Liggaamlike oefening het wel waarde, maar geestelike oefening is baie belangriker, want dit hou die belofte in van beloning, sowel in hierdie lewe as in die volgende. (1 Timoteus 4:8)
Om fiks te word, kan jou net goed doen. ’n Sterk en fikse liggaam sal jou nie net beter laat lyk nie, maar ook beter laat voel, dink en slaap.
Maar waarom gebruik jy nie die moeite wat jy fisiek doen as ’n herinnering daaraan dat jy ook aan jou geestelike fiksheid moet werk nie? Onthou, ’n mens se geestelike fiksheid is selfs belangriker as jou fisieke welstand, want ook al is jy hoe gesond, gaan jy nie vir altyd lewe nie. En ook al is dit hoe belangrik om fisiek gesond te wees, moet ons net soveel aandag aan ons geestelike welstand skenk. En nee, die gedagte aan ons sterflikheid hoef jou nie fatalisties of pessimisties te maak nie! Laat dit eerder ’n herinnering wees dat jy voluit moet lééf, binne én buite jouself. Terwyl jy draf of fietsry of touspring, kan jy ook bid en God loof en dink aan maniere om onselfsugtig en deernisvol te leef.