Gedagte vir die dag: Luister na die musiek

Argieffoto

Kom na My toe, julle almal wat moeg is en swaar laste moet dra, en ek sal julle lewens verkwik. Want my juk sal sag op julle skouers rus en my las is lig om te dra. (Matteus 11:28a, 30)

Wanneer die lewe nie uitwerk soos ons gedink het nie, sleg- te dinge ons onverhoeds vang of daar ’n stuk pyn ons lewe binnedring, is dit regtig moeilik om soms die goeie daarin te sien. Dan wil ons ook nie hoor dat die beste hieruit kan voortvloei nie. Tog weet ons diep in ons hart dat ons Vader ’n manier het om deur die gate te werk en steeds musiek te maak. “I am a hole in a flute that the Christ’s breath moves through – listen to this music,” het Hafiz gesê.

Onthou vandag:

• Pyn bring nie altyd begrip nie – dit leer ons eerder om blindelings te vertrou.
• Pyn maak ons nie slimmer nie – dit maak ons wyser en gee ons insig.
• Pyn plaas ons nie noodwendig op hoogtes nie – dit leer ons eerder om self dieper lief te hê, meer deernis en begrip met ander se pyn te hê.
• Pyn maak ons los van kunsmatigheid – dit maak ons eg. Ryk. Méns.

Miskien is jy nie lus om vandag na die musiek te luister wat uit jou pyn vloei nie. Dis oukei. Laat die Meester-fluitspeler toe om aan te hou speel … weldra sal jy dit diep in jou hart beleef.

Here, bly speel u genade in my lewe … al hoor ek dit nie nou nie, asseblief.

Bron:
Jou voetpad na vrede deur Milanie Vosloo
Uitgewer: Christelike Uitgewersmaatskappy