“Kyk, Ek staan by die deur en Ek klop. As iemand my stem hoor en die deur oopmaak, sal Ek ingaan na hom toe en saam met hom maaltyd hou, en hy met My. Aan hom wat oorwin, sal Ek gee om saam met My te sit op my troon, soos Ek ook oorwin het en saam met my Vader op sy troon gaan sit het” (Openbaring 3:20-21).
Almal wat Ek liefhet, bestraf en tugtig Ek. Wees dan ywerig en bekeer jou. (Openbaring 3:19).
Jesus sê: “My genade is vir jou genoeg” (2 Korintiërs 12:9). Die genade van God is al wat jy nodig het. Wanneer jy swak is, is jy sterk.
Jy sien, as jy sê: “Ek wil dit op my manier doen,” onttrek God Hom. As jy nie meer kan voortgaan nie, en jy sê: “Jesus, help my,” antwoord Hy: “Hier is Ek.” Ons is soms maar net soos klein kindertjies. Hulle wil dinge altyd op hulle manier doen; dan druk hulle jou hande weg. Maar wat doen hulle sodra daar moeilikheid is? Hulle roep na jou as ouer en dan kan jy help.
Het jy al ooit gesien hoe ’n lewensredder iemand red wat besig is om te verdrink? Wanneer die baaier in die moeilikheid raak en om hulp roep, spring die lewens redder dadelik in die water om hom te red. Hulle sê mense wat besig is om te verdrink, kan gevaarlik wees, want hulle raak desperaat en paniek bevange. Hulle kan onopsetlik die persoon wat hulle probeer help, ook laat verdrink. Somtyds moet die lewensredder die drenkeling ’n uitklophou gee om hom veilig op die strand te kry. Eers wanneer die drenkeling geen krag meer oor het om te veg nie, kan hy gered word.
Ons almal dink somtyds ons is sterk, maar skielik raak ons desperaat, en begin spartel. Dan kan die Here niks vir ons doen nie; Hy staan bloot terug. As dit beskryf hoe jy tans reageer, hoor dan wat Hy vir jou sê: “Kyk, Ek staan by die deur en Ek klop. As iemand my stem hoor en die deur oopmaak, sal Ek ingaan na hom toe en saam met hom maaltyd hou, en hy met My. Aan hom wat oorwin, sal Ek gee om saam met My te sit op my troon, soos Ek ook oorwin het en saam met my Vader op sy troon gaan sit het” (Openbaring 3:20-21).
My Vader, dit is presies hoe ek tans reageer. Ek dink ek is sterk genoeg om op my eie reg te kom. Ek besef dat ek die lewe vir myself moeilik maak. Here, ek gee alles oor aan U. Ek dank U dat U by die deur van my lewe staan – ek maak oop en ek nooi U in. Ek vertrou U, Here, om oor te neem – ek onderwerp myself aan u wil. Amen.
Here dankie vir die uitgestrekte Hand van genade…ek neem dit Here in volle vertroue dat U die beste weet
Here baie dankie vir genade vir krag vir gesondheid vir U. Dankie dat U daar is vir ons mense. Ek buig en verklaar dat U my God is. Ek vertrou in U ten volle my God. Amen