Gedagte vir die dag:  Hoe verwaand is ek?

blomme-veld-vrou-son-stiltetyd.jpg

Foto: pixabay.com

Ons lewe deur die Gees; daarom moet die Gees ook ons leefstyl bepaal. Ons moenie te veel van onsself dink, mekaar irriteer of op mekaar jaloers wees nie. (Galasiërs 5:25-26)

’n Kat en ’n rot beland in ’n storm saam op ’n stuk dryfhout wat stroomaf dryf. Twee aartsvyande het nou ’n gemeenskaplike “vyand”! Hulle weet hulle moet oorleef in die vinnig vloeiende rivier en klou albei druipnat en bedremmeld verbete aan die dryfhout vas. Dit lyk amper asof daar ’n moontlikheid is dat hulle vriende kan raak. Maar hierdie nuwe manier van na mekaar kyk, is van korte duur. Toe die dryfhout teen die wal beland en albei afspring en weghardloop, sit die kat die rot onmiddellik agterna net om binne ’n paar sekondes korte mette van die rot te maak.

Ons is almal geneig om – wanneer ons ’n gemeenskaplike stryd het – met groter empatie, vergifnis, nederigheid en liefde na mekaar te kyk. En dan, wanneer die krisis oor is? Dan verloor ons weer ons sagte oë vir mekaar.

Die Heilige Gees vind so selde ware deernis en konstante nederigheid in ons dat Hy spesiaal in sy Woord geskryf het dat ons tog nie verwaand moet wees nie.

Gees van Waarheid, vergewe my my selfsug, verwaandheid en eie-belang-menswees.

Bron: Krag vir elke dag deur Milanie Vosloo
Uitgewer: Christelike Uitgewersmaatskappy/CUM

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ’n vrywillige bydrae. Onthou – ons nuus bly gratis.

Maak 'n bydrae

Nou pra' jý

Een kommentaar

O wee, die gesang is uit! Die kommentaar op hierdie berig is gesluit. Kom kuier gerus lekker verder saam op ʼn ander artikel.