Ek werk, en wie kan dit keer? (Jesaja 43:13 – Bybel in Afrikaans 1933/1953)
God sê die ballingskap is verby en die Jode kan terugkeer. Baie dinge gebeur toe: Kores en die Persiese konings ná hom het wette uitgevaardig wat al die vreemde volke in Babilonië vrystel. Tientalle families het al hulle besittings verkoop of terugvervoer deur verskeie lande – ’n geweldige trek. ’n Groot deel van die volk het doodgewoon agtergebly en Babilon het vir nog duisend jaar ’n belangrike Joodse sentrum gebly. Wonders het gebeur soos dat Nehemia volle staatsondersteuning kon bekom vir die herstel van die tempel en Jerusalem. Oor jare heen en in verskeie trekgroepe kom die Jode terug in hulle land.
Wat leer ons hieruit? As God iets besluit, sal niks Hom keer nie. Hy láát dinge gebeur. Jy (en ek) moet ook maar ontspan in God se hand. Wat ook al gebeur, die Almagtige is reg langs jou. Niks kan gebeur as Hy nie gesê het dis reg so nie. Alles wat gebeur, werk ten goede mee en bring ons nader aan die doel. Ons verstaan dit nie heeltemal nie, maar dit is wat die Bybel sê. Dit is ’n groot troos.
Here, dankie vir u almag en vir u liefde. Amen.
Wat `n wonderlike gedagte om hierdie nuwe dag mee te begin en voltooi in Gods Naam. Op hierdie Skrifwaarheid antwoord ek met duisende AMENS en `n hart vol vreugde en blydskap. Hartlike dank en seënwense.