groot genade.