Jesus het vir die mense gesê: “Ek is die lig vir die mensdom. Wie My aanhou volg, sal nooit in die duisternis leef nie, maar sal die lig hê wat lewe gee.” (Johannes 8:12)
’n Kunstenaar het eenkeer ’n prent van ’n wintersaandskemering geskilder – die bome swaar van die sneeu en ’n vaal, donker huis wat eensaam in die storm staan. Dit was ’n hartseer skildery. Toe sit hy ’n geel lig in die een venster. Dit het ’n ongelooflike effek gehad. Die hele toneel is verander in ’n visioen van gemak en blydskap.
Die geboorte van Christus was net so ’n lig in die donker wêreld. ~ Anoniem
Vader van die lig, U gee nie net vir ons lig vir ons liggaamlike oë nie, maar ook die lig van hoop vir ons geestelike oë. Dankie, Jesus, dat u lig vir altyd vir Christene sal skyn. Amen