Dié wat beweer dat hulle in ’n noue verbintenis met Hom leef, moet self ook leef soos Hy geleef het. (1 Johannes 2:6)
Jesus is God se standaard van reg en verkeerd. As ons wil weet wat vir God aanvaarbaar is, moet ons na Jesus kyk. Hy is die volledige en perfekte openbaring van die wil van God. Hy is ook die volledige en perfekte openbaring van die karakter van God.
Johannes sê as iemand beweer dat Hy in Jesus is, móét die karakter van God in hom wees anders lieg hy. Jy kan nie ín Jesus wees en dan is Hy nie in jou nie. Dit beteken nie jy is nou perfek en volwasse en doen alles reg nie. Dit beteken dat selfs al is die vlees teenwoordig, is die lewe van Jesus sigbaar. Stadig maar seker dring die lewe van Jesus die duisternis van jou vlees binne en verteer dit. ’n Mens kan dit sien, selfs al tree so ’n persoon in die vlees op. Die lewe van Jesus slaan selfs dan deur in die manier hoe iemand reageer wanneer hy besef sy optrede of woorde was nie in Jesus nie. Jy sien dit in die gesindheid van erkenning en nederigheid en bekering. Jy sien dit in leerbaarheid, opregtheid en eerlikheid. Dit is eienskappe so teenstrydig met die vlees en so eie aan die karakter van Christus. Om te sê jy is in Christus en hierdie eienskappe nie te toon nie, beteken iets is fout. Dan moet ’n mens óf jou lewenswyse óf jou getuienis verander!
Vader, leer my wat ware geestelikheid beteken – leer my die weë van u Seun.