Foto: pixabay.com
U het my reeds groter vreugde laat belewe as wat daar is by mense wat koring en wyn in oorvloed het. (Psalm 4:8)
Dawid se woorde verwys spesifiek na mense wat pas geoes het en wie se skure vol koring, druiwe en wyn is. Oestyd is in alle landbougemeenskappe die vreugdevolste tyd van die jaar. Oesfeeste is altyd heerlike en uitbundige geleenthede. Dawid sê egter dat die Here vir hom groter vreugde inhou as ’n goeie oes, as vol skure of oorvloed. Natuurlik is daar vreugde in ’n goeie oes, in ’n onverwagte bonus of in finansiële sekuriteit – hoe dan anders? Dan moet ons ook kan saam vier en ’n lekker fees kan geniet!
Dawid sê egter hier, te midde van die oestery en die viering, dat hy van ’n nog lekkerder lekker weet: Die vreugde wat hy al in die Here beleef het, is groter as enigiets anders! Ja, ’n mens kan in die grootste fees verlang na iets meer, of jy kan met relatief min dinge diep gelukkig wees. Die Here moet in die prentjie bly – selfs by jou vreugde.
Here, U is die rede vir my vreugde. Om saam met U te leef is ’n fees! Amen.
Ek raak bly as my gunsteling rugbyspan wen, of as mens ‘n onverwagse bonus kry (soos genoem is) of as ‘n wildtuin vakansie vir my aanbreek , maar geen vreugde is so groot en so intens nie as om vreugde in die HERE te vind!