Gedagte vir die dag: Die Gees lei ons na gehoorsaamheid  

pad_woud_bos_stiltetyd_pixabay.jpg

Foto: pixabay.com

God het sy liefde in ons harte uitgestort deur die Heilige Gees wat Hy aan ons gegee het. (Rom 5:5)

In Handelinge 9:1-31 lees ons die verhaal van Saulus van Tarsus. Hy was op pad na Damaskus om die Christene te vervolg. Skielik het ’n lig uit die hemel op hom geskyn. Hy het op die grond neergeval en ’n stem vir hom hoor sê: “Saul, Saul, waarom vervolg jy My?” Hy het gevra: “Wie is U, Here?” Die Here het geantwoord: “Ek is Jesus. Dit is vir My wat jy vervolg.”

Jy kan jou net indink hoe bang Saulus moes gewees het. Daar was hy, dalk op sy perd se rug, op pad na Damaskus om die Christene te vervolg. Die God van daardie einste Christene ruk hom toe van sy perd af om hom te roep om die evangelie van Jesus Christus te verkondig.

Saulus het opgestaan, maar hy kon nie sien nie. Hy was vir drie dae blind. Deur die dissipel Ananias het die Here vir Saulus gewys dat Hy hom as sy instrument gekies het om sy Naam aan die heidene en die volk Israel te verkondig. Hy het gehoor hoe baie hy vir Jesus sou ly.

Wanneer jy God na jou hoor roep, dalk deur die fluistering van sy Gees in jou gees, moenie sy stem ignoreer nie. Moenie die werk van die Gees deur ongehoorsaamheid stuit nie. Dan sal God jou nie deur ’n Damaskus-ervaring hoef te laat gaan om jou te roep nie. Luister na die Gees wat jou roep en lei. Gehoorsaam sy stem wanneer jy Hom met jou hoor praat.

Here, vergewe my vir die kere toe ek die stem van u Gees in my hart geïgnoreer het. Ek wil die Gees se leiding volg. Amen

Bron: Aartappelgeloof vir elke dag deur Angus Buchan
Uitgewer: Christelike Uitgewersmaatskappy

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ’n vrywillige bydrae. Onthou – ons nuus bly gratis.

Maak 'n bydrae

Het jy iets op die hart? Maroela Media se kommentaarfunksie is ongelukkig gesluit oor die Paasnaweek. Kom kuier gerus later weer!

Nuuswenke kan deur hierdie vorm gestuur word.