Gedagte vir die dag: Die hele skepping juig

Foto: Reint Dykema

Prys die Here vanuit die hemele, prys Hom in die hoë hemel! (Psalm 148:1)

Het jy al die sterre hoor sing iewers in die Vrystaat of in die Karoo of op Matroosberg in die Hexriviervallei? Het jy al skoenlappers in swerms sien trek, springbokke oor die veld sien dans en dolfyne deur die branders sien glip, die Namakwalandse blommeprag sien lag? God het dit ge­niet om elke blom en dier en mens spesiaal te maak en met die vermoë om Hom te loof. Hy hoor sy skepping juig: ‘Halleluja, aan sy liefde is daar geen einde nie!’

Wat kan ek meer sê as die digter van Psalm 148?

‘Prys Hom, alle engele, prys Hom alle hemelwesens! Prys Hom, son en maan, prys Hom, alle sterre! Prys Hom, hoogste hemele en waters in die hoë hemelruim! Laat hulle die Naam van die Here prys, want Hy het beveel en hulle is geskep; Hy het hulle vir altyd hulle vaste plek gegee, vir hulle ’n orde neergelê waarbuite hulle nie kan beweeg nie. Prys die Here van die aarde af, seediere en al die oseane, weerlig en hael, sneeu en miswolke, stormwind wat sy opdrag gehoorsaam, berge, al die heuwels, vrugtebome, al die seders, wil­de diere, al die vee, al wat kruip of vlieg, konings van die aarde, alle volke, vorste, alle regeerders van die aarde, jong manne en meisies, grysaards saam met seuns! Laat hulle die Naam van die Here prys, want sý Naam alleen is hoog verhewe, sy majesteit strek oor die aarde en oor die hemel’ (Ps 148:2–13).

Heilige Here, as ek u skepping aanskou en hoe U alles aanmekaar­gesit het en steeds onderhou, raak my woorde op. Saam besing ons u skeppingsmag, u kunstenaarshande, u ingenieursprestasies, die skoonheid en lewenskrag wat U vir elke lewende wese ingebou het, selfs vir dinge wat oënskynlik dood is. U hele skepping prys U.

Bron:
Liefde vir elke dag deur Helena Hugo
Uitgewer: Struik Christian Media

Boeke deur Helena Hugo is nou beskikbaar by CUM Boeke
Vir meer geestelike artikels besoek Joy! Digital