Foto: fineartamerica.com
Elkeen wat só liefhet, is uit God gebore en ken God persoonlik. (1 Johannes 4:7)
Jy wil liefhê. En jy wil liefgehê word. Nie sommer net so bolangs nie. Nee, jy verlang altyd na ’n hegte en intieme verhouding met ten minste een ander persoon. Één persoon wat jou regtig ken vir wie jy is, alles van jou af weet, jou sterkpunte, maar ook al jou gebrokenheid al gesien het … en jou steeds liefhet.
Wanneer jy en daardie persoon in opregtheid jul lewens en jul harte kan deel en ’n onvoorwaardelike pad met mekaar saamloop, gebeur daar ’n klompie dinge: Jy en daardie mens word ryker in jul menswees omdat julle mekaar die ruimte en ondersteuning bied om julself te wees, om saam te struikel, maar ook saam te groei.
Soos Richard Rohr skryf: “People who avoid intimacy are always, and I mean always, imprisoned in a small and circular world. Intimacy is the only gateway into the temple of human or divine love … Intimate love is the true temple that we all desire.” Met jou verhouding met God is dit nie anders nie. Hoe nader julle aan mekaar leef, hoe meer jy jou vir Hom oopstel, hoe meer tyd jy maak om sy hart te hoor, hoe liewer sal jy vir Hom word. Hoe meer sal jy groei.
God het ons mense gemaak met ’n onuitputlike behoefte aan die gee en ontvang van liefde. Juis omdat die liefde álles is.
Ek plons vandag in u liefde, Here.
