Die volk wat in donkerte geleef het, het ’n groot lig gesien, oor dié wat in die donker land was, het ’n lig geskyn. (Jes 9:1)
Lees Jesaja 9:1-6
Baie jare voor Jesus se geboorte voorspel die profeet Jesaja dat daar eendag Iemand sal kom wat die sonde donkerte op aarde sal uitwis, en lig vir God se kinders sal bring. Met Jesus se geboorte word hierdie profesie vervul. In die Bybel is lig meestal positief, ’n aanduiding van God se koninkryk, terwyl donkerte gewoonlik negatief is en die ryk van die duisternis aandui. Die boodskap van Kersfees is juis dat God sy Seun na die wêreld stuur sodat ons nooit weer in die donker hoef voort te ploeter nie, maar van nou af die Lig wat lewe gee by ons sal hê. Lig is dan ook sinoniem met Kersfees. Daar is oral Kersliggies in die strate, aan die Kersbome en in die winkelvensters.
In die Lukas-weergawe van die geboorteverhaal was die eerste teken van die engel die glans van God se heerlikheid wat rondom die skaapwagters geskyn het. Jesus getuig self dat Hy die lig vir die wêreld is, maar Hy stel óns aan om ook ligte te wees. Ligte wat in ’n donker wêreld behoort te skyn en wat nie deur die duisternis oorweldig sal kan word nie. Wil jy nie hierdie Kersfees erns maak met jóú ligroeping nie? Straal God se lig uit na die mense rondom jou, getuig van die Lig sodat jy self ’n lig vir God kan wees.
Here Jesus, dankie dat U gekom het om lig te maak in ’n donker wêreld. Maak mý hierdie Kersfees ook ’n lig wat van U sal getuig en u lig sal uitstraal. Amen
